Zasnavalnica biełaruskaj IT-kampanii atrymała strašennyja traŭmy na harnałyžnym kurorcie ŭ Hruzii
Natalla Michnaviec sutyknułasia ź inšym łyžnikam, i praz vysokuju chutkaść paškodžańni akazalisia amal fatalnymi.
Niaščaście z CEO i zasnavalnicaj technałahičnaha praduktu AINA Tech Natallaj Michnaviec zdaryłasia 8 studzienia na hruzinskim harnałyžnym kurorcie Hudaury.
Padčas spusku na trasie Natalla sutyknułasia ź inšym łyžnikam.
Chutkaść była vielmi vysokaja — nastolki, što cieła straciła kantrol nad trajektoryjaj, a ŭdar adkinuŭ jaje za miežy trasy ŭ draŭlanuju aharodžu, praź jakuju Natalla ŭpała na kamiani.
Traŭmy zakranuli ŭsio cieła: tvar, chrybietnik i kaniečnaści.
U vyniku avaryi Natalla atrymała nadzvyčaj ciažkija, množnyja traŭmy: adkryty padviertelny pierałom pravaj ściahnavoj kostki, pierałom ruki sa zrušeńniem, pierałom chrybietnika, množnyja ciažkija pierałomy tvaru (vierchniaj i nižniaj skivicy, skułavaj kostki, nosa, vačnicy), strasieńnie mozhu, vybityja amal usie zuby i skrazny razryŭ ščaki. Usio heta supravadžałasia masiŭnaj strataj kryvi.
Vosiem hadzin Natalla zastavałasia ŭ prytomnaści. Jana doŭhi čas lažała adna na śniezie, ź nievynosnym bolem i praciahłaj strataj kryvi.
Paźniej daktary kazali, što ryzyka śmierci ad bolevaha šoku była nadzvyčaj vysokaj.
Nie było ŭpeŭnienaści, što Natalla dažyvie da pryjezdu reanimacyi — mašynu čakali kala 5 hadzin.
Kali ratavalniki ŭsio ž prybyli, jany vahalisia, ci varta terminova vieźci jaje ŭ balnicu, zadajučy pytańni pra strachoŭku i apłatu. Tolki bližej da apoŭnačy Natallu dastavili ŭ špital.
U Hruzii Natalla praviała 9 dzion u reanimacyi. Daktary zmahalisia za jaje žyćcio, stabilizavali stan i pravodzili ekstrannyja apieracyi na nazie i ruce.
Znachodziačysia ŭ reanimacyi, Natalla zaraziłasia multyrezistentnymi špitalnymi bakteryjami — infiekcyjaj, ustojlivaj da bolšaści antybijotykaŭ.
Heta zaražeńnie rezka ŭskładniła lačeńnie, zapavoliła hajeńnie i značna pavialičyła ryzyki.
Praz šmatlikija i nadzvyčaj składanyja traŭmy tvaru było pryniata rašeńnie šukać kliniku ŭ Hiermanii.
U Hiermaniju Natallu evakujavali na pryvatnym miedycynskim samalocie, abstalavanym dla pieravozki pacyjentaŭ u ciažkim stanie.
Užo ŭ Hiermanii daktary praviali vaśmihadzinnuju nadzvyčaj składanuju apieracyju na tvary, faktyčna źbirajučy jaho nanova. Ciapier Natalla znachodzicca i budzie znachodzicca bližejšy miesiac u klinicy Bierlina Unfallkrankenhaus Berlin Rettungsstelle.
Jaje čakajuć jašče niekalki apieracyj.
Siabry Natalli źbirajuć hrošy na dapamohu joj. Dla hetaha stvaryli sajt ź jaje historyjaj i rekvizitami.
Ciapier čytajuć
Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?4
Kamientary