Amierykanskaja palicyja paluje na padpałkoŭnika biełaruskaj milicyi, jaki staŭ centralnaj fihuraj u kryminalnaj bandzie
Jašče ŭ 2017‑m padpałkoŭnik Ivan Biaźludaŭ byŭ staršym opierupaŭnavažanym pa asabliva važnych daručeńniach HUUS Minharvykankama i rasśledavaŭ kvaternyja kradziažy, a ŭ 2021 staŭ udzielnikam «samaj vialikaj u historyi Kałarada» schiemy pa zbytu skradzienaha. Ivan nie staŭ na šlach vypraŭleńnia i ciapier znoŭ u vyšuku.
U čaćvier, 20 listapada, Departamient palicyi Viestminstera (štat Kałarada, ZŠA) paviedamiŭ pra abłavu na łambard Aurora Gold Buyer.
Pavodle palicyi, rejd źviazany z rasśledavańniem spravy ab šmatlikich kradziažach i rabavańniach u akolicy. Pieravažna ciarpieli roźničnyja rytejlery. Suma skradzienaha aceńvajecca ŭ bolš čym miljon dalaraŭ.
Pavodle palicyi, złačyncy realizoŭvali skradzienaje praz zhadany łambard prynamsi z 2023 hoda, u im znajšli sotni skradzienych, ale jašče nie pradadzienych pazicyj.
Paviedamlajecca, što na miescy byŭ zatrymany adzin z supracoŭnikaŭ łambarda, Siarhiej Nikałajeŭ. Jamu adrazu ž vystavili abvinavačvańnie ŭ admyvańni hrošaj, kradziažy i parušeńni zakona ab dziejnaści łambardaŭ.
Taksama aryštavany niechta Stanisłaŭ Anisimaŭ. Inšyja ŭdzielniki schiemy abvieščanyja ŭ vyšuk, palicyja zaklikaje amierykancaŭ paviedamlać, kali jany niešta viedajuć ab znachodžańni asobaŭ, siarod jakich vidavočna jość i biełarusy: prynamsi Dzianis Artyushkevich i Ivan Biazliudau.
Admietnaść historyi nadaje fakt, što Ivan Biaźludaŭ — heta adstaŭny padpałkoŭnik biełaruskaj milicyi.
Stanam na 2017 hod Biaźludaŭ słužyŭ staršym opierupaŭnavažanym pa asabliva važnych spravach HUUS Minharvykankama. Jon rasśledavaŭ kvaternyja kradziažy.
Biaźludaŭ vyjechaŭ ź Biełarusi nie paźniej za 2019 hod paśla asabistaj trahiedyi: ad nievylečnaj chvaroby pamierła jaho dačka. Tady jon razam z žonkaj vyrašyŭ pačać novaje žyćcio ŭ inšym miescy i emihravaŭ u Štaty.
Taksama admietna, što heta ŭžo nie pieršaja kryminalnaja pryhoda biełaruskaha adstaŭnika ŭ ZŠA.
U lipieni 2021 hoda miascovaja palicyja arhanizavała pres-kanfierencyju z nahody raskryćcia «adnoj z najbolšych schiem pa admyvańni hrošaj u Kałarada». Siarod udzielnikaŭ schiemy byŭ Biaźludaŭ.
Złačyncy zbyvali skradzienaje praź internet, paviedamlałasia, što arhanizacyja kradziažoŭ i zbytu pačałasia z 2019 hoda, a ahulnaja suma škody skłała $5,2 miljona.
Imiony padazravanych, jakim vystavili ahułam 78 abvinavačańniaŭ, pisalisia tak: Dziyana Altshuler, Ilona Nastas, Grigore Tataru, Evgeny Shadrin, Ivan Biazliudau, Dzianis Artyushkevich, Dmitry Altshuler.
Imavierna, paśla adbyvańnia pakarańnia Biaźludaŭ ź niekatorymi starymi padzielnikami znoŭ uziaŭsia za staroje.
Ciapier čytajuć
Salihorsk pračnuŭsia ŭ ružovym tumanie. Što heta było?1
Kamientary