27 śniežnia ŭ kambadžyjskuju stalicu Pnampień z Kienii prylacieŭ hruzavy samalot Ilyushin Il-62M z bartavym numaram EW-505TR biełaruskaj avijakampanii Rada Airlines. Jaho prylot narabiŭ šmat šumu ŭ tajskaj błahaśfiery. Situacyju vymušany byŭ kamientavać pradstaŭnik Karaleŭskich uzbrojenych sił Tajłanda, piša Reform.
Bort 25 śniežnia vylecieŭ ź Viciebska, pryziamliŭsia ŭ kienijskim horadzie Mambasa, a zatym nakiravaŭsia ŭ Pnampień.
Błohiery źviarnuli ŭvahu, što maršrut palotu byŭ naŭmysna prakładzieny ŭ abychod pavietranaj prastory Tajłanda: samalot vybraŭ pralot praz pavietranuju prastoru Małajzii. Nijakaj infarmacyi pra toje, što mienavita dastaviŭ biełaruski samalot u Kambodžu, apublikavana nie było.
Dalej, 28 śniežnia, bort EW-505TR vylecieŭ z Pnampienia ŭ amanski Suchar. Hetym razam jon pralacieŭ nad Tajłandam.
Situacyju vymušany byli kamientavać tajskija ŭłady.
Sprava ŭ tym, što akurat 27 śniežnia Tajłand i Kambodža dasiahnuli pahadnieńnia ab spynieńni ahniu, i mahčymyja pastaŭki zbroi adnamu z bakoŭ mahli pastavić damoŭlenaści pad udar.
Prapas Sandžaidzi, dyrektar pres-centra pa situacyi na tajska-kambadžyjskaj miažy, zaklikaŭ hramadskaść daviarać uzbrojenym siłam. Jon zajaviŭ, što ŭłady całkam infarmavanyja ab pachodžańni samalota, punkcie pryznačeńnia, maršrucie palotu, hruzapadymalnaści i dalnaści jaho dziejańnia. Pavodle jaho słoŭ, raźviedvalnyja padraździaleńni ŭvažliva adsočvajuć situacyju.
Kamientary