Apublikavana šakujučaja prasłuchoŭka pieramoŭ śpiecpradstaŭnika Trampa i pamočnikaŭ Pucina. Što tam?

Mirnyja pieramovy pamiž ZŠA i Rasijaj pa spynieńni vajny va Ukrainie apynulisia ŭ centry palityčnaha skandału paśla taho, jak ahienctva Bloomberg apublikavała rasšyfroŭki telefonnych razmoŭ, jakija nibyta adbylisia ŭ kastryčniku 2025 hoda pamiž śpiecpradstaŭnikom prezidenta ZŠA Styvam Uitkafam i vysokapastaŭlenymi rasijskimi čynoŭnikami.

Rasšyfroŭki, sapraŭdnaść jakich pakul nie paćvierdžana, ale amal nie vyklikaje sumnievu, śviedčać, što pieršapačatkovaja viersija «płana Trampa» była raspracavana ŭ Kramli.

Bloomberg apublikavaŭ detali dźviuch razmoŭ z udziełam pamočnika Pucina Juryja Ušakova: adna — sa śpiecpradstaŭnikom Trampa Styvam Uitkafam, druhaja — sa śpiecpradstaŭnikom Pucina Kiryłam Dźmitryjevym.

Z taho, što ŭ abiedźviuch razmovach fihuruje Ušakoŭ, možna mierkavać, što mienavita jahony telefon prasłuchoŭvali.

Uitkaf jak kansultant Kramla

Asablivuju ŭvahu pryciahnuła razmova, jakaja, jak śćviardžajecca, adbyłasia 14 kastryčnika pamiž Styvam Uitkafam i pamočnikam Uładzimira Pucina Juryjem Ušakovym. U joj Uitkaf aktyŭna kansultavaŭ rasijski bok, jak najlepš prezientavać Trampu mirnaje pahadnieńnie.

Amierykanski pasrednik paraiŭ Pucinu patelefanavać Trampu pierad vizitam ukrainskaha prezidenta Uładzimira Zialenskaha i vykarystać «pravilnuju tanalnaść»:

«Ja b patelefanavaŭ, kab prosta nahadać, što vy vinšujecie prezidenta z hetym dasiahnieńniem [pa Hazie], što vy jaho padtrymlivali, što vy pavažajecie jaho jak čałavieka miru i što vy rady vynikam jaho pracy. Voś ja b tak padyšoŭ da hetaha», — nibyta zajaviŭ Uitkaf.

Akramia taho, Uitkaf zapeŭniŭ Ušakova ŭ svajoj asabistaj pavazie da rasijskaha lidara: «Ja prosta chaču, kab ty skazaŭ — moža być, kab ty skazaŭ heta prezidentu Pucinu, tamu što ty viedaješ, ja hłyboka pavažaju prezidenta Pucina».

Druhaja rasšyfroŭka — razmova pamiž Ušakovym i śpiecpradstaŭnikom Pucina Kiryłam Dźmitryjevym 29 kastryčnika, paćviardžaje zaściarohi nakont pachodžańnia płana.

Dźmitryjeŭ prapanavaŭ nieaficyjna pieradać rasijski čarnavik mirnaha pahadnieńnia, kab Uitkaf moh vydać jaho za svoj.

Pry hetym Ušakoŭ vykazaŭ aściarohu, što Vašynhton moža skarystacca situacyjaj, «pierajnačyć» rasijski płan i abviaścić jaho ŭzhodnienym z Maskvoj.

Dźmitryjeŭ, u svaju čarhu, zapeŭniŭ, što paprosić Uitkafa zachavać usio «słova ŭ słova» i što ŭsio budzie «zroblena akuratnieńka».

Reakcyja i nastupstvy

Publikacyja, jakuju Dźmitryjeŭ užo nazvaŭ «fejkam», pahłyblaje niedavier pamiž Maskvoj i Vašynhtonam.

Prezident Tramp, adnak, abaraniŭ Uitkafa, nazvaŭšy jaho dziejańni «standartnaj formaj pieramovaŭ»: «Jon pavinien pradać [idei] Ukrainy Rasii. Heta toje, što robić pierahavorščyk. Jon pavinien skazać: hladzicie, jany chočuć heta, a vy pavinny pierakanać ich u tym — heta całkam standartnaja forma pieramovaŭ», — patłumačyŭ Tramp.

Juryj Ušakoŭ nie staŭ abviarhać sapraŭdnaść apublikavanych hutarak: «Ja z Uitkafam dosyć časta razmaŭlaju, ale sutnaść razmoŭ — jany zakryty charaktar nosiać — ja nie kamientuju. Dy nichto nie pavinien kamientavać<…> Chtości źlivaje, chtości prasłuchoŭvaje. Ale nie my».

Analityki ličać, što publikacyja značna ŭskładniaje zapłanavanuju na nastupny tydzień misiju Uitkafa ŭ Maskvu.

Vydańnie Bloomberg nie ŭdakładniła, adkul atrymała zapisy hutarak.

• 3
• 1
• 26
• 29
• 1
• 0
• 17
• 0