«Skazali: adjedźcie ad kałonki i padychodźcie». Što ciapier robicca na AZS?

«Skazali: adjedźcie ad kałonki i padychodźcie»

Čytačka raskazała, što na ŭłasnym prykładzie daviedałasia, nakolki pryncypovymi byvajuć supracoŭniki AZS.

— Naohuł, ja nikoli nie čakaju chot-dohi i nie rablu harbatu, pakul maja mašyna staić kala kałonki. Zvyčajna ja ŭsio prabivaju ŭ adzin ček, potym vychodžu, adhaniaju aŭtamabil, zatym viartajusia pa ježu i napoi, — zapeŭnivaje dziaŭčyna. — Ale ŭ hety raz ja była z mamaj, u mianie byŭ płan usio apłacić, samoj pajści adhaniać mašynu, a mamu pakinuć kala kasy, kab jana zabrała našu zamovu.

Zrazumieła, usio pajšło trochi nie tak, jak było zadumana.

— Zapraŭka była pustaja, byŭ viečar, a my byli stomlenyja. Karaciej kažučy, ja trochi zavaziłasia na kasie. My z mamaj abmierkavali, chto što biare, ja nazvała nieabchodnaje mnie paliva, potym stała pieraličvać, što jašče nam treba z tavaraŭ. U kancy dadała, što zaraz znajdu kartku zapraŭki. I voś tut kasir mianie abarvaŭ, skazaŭ, maŭlaŭ, jon prabje mnie paliva, a zatym ja pavinna adahnać mašynu i viarnucca, — raskazvaje čytačka. — Pryčym jon tak heta skazaŭ, što ja ŭ momancie vyrašyła, što, napeŭna, chtości ŭžo paśpieŭ ustać za mnoj u čarhu i pradaviec z-za hetaha pieražyvaje. Chutka kinuła mamie: «Tady ty ŭsio zakažy i vychodź» — i pabiehła adhaniać mašynu. I voś ja vybiahaju, i pierad mnoj nastupnaja karcina. Kali što, adzinaja mašyna na ŭsioj zapraŭcy — maja.

Jak nikoha nie było na zapraŭcy, kali my pryjazdžali, tak nikoha tam nie było i tady, kali ja vybiehła da mašyny, kab nie stvarać čarhu. Mianie hetaja situacyja tak ździviła, što, kali mama vyjšła, ja navat pierapytała, ci čuła jana maju razmovu z kasiram — ja ŭžo padumała, što, moža być, niešta nie tak zrazumieła ci mnie naohuł zdałosia. Ale mama ŭsio paćvierdziła. Ja nie abvinavačvaju kasira: my i praŭda zamieškalisia, usio abmiarkoŭvajučy, potym jašče i heta kartka zapraŭki. Ale ž AZS była pustaja, da taho ž heta zaharadnaja zapraŭka, dzie čerhaŭ ja naohuł nikoli nie bačyła, — dzivicca surazmoŭca.

Praviły stali bolš strohimi

Vidavočna, što paśla takoj pilnaj uvahi da temy praviły pavodzin na AZS stali bolš strohimi ci, pa mienšaj miery, da ich zachavańnia stali bolš stroha stavicca.

Pry hetym praviedzieny DAI rejd nie vyjaviŭ maštabnych prablem na zapraŭkach.

— Nam dadatkova niejkija nieardynarnyja albo jakija-niebudź inšyja miery pryciahnieńnia da adkaznaści datyčna čerhaŭ nie spatrebiłasia ŭžyvać. Kali rejdavyja hrupy naviedvali AZS, usie apieratary viedali, jak pracavać, — raskazvaŭ načalnik hałoŭnaha ŭpraŭleńnia DAI MUS Viktar Rotčankaŭ. — Sapraŭdy, mnohimi apieratarami zapravačnych stancyj byli vyviedzieny dadatkovyja rabotniki AZS, jakija raździalili patoki. Nie było nazapašvańniaŭ čerhaŭ. I aŭtaamatary, jakija, mahčyma, kaliści pamylilisia, zrazumieli svaju pamyłku i bolšaha jaje nie dapuskali. Tak, u ŚMI pakazvałasia, što DAI dzieści kahości pryciahnuła, ale heta byli adzinkavyja parušeńni. Chtości, nie majučy v/p, pryjechaŭ na AZS. Było navat niekalki vypadkaŭ, nam padkazvali apieratary pra toje, što ŭ stanie apjanieńnia vadzicieli padjechali na AZS. I šerah inšych parušeńniaŭ, jakija byli prosta spadarožnymi. Ale parušeńniaŭ albo nieardynarnych pavodzin z boku karystalnikaŭ AZS my sapraŭdy nie adznačyli.

A na dniach kancern «Biełnaftachim» prainfarmavaŭ ab praviadzieńni rabočaj sustrečy z udziełam Viktara Rotčankava i arhanizacyj naftapraduktazabieśpiačeńnia.

— Udzielnikami rabočaj sustrečy adznačana efiektyŭnaść sumiesnaj pracy pa minimizacyi čerhaŭ na AZS, u tym liku pry zapraŭcy aŭtatranspartu i kala raźlikovych kas apierataraŭ pry apłacie za aŭtamabilnaje paliva i nabyvajemyja spadarožnyja tavary i pasłuhi hramadskaha charčavańnia, — adznačana ŭ paviedamleńni.

Śpiecyjalisty pryjšli da vysnovy, što isnujučyja schiemy arhanizacyi darožnaha ruchu na AZS nieabchodna aktualizavać z ulikam rekamiendacyj DAI. Akramia taho, nieabchodna praciahnuć pracu pa ŭdaskanaleńni sistemy absłuhoŭvańnia roznych hrup pakupnikoŭ na AZS pa ŭsich napramkach.

Kancern «Biełnaftachim» pačnie padrychtoŭku prapanoŭ pa ŭniasieńni źmianieńniaŭ u Praviły darožnaha ruchu, nakiravanych na ŭdaskanaleńnie paradku zapraŭki aŭtatranspartnych srodkaŭ na AZS.

• 0
• 0
• 2
• 7
• 0
• 0
• 0
• 0