Z 29 sakavika Nacyjanalny aeraport Minsk pierachodzić na letni raskład, jaki budzie dziejničać da 24 kastryčnika. U novym siezonie rehularnyja rejsy ź biełaruskaj stalicy płanujuć vykonvać 10 avijakampanij.
Usiaho ŭ raskładzie zajaŭlena 34 napramki, uklučajučy papularnyja kurortnyja maršruty i rejsy ŭ addalenyja rehijony Rasii.
Niahledziačy na najaŭnaść u letnim płanie rejsaŭ u Izrail, «Biełavija» ŭžo padoŭžyła admienu palotaŭ u Tel-Aviŭ da 16 krasavika ŭklučna. Heta źviazana z rašeńniem avijacyjnych uładaŭ Izraila abmiežavać vykarystańnie pavietranaj prastory dla zamiežnych pieravozčykaŭ.
Taksama pad pytańniem zastajecca stabilnaść rejsaŭ u Dubaj: raniej paviedamlałasia ab prypynieńni palotaŭ pa hetym napramku da 19 krasavika z-za adklikańnia słotaŭ miascovymi ŭładami.
Tym nie mienš u asnoŭnym raskładzie «Biełavija» značycca nastupny pieralik haradoŭ: Ałmaty, Astana, Baku, Batumi, Deli, Dubaj, Jekaciarynburh, Jerevan, Kazań, Kalininhrad, Kamrań/Niačanh (Vjetnam), Kutaisi, Matała (Šry-Łanka), Maskva (Damadziedava, Unukava, Šaramiećcieva), Machačkała, Murmansk, Sańja, Sankt-Pieciarburh, Sočy, Stambuł, Taškient, Tbilisi, Tel-Aviŭ, Turkmienbašy i Urumčy.
Rasijskija pieravozčyki taksama paćvierdzili svaje prahramy. «Aerafłot» złučyć Minsk z Šaramiećcieva, a «Pabieda» — z Unukava i Sankt-Pieciarburham. Red Wings płanuje lotać u padmaskoŭny Žukoŭski, a taksama ŭ Pierm, Samaru i Čalabinsk. Kampanija «Sievierstal» zabiaśpiečyć rejsy ŭ Kałuhu, Pietrazavodsk i Čarapaviec, a «Azimut» — u Minieralnyja Vody. Na azijackim napramku paloty ŭ Piekin i Sijań praciahnie Air China, u Taškient — Uzbekistan Airways, u Ałmaty — SCAT, a z Dubaja ŭ Minsk budzie lotać FlyDubai.
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary
Voś košt taho, što biełarusy zachacieli ruskaha miru i praciahvajuć im nasałodžvacca.