«Nie mahu skazać, što atrymajecca». Tramp chvalić pieramovy Uitkafa ŭ Kramli, ale nie ŭpeŭnieny ŭ ich pośpiechu

Miarkujučy pa zajavach aficyjnych asob, paśla piacihadzinnych pieramoŭ u Kramli, jakich-niebudź istotnych damoŭlenaściej ab zakančeńni vajny va Ukrainie dasiahnuć nie ŭdałosia. Z amierykanskaha boku ŭ kansultacyjach prymali ŭdzieł śpiecyjalny pradstaŭnik prezidenta ZŠA Styvien Uitkaf i ziać Trampa Džared Kušnier; z rasijskaha (akramia Pucina) — pamočnik prezidenta Juryj Ušakoŭ i kiraŭnik Rasijskaha fondu pramych inviestycyj Kirył Dźmitryjeŭ.

Paśla sustrečy Ušakoŭ paviedamiŭ žurnalistam, što baki nie dasiahnuli kampramisu pa najvažniejšym dla Maskvy terytaryjalnym pytańni. Rasija nastojvaje na pryznańni anieksii akupavanych ukrainskich abłaściej i patrabuje vyvadu padraździaleńniaŭ USU z Danieckaj vobłaści, ale Ukraina ličyć heta nieprymalnym.

Radnik prezidenta Rasii taksama adznačyŭ, što baki vyrašyli trymać usie padrabiaznaści pieramoŭ u sakrecie.

Uitkaf i Kušnier pryvieźli ŭ Maskvu mirny płan, raspracavany ZŠA na asnovie rasijskich prapanoŭ, a zatym vidaźmienieny padčas pieramoŭ z delehacyjami Ukrainy i Jeŭropy ŭ Ženievie i na Fłarydzie.

Pa danych ŚMI, pieršapačatkovy płan z 28 punktaŭ u mnohim adlustroŭvaŭ pazicyju Rasii, u tym liku mierkavaŭ vyvad ukrainskich vojskaŭ z Danieckaj vobłaści, abmiežavańnie kolkaści USU, admovu Kijeva ad ustupleńnia ŭ NATA i amnistyju za zroblenyja padčas vajny złačynstvy. Adnak zatym płan byŭ značna vidaźmienieny, jaho ciapierašniaja viersija nie apublikujecca. Pradstaŭniki Ukrainy nazyvali jaho značna bolš prymalnym.

U sieradu Trampa spytali ab vynikach pieramoŭ Uitkafa i Kušniera.

«Nie viedaju, što robić Kreml. Mahu vam skazać, što ŭ ich była dastatkova niadrennaja sustreča z prezidentam Pucinym. Daviedajemsia», — adkazaŭ prezident ZŠA. «Nie mahu vam skazać, što vyjdzie z hetaj sustrečy, tamu što, viedajecie, dla tanha patrebny dvoje. Ukraina», — dadaŭ jon.

Pry hetym Tramp zajaviŭ, što va Uitkafa i Kušniera skłałasia ŭražańnie, što Pucin «choča skončyć vajnu», ale pakul niezrazumieła, ci adbudziecca heta. «Ja dumaju, što [Pucin] choča viarnucca da bolš narmalnaha žyćcia. Ja dumaju, što jon chacieŭ by handlavać z ZŠA, ščyra kažučy, zamiest taho, kab hublać kožny tydzień tysiačy vajskoŭcaŭ», — zajaviŭ pry hetym Tramp.

Za apošnija miesiacy prezident ZŠA nieadnarazova vykazvaŭ upeŭnienaść u žadańni Pucina skončyć vajnu, choć rasijski prezident pastajanna kaža pra namier praciahvać vajavać, pakul nie buduć vykananyja pieršapačatkovyja mety taho, što ŭ Rasii nazyvajuć «śpiecyjalnaj vajennaj apieracyjaj».

Ukrainskaja delehacyja znoŭ lacić u Majami

Bieły dom u sieradu paviedamiŭ, što Uitkaf i Kušnier raskazali Trampu i pradstaŭnikam Ukrainy ab vynikach pieramoŭ u Maskvie.

Adnak ministr zamiežnych spraŭ Ukrainy Andrej Sibiha zajaviŭ «Ukrainskaj praŭdzie», što Vašynhton nie raskryŭ usich detalaŭ razmovy ŭ Kramli ź mierkavańniaŭ biaśpieki.

«Byŭ kantakt kiraŭnika ŭkrainskaj delehacyi [heta značyć Rustema Umierova] sa Styvam Uitkafam. Ale pakolki heta byŭ telefonny kantakt, to ź mierkavańniaŭ biaśpieki ciažka było b pradstavić abmierkavańni detalaŭ hetaj sustrečy, pakolki heta adčuvalny praces», — cytuje Sibihu «Ukrainskaja praŭda».

Dva jeŭrapiejskija ministry, jakija ŭ sieradu brali ŭdzieł u sustrečy kiraŭnikoŭ MZS NATA ŭ Brusieli, paviedamili hetamu vydańniu, što «ni jany, ni jeŭrapiejskija lidary taksama nie atrymali detalovuju infarmacyju ab pieramovach u Maskvie».

Adrazu niekalki zachodnich ŚMI, u tym liku ahienctva Associated Press i AFP, a taksama hazieta New York Post, paviedamlajuć, što Umieraŭ adpravicca ŭ Majami na sustreču z Uitkofam užo ŭ čaćvier, 4 śniežnia.

«Amierykanskija čynoŭniki zaprasili [kiraŭnika Rady nacyjanalnaj biaśpieki i abarony Ukrainy] Umierava ŭ Fłarydu dla pieramoŭ paśla taho, jak ich sustreča z Pucinym u Kramli ŭ aŭtorak nie pryviała da pahadnieńnia», — piša New York Post. Surazmoŭca vydańnia paviedamiŭ, što «Umieraŭ pryniaŭ zaprašeńnie».

«Uitkaf i Kušnier raskažuć ab apošnich patrabavańniach Rasii, jakija abmiarkoŭvalisia padčas piacihadzinnaj sustrečy ŭ Maskvie, i pasprabujuć dasiahnuć prahresu, kab zaklučyć ździełku i skončyć vajnu», — skazana ŭ publikacyi.

Uładzimir Zialenski ŭ svaim viečarovym zvarocie paćvierdziŭ «padrychtoŭku sustrečy ŭ Złučanych Štatach» z udziełam Umierava, ale nie ŭdakładniŭ miesca i čas jaje praviadzieńnia.

«Čakajem navin u bližejšyja dni ad takich sustrečach, kantaktach, pieramovach, — skazaŭ pry hetym Zialenski. — Usio zaraz adbyvajecca dosyć vynikova — na sustrečach u Ženievie i ŭ Fłarydzie Ukrainu čuli i da Ukrainy prysłuchalisia. I heta važna. Raźličvajem, što i dalej budzie mienavita tak. Tolki z ulikam intaresaŭ Ukrainy mahčymy hodny mir».

Paźniej pasoł Ukrainy ŭ ZŠA Volha Stefanišyna paćvierdziła, što Umieraŭ sapraŭdy adpravicca ŭ ZŠA ŭ čaćvier.

«Rustem Umieraŭ — kiraŭnik delehacyi, u jakoha niama inšaj pracy, akramia viadzieńnia pieramoŭ z amierykanskimi i jeŭrapiejskimi sajuźnikami, — pryziamlicca ŭ ZŠA ŭžo zaŭtra, kab pravieści paŭtornuju sustreču z delehacyjaj. Tolki paśla hetaha možam rabić niejkija vysnovy», — skazała Stefanišyna ŭkrainskamu hramadskamu viaščalniku «Suśpilnie».

• 0
• 0
• 0
• 0
• 0
• 0
• 0
• 0