Tramp u zvarocie da nacyi paabiacaŭ vielmi chutka skončyć vajnu ź Iranam
«My vierniem ich u kamienny viek, dzie im miesca», — dadaŭ jon.
Prezident ZŠA Donald Tramp vystupiŭ z televizijnym zvarotam da nacyi, u jakim tak i nie adkazaŭ na pytańnie, kali skončycca vajna Złučanych Štataŭ i Izraila ź Iranam, jakaja pačałasia bolš za miesiac tamu. Tramp tolki znoŭ paŭtaryŭ dumku pra toje, što bajavyja dziejańni blizkija da zaviaršeńnia, i čarhovy raz prystrašyŭ Tehieran «nadzvyčaj mocnym udaram», piša Bi-bi-si.
Tramp skazaŭ, što amierykanskija vajskoŭcy amal vykanali pastaŭlenyja pierad imi zadačy ŭ vajnie ź Iranam i što kanflikt chutka skončycca.
«My źbirajemsia skončyć pracu, i my źbirajemsia skončyć jaje vielmi chutka. My vielmi blizkija da mety», — zajaviŭ jon.
Amierykanski prezident znoŭ paŭtaryŭ słovy pra toje, što ZŠA źniščyli vajenna-marski fłot i vajenna-pavietranyja siły Irana, a taksama paralizavali jaho prahramy balistyčnych rakiet i jadziernuju zbroju. Pavodle jaho słoŭ, udary buduć praciahvacca na praciahu nastupnych dvuch-troch tydniaŭ.
«Siońnia ŭviečary ja rady paviedamić, što hetyja asnoŭnyja stratehičnyja zadačy blizkija da zaviaršeńnia», — skazaŭ Tramp u svaim 19‑chvilinnym zvarocie.
Jon taksama paŭtaryŭ dumku pra toje, što nie ZŠA, a inšym krainam patrebien Armuzski praliŭ, jaki ŭžo miesiac faktyčna błakuje Tehieran. Samaja składanaja častka pracy zroblena, i kali kanflikt skončycca, praliŭ adkryjecca naturalnym čynam, śćviardžaje Tramp.
«My źbirajemsia nanieści im nadzvyčaj mocny ŭdar na praciahu nastupnych dvuch-troch tydniaŭ. My vierniem ich u kamienny viek, dzie im miesca», — dadaŭ jon.
Rost cen na paliva ŭ suviazi z vajnoj Tramp nazvaŭ «karotkaterminovym»: «Mnohija amierykancy zaniepakojenyja niadaŭnim rostam cen na bienzin tut, doma. Hety karotkaterminovy rost staŭ vynikam taho, što iranski režym ździejśniŭ šalonyja terarystyčnyja ataki suprać kamiercyjnych naftavych tankieraŭ krain, jakija nie majuć nijakaha dačynieńnia da kanfliktu».
Biržavyja kursy ŭpali, dalar umacavaŭsia, a ceny na naftu znoŭ vyraśli paśla taho, jak prezident ZŠA zajaviŭ, što «asnoŭnyja stratehičnyja mety» Vašynhtona ŭ iranskaj vajnie blizkija da zaviaršeńnia, ale nie nazvaŭ dakładnych terminaŭ zaviaršeńnia kanfliktu, piša Reuters.
Prezident ZŠA ŭžo nie pieršy raz anansuje chutkaje zaviaršeńnie vajny ź Iranam, jakuju Złučanyja Štaty i Izrail pačali 28 lutaha. «My vielmi chutka sydziem», — kazaŭ jon žurnalistam u aŭtorak. Pavodle jaho słoŭ, heta moža adbycca na praciahu «dvuch tydniaŭ, moža być, troch».
U sieradu Tramp zajaviŭ, što Iran źviarnuŭsia da ZŠA z prośbaj ab spynieńni ahniu i što jon razhledzić hetaje pytańnie tolki ŭ vypadku adkryćcia Armuzskaha praliva. Ministerstva zamiežnych spraŭ Irana ŭ adkaz nazvała zajavu Trampa iłžyvaj.
Krynicy Axios paviedamlali, što mahčymaść spynieńnia ahniu ŭ abmien na adkryćcio praliva abmiarkoŭvałasia, ale pry hetym zasumniavalisia skazać, nakolki takaja ździełka realnaja. Jašče ŭ aŭtorak Kitaj i Pakistan pradstavili mirnuju inicyjatyvu ŭ hetym kirunku.
Iran paśladoŭna admaŭlaje praviadzieńnie jakich-niebudź pramych pieramoŭ z Vašynhtonam. Pradstaŭnik MZS Irana Esmaił Bahai nazyvaŭ zajavu Trampa «iłžyvaj i biespadstaŭnaj».
Vydańnie Axios mierkavała, što Tramp, mahčyma, mieŭ na ŭvazie zajavu prezidenta Irana Masuda Piezieškijana, zroblenuju ŭ aŭtorak padčas telefonnaj razmovy sa staršynioj Jeŭrasavieta Antoniu Koštaj. Zhodna z paviedamleńniami iranskich ŚMI, Piezieškijan zajaviŭ jamu, što Iran hatovy spynić vajnu, ale tolki kali ZŠA spyniać svaje ataki, a Iran atrymaje harantyi praduchileńnia adnaŭleńnia bajavych dziejańniaŭ.
«Novy prezident Irana, značna mienš radykalizavany i značna razumniejšy za svaich papiarednikaŭ, tolki što paprasiŭ Złučanyja Štaty Amieryki ab spynieńni ahniu! My razhledzim hetaje pytańnie, kali Armuzski praliŭ budzie adkryty, volny i svabodny», — pisaŭ Tramp u sieradu ŭ Truth Social. Pavodle jaho słoŭ, pakul Tehieran nie pojdzie na sastupki, ZŠA buduć praciahvać «raznosić Iran u puch i prach».
Piezieškijan byŭ abrany prezidentam Irana ŭ lipieni 2024 hoda.
Tramp nieadnarazova zajaŭlaŭ, što vajna skončycca na praciahu dvuch-troch tydniaŭ, a napiaredadni, adkazvajučy na pytańni žurnalistaŭ, jon upieršyniu dapuściŭ, što ZŠA spyniać ataki na Iran biez ździełki z Tehieranam.
Złučanyja Štaty davoli chutka zavieršać vajnu ź Iranam i mohuć viarnucca dla «kropkavych udaraŭ», kali spatrebicca, zajaviŭ Tramp ahienctvu Reuters u sieradu za niekalki hadzin da zapłanavanaha zvarotu da nacyi. Jon taksama skazaŭ, što ŭ svajoj pramovie zajavić ab mahčymaści vychadu ZŠA z NATA, pra što jon raniej razvažaŭ u intervju vydańniu Telegraph.
U vyniku ŭ telezvarocie da nacyi Tramp nie staŭ naŭprost abmiarkoŭvać NATA.
Kamientary