Rasija zastałasia faktyčna biez spadarožnikavaj sistemy, jakaja adsočvała zapuski jadziernych rakiet

Hrupoŭka, jakuju Rasija pačała stvarać u 2015 hodzie jak zamienu savieckaj sistemie «Aka», amal adnačasova straciła dva aparaty: «Kosmas-2541», zapuščany ŭ vieraśni 2019 hoda, i «Kosmas-2563», vyviedzieny na arbitu ŭ listapadzie 2022-ha. Pieršy apošni raz karektavaŭ arbitu ŭ sakaviku, druhi — u lipieni. Heta, pavodle ekśpierta, moža śviedčyć pra surjoznyja techničnyja prablemy.

Adzinym spadarožnikam sistemy, jaki pakul nie pakazvaje vidavočnych prykmiet niaspraŭnaści, zastajecca «Kosmas-2552». Jon pavinien byŭ pravieści karekcyju arbity ŭ listapadzie 2025 hoda, ale taki manieŭr pakul nie zafiksavany. Tym nie mienš, jak adznačaje Podźvih, rabić kančatkovyja vysnovy pra jaho techničny stan pakul rana.

Ekśpiert u halinie kasmanaŭtyki Anatol Zak miarkuje, što Rasii nie ŭdajecca adnavić sistemu rańniaha papiaredžańnia ab rakietnym napadzie, stvoranuju jašče ŭ časy SSSR. Najbolš vierahodnymi pryčynami hetaha jon nazyvaje mižnarodnyja sankcyi i finansavyja prablemy kaśmičnaj haliny, jakaja nie ŭ stanie vyrablać patrebnuju kolkaść novych spadarožnikaŭ.

U 2024 hodzie Rasija zrabiła ŭsiaho 17 kaśmičnych zapuskaŭ — heta minimalny pakazčyk z pačatku 1960‑ch hadoŭ. U paraŭnańni z 2013 hodam kolkaść puskaŭ skaraciłasia amal udvaja. U vyniku kraina apuściłasia ź pieršaha miesca na treciaje pa kolkaści zapuskaŭ, sastupiŭšy ZŠA i Kitaju. Sa źviestak papularyzatara kasmanaŭtyki Vitala Jahorava, u 2025 hodzie Rasiju pa hetym pakazčyku ŭpieršyniu dahnała Novaja Ziełandyja — taksama z 17 puskami. Ad Kitaja, jaki pravioŭ 90 zapuskaŭ, Rasija adstała ŭ piać razoŭ, a ad ZŠA — bolš čym u dziesiać.

Naprykancy 2023 hoda tahačasny kiraŭnik «Raskosmasa» Juryj Barysaŭ zajaŭlaŭ pra płany vyrablać i zapuskać da 250 spadarožnikaŭ na hod. Jaho pierajemnik Dźmitryj Bakanaŭ letam 2025 hoda paabiacaŭ vyvieści na arbitu bolš za tysiaču aparataŭ da 2030 hoda.

Adnak, na dumku navukovaha kiraŭnika Instytuta kaśmičnaj palityki Ivana Maisiejeva, u realnaści ŭ Rasii amal niama šancaŭ dahnać lidaraŭ. Na 2025 hod u jaje na arbicie znachodziłasia 307 spadarožnikaŭ — u niekalki razoŭ mienš, čym u Kitaja, i ŭ dziasiatki razoŭ mienš, čym u ZŠA.

Takoje adstavańnie, padkreślivaje ekśpiert, niemahčyma likvidavać biez šyrokaj mižnarodnaj kaapieracyi. Pry hetym sproby naładzić supracoŭnictva z Kitajem nie prynosiać plonu: Piekin addaje pieravahu raźvivać ułasnyja prahramy samastojna. Na dumku Maisiejeva, bieź źmien u hieapalityčnaj situacyi i ŭmoŭ izalacyi pierśpiektyvy raźvićcia rasijskaj kasmanaŭtyki zastajucca vielmi abmiežavanymi.

• 13
• 0
• 8
• 1
• 1
• 0
• 0
• 0