«Akulonak tu-ru-ru-ru». Jak z 90‑siekundnaha dziciačaha rolika vyras 400‑miljonny biznes

Videarolik, jaki sabraŭ bolš za 16 miljardaŭ prahladaŭ, staŭ nie tolki suśvietnym fienomienam, ale i samym papularnym videa na YouTube. Hetym rolikam była nievierahodna naviaźlivaja piesieńka Baby Shark, Akulonka.

Jana nie tolki zavajoŭvała małyšoŭ i teraryzavała darosłych pa ŭsim śviecie, ale i zakłała asnovu dla pieratvareńnia kampanii jaje stvaralnika, Pinkfong, u miedyjabiznes koštam u sotni miljonaŭ dalaraŭ.

«My nie čakali, što jana budzie čymści vyłučacca siarod astatniaha našaha kantentu», — pryznaŭsia Kim Min-sok, hienieralny dyrektar Pinkfong, u intervju Bi-bi-si z hałoŭnaha ofisa kampanii ŭ Sieule.

«Ale, azirajučysia nazad, heta byŭ pierałomny momant, jaki adkryŭ nam darohu na suśvietny rynak».

U aŭtorak hetaja daroha pryviała Pinkfong na paŭdniovakarejski fondavy rynak, dzie ŭ pieršy ž dzień tarhoŭ akcyi kampanii vyraśli bolš čym na 9%, a jaje acenačny košt pieravysiŭ 400 młn dalaraŭ.

«My na zarobak navat nie raźličvali»

Kampanija Pinkfong źjaviłasia ŭ 2010 hodzie pad nazvaj SmartStudy i zajmałasia stvareńniem ličbavaha kantentu dla dziaciej małodšych za 12 hadoŭ.

Pinkfong pieražyła niekalki surjoznych transfarmacyj i ŭ niejki momant vyrašyła sfakusavacca na kantencie dla samych maleńkich.

Štat kampanii pavialičyŭsia da 100 čałaviek, i pryjarytetam staŭ bolš prosty, navučalny kantent i hulni.

«I mienavita tady źjaviŭsia Akulonak», — kaža Kim.

Z 2022 hoda firma nosić imia The Pinkfong Company — u honar viasiołaha i cikaŭnaha lisianiaci ź jaje rańnich multfilmaŭ. Siońnia ŭ štacie kampanii ŭžo kala 340 supracoŭnikaŭ, i jaje ofisy raźmieščany ŭ Tokia, Šanchai i Łos-Andželesie.

Tryumf Akulonka

Ličycca, što piesieńka Akulonka źjaviłasia ŭ ZŠA ŭ 1970‑ch i była papularnaja ŭ dziciačych łahierach.

Pa słovach miedyjaanalityka Kievina Ču z Technałahičnaha ŭniviersiteta Nańjan, pieśnia, u jakoj paŭtarajecca fraza «Akulonak tu-ru-ru-ru», padabajecca dzieciam, ale moža razdražniać darosłych.

Kim Min-sok vydatna viedaje, nakolki pryviaźlivaja heta piesieńka.

«Jana jak K-pop: vielmi dynamičnaja, rytmičnaja i zaraźlivaja», — skazaŭ jon, dadaŭšy, što matyŭ blizki da skandziravańnia abo rytmičnaha śpievu, dziakujučy čamu jaje lohka zapaminajuć dzieci.

Tym nie mienš chitom jana stała nie adrazu. Papularnaść da «Akulonka» pryjšła, kali taniec pad jaho pačali pakazvać na dziciačych śviatach u Paŭdniova-Uschodniaj Azii. Videaroliki ź dziećmi i darosłymi, jakija tancujuć pad piesieńku Akulonka, pačali raspaŭsiudžvacca ŭ internecie, i jana stała virusnaj.

Pa słovach Kima, kali kamanda nazirała za imklivym rostam kolkaści prahladaŭ, u ofisie Pinkfong «panavała atmaśfiera śviata».

U listapadzie 2020‑ha «Akulonak» aficyjna staŭ samym prahladanym videarolikam na YouTube. Kim Min-sok kaža, što ŭ pieršyja hady paśla reliza jon zabiaśpiečvaŭ kala pałovy dachodaŭ kampanii i daŭ start novaj liniejcy kantentu i tavaraŭ.

U 2019‑m Pinkfong sutyknułasia z sudovaj pazovaj: jaje abvinavacili ŭ płahijacie raboty amierykanskaha kampazitara.

Adnak Viarchoŭny sud Paŭdniovaj Karei adchiliŭ pazoŭ, pryniaŭšy arhumient kampanii pra toje, što jaje viersija pieśni była stvoranaja na asnovie narodnaj miełodyi, jakaja źjaŭlajecca hramadskim zdabytkam.

Pa słovach Kim Min-soka, hetaja pieramoha stała mahutnym stymułam napiaredadni vychadu Pinkfong na biržu. Jon dadaŭ, što zajaŭku na vypusk akcyj padali jašče da abviaščeńnia vierdyktu.

Niepaŭtorny pośpiech?

Pa słovach vykładčyka biznes-škoły Karejskaha ŭniviersiteta Min Džon Kim, inšyja franšyzy Pinkfong, nakštałt multfilmaŭ Bebefinn i Sealook, imkliva rastuć, ale kampanija pavinna dakazać, što jaje pośpiech trymajecca nie tolki na piesieńcy Akulonka.

Plus u tym, što hałoŭnaja metavaja aŭdytoryja Pinkfong — heta maleńkija dzieci, i jany lubiać pierahladać adno i toje ž znoŭ i znoŭ, ličyć ekśpiert.

Kim Min-sok nastojvaje, što jaho biznes moža raści nie tolki za košt Akulonka, jaki ŭ ciapierašni čas prynosić kala čverci dachodaŭ Pinkfong: multfilm Bebefinn miž tym vyrvaŭsia napierad i hienieruje prykładna 40% vyručki.

Adzin z baćkoŭ pryznaŭsia Bi-bi-si, što ŭ ich siamji da rolikaŭ Pinkfong staviacca nieadnaznačna.

Baćka dvaich dziaciej Salim Našef skazaŭ, što šanuje adukacyjnyja jakaści kantentu kampanii, ale jaho žonka ličyć, što «Akulonak» zanadta pieraŭzbudžaje dziaciej».

Tym nie mienš im nie ŭdałosia schavacca ad virusnaha videa i svoj treci dzień naradžeńnia jaho dačka budzie adznačać u styli «Akulonka».

Prafiesar Kim ličyć, što pakul niezrazumieła, ci zdoleje Pinkfong prydumać hierojaŭ, zdolnych paŭtaryć kamiercyjny pośpiech maleńkaj akuły.

Kim Min-sok kaža, što ŭ svoj pieršy vychad na fondavy rynak kampanija pryciahnuła amal 52 młn dalaraŭ i płanuje vykarystoŭvać hetyja srodki dla pašyreńnia liniejki filmaŭ i piersanažaŭ.

Akramia taho, Pinkfong imkniecca stać vysokatechnałahičnym stvaralnikam kantentu i płanuje abapiracca na analityku prahladaŭ i inšyja danyja pry stvareńni novych prajektaŭ.

Pa słovach Kim Min-sok, kampanija ŭžo damahłasia «taho, pra što marać mnohija stvaralniki».

Adnak ciapier Pinkfong pavinna pierakanać inviestaraŭ, što jaje pośpiech nie abmiažoŭvajecca adnym virusnym rolikam.

• 0
• 0
• 1
• 3
• 0
• 0
• 0
• 0