U Rasii niezadavolenyja, što biełarusy zavalvajuć ich tannym masłam
Rasijskija i biełaruskija sielskahaspadarčyja ŭłady praviali pieramovy, pryśviečanyja cenam i pastaŭkam masła. Pryčynaj abmierkavańnia stała składanaja situacyja na rasijskim rynku: sabiekošt vytvorčaści masła ŭ Rasii vyras, popyt za hod skaraciŭsia amal na 10%, a składskija zapasy istotna pavialičylisia. Na hetym fonie ŭzmacniŭsia cisk z boku biełaruskich vytvorcaŭ, čyja dola ŭ prodažach u Rasii ŭžo dasiahnuła kala čverci rynku i moža praciahvać raści, piša «Kommiersant».
Pavodle krynic vydańnia na ahrarnym rynku, biełaruskija kampanii pačali prapanoŭvać masła pa nižejšych cenach, što ŭskładniaje rasijskim vytvorcam zbyt ułasnaj pradukcyi.
Aficyjna ž u rasijskim Minsielhasie adznačyli, što na sustrečy havorka išła pra płany naroščvańnia vytvorčaści małočnaj pradukcyi i raźvićcio ekspartu ŭ trecija krainy.
Źnižeńnie popytu na masła stała ŭ Rasii adnoj z charčovych tendencyj 2025 hoda. Prodažy ŭ roźnicy ŭpali značna macniej, čym usiaho małočnaha siehmienta ŭ cełym, što stała reakcyjaj spažyŭcoŭ na praciahły rost cen.
Asnoŭnaj pryčynaj padaražańnia masła ŭ Rasii naprykancy 2024 — pačatku 2025 hoda było rezkaje pavieličeńnie vydatkaŭ na vytvorčaść: padaraželi karmy, enierharesursy i łahistyka. Dadatkova na situacyju paŭpłyvali vysokija suśvietnyja ceny i źnižeńnie prybytkovaści sumiežnaj pradukcyi.
Da kanca 2025 hoda rost cen zapavoliŭsia, adnak popyt adnaŭlajecca pavolna. Rasijskija vytvorcy nazapasili značnyja abjomy masła na składach, ale nie mohuć istotna źnižać ceny z-za nizkaj rentabielnaści i vysokaj cany syroha małaka.
Na hetym fonie biełaruskija brendy ŭmacoŭvajuć pazicyi: adzin ź ich — «Brest-Litoŭsk» — staŭ lidaram prodažaŭ u katehoryi, a biełaruskija kampanii taksama aktyŭna vypuskajuć pradukcyju pad ułasnymi markami rasijskich handlovych sietak.
Ekśpierty adznačajuć, što heta śviedčyć pra pieraraźmierkavańnie dolaŭ rynku na karyść biełaruskich pradpryjemstvaŭ, čyj sabiekošt vytvorčaści moža być nižejšym z-za asablivaściaŭ ekanamičnaj madeli.
22 maja 2025 hoda, robiačy kadravyja pryznačeńni, Alaksandr Łukašenka siarod inšaha zakranuŭ i temu dyviersifikacyi ekspartu biełaruskich praduktaŭ charčavańnia, pryznaŭšy prablemu z prodažam vyrablenaha masła.
Pavodle tahačasnych słoŭ Łukašenki, masła ciapier u Biełarusi robiać zanadta šmat, tamu jaho źbirajecca lišak.
«A tak usio raskuplajuć, akramia masła. Ale masła ž z małaka. Nu davajcie, jak u Vaŭkavysku, pierapracujem u heta suchoje małako. Dobraja cana. Adviaziem u Afryku. Dziciačaje charčavańnie zrobim», — skazaŭ Łukašenka.
Treba dumać, hetyja vialikija składskija zapasy vyrablenaha ŭ Biełarusi masła nie ŭ apošniuju čarhu paŭpłyvali na toje, što na rasijski rynak jano pajšło pa źnižanych cenach.
Ciapier čytajuć
Mikoła Statkievič pavinšavaŭ biełarusaŭ z Dniom Voli, zapisaŭšy pieršaje VIDEA paśla vyzvaleńnia7
Kamientary