Kreml raspracoŭvaje płany maštabnaj ataki na kaśmičnuju infrastrukturu, raskazaŭ u intervju vydańniu The Times kiraŭnik Kaśmičnaha kamandavańnia ZŠA.
Maskva płanuje raźmiaścić na arbicie zbroju, zdolnuju vyklikać hłabalny chaos, papiaredžvaje hienierał Styvien Uajtynh, kiraŭnik Kaśmičnaha kamandavańnia ZŠA.
Pavodle Uajtynha, Rasija zastajecca technałahična raźvitoj kaśmičnaj dziaržavaj i praciahvaje inviestavać u sistemy, pryznačanyja dla źniščeńnia abo niejtralizacyi spadarožnikaŭ.
Adna ź idej — raźmiaścić na nizkaj kalaziamnoj arbicie jadzierny zarad, jaki ŭ vypadku padryvu zmoža paralizavać značnuju častku suśvietnaj spadarožnikavaj infrastruktury.
Pavodle acenak, vybuch na vyšyni ad 300 da 1200 mil (prykładna ad 480 da 1930 km) moža źniščyć abo pastupova vyvieści sa stroju da 10 tysiač spadarožnikaŭ — heta kala 80% usich abjektaŭ na arbicie.
Nastupstvy buduć katastrafičnymi: ad straty vajennaj raźviedki i sistem naviadzieńnia da poŭnaha zboju hramadzianskich servisaŭ — internetu, mabilnaj suviazi i GPS.
Hety scenar u vajennych kołach užo atrymaŭ nazvu «kaśmičny Piorł-Charbar». ZŠA daviedalisia pra hetyja namiery jašče ŭ 2024 hodzie, tady ž Pientahon pravioŭ zakrytyja bryfinhi dla Kanhresu. Z taho času amierykanskija zakanadaŭcy zaklikajuć rassakrecić bolš infarmacyi pra pahrozu.
Hienierał Uajtynh tłumačyć takija płany Rasii sprobaj vyraŭnavać siły na poli boju.
«Jany hladziać na Złučanyja Štaty i NATA i bačać našu pieravahu ŭ zvyčajnych uzbrajeńniach. I jany ličać, što novyja sposaby padarvać pazicyi Złučanych Štataŭ i NATA, takija, jak niejtralizacyja našych kaśmičnych mahčymaściaŭ, dapamohuć im vyraŭnavać siły na poli boju», — adznačyŭ jon.
Pry hetym, jak adznačaje ekśpiert, raźmiaščeńnie jadziernaj zbroi ŭ kosmasie stanie pramym i hrubym parušeńniem Dahavora ab kosmasie, padpisantam jakoha źjaŭlajecca i Rasija.
Pavodle słoŭ Uajtynha, ahresija Rasii ŭ kosmasie pačałasia nie siońnia. Z pačatku vajny va Ukrainie Kreml pastajanna vykarystoŭvaje srodki radyjoelektronnaj baraćby. Maštabnaje hłušeńnie GPS-sihnałaŭ užo stvaraje niebiaśpieku dla hramadzianskaj avijacyi va Uschodniaj i Paŭdniovaj Jeŭropie, staviačy pad pahrozu žyćci zvyčajnych pasažyraŭ.
Adnak Rasija — nie adziny vyklik. Hienierał nazvaŭ Kitaj hałoŭnym stratehičnym kankurentam, bo Piekin raźvivajecca ŭ kaśmičnaj śfiery «ašałamlalna chutka», stvarajučy ŭłasnyja łaziery i supraćspadarožnikavyja rakiety.
Uajtynh vystupiŭ z zaklikam da ŭrada Vialikabrytanii dy inšych krain NATA značna pavialičyć vydatki na kaśmičnuju abaronu. Na jaho dumku, budučyja vojny mohuć pačynacca mienavita ŭ kosmasie, bo sučasnyja armii krytyčna zaležać ad spadarožnikavych sistem. Niahledziačy na zmročnyja papiaredžańni, hienierał vieryć, što vajny ŭ kosmasie možna paźbiehnuć praz palityku strymlivańnia.
Ciapier čytajuć
Ułady Hrodna paviedamili pra vychad z ładu liŭnioŭki pad udaram stychii1
Kamientary