Łukašenka zajaviŭ, što «Buravieśnik» nam niepatrebny. MZS Rasii jamu adkazaŭ
Alaksandr Łukašenka niadaŭna skazaŭ, što «Arešnik» u Biełarusi chaj budzie, ale «Buravieśnik» ci «Pasiejdon» nam biez patreby — «Što my, na Naračy budziem «Pasiejdon» zapuskać?» U MZS Rasii jamu adkazali: možam pastavić u Biełaruś lubuju zbroju, jakuju paličym nieabchodnaj.
Pra rasijski jadzierny ščyt, jaki «nadziejna prykryvaje našych biełaruskich sajuźnikaŭ», rasijskamu dziaržaŭnamu TASS daručyli raskazać kiraŭniku druhoha departamienta krain SND Alaksieju Pališčuku.
«Rasijski jadzierny ščyt nadziejna prykryvaje našych biełaruskich sajuźnikaŭ,
a abnoŭlenaja dahavorna-pravavaja baza daje mahčymaść raźmiaščeńnia ŭ brackaj Respublicy lubych srodkaŭ abarony, uklučajučy ŭsie najnoŭšyja typy ŭzbrajeńnia», — pastaviŭ kropku Pališčuk.
Niahledziačy na niadaŭniuju adnaznačnuju zajavu Łukašenki, što «Buravieśnik» u Biełarusi niepatrebny, karespandent jakraz spytaŭ pradstaŭnika MZS RF pra toje, ci «mahčymyja pastaŭki ŭ Biełaruś kryłataj rakiety nieabmiežavanaj dalokaści ź jadziernym ruchavikom «Buravieśnik».
«Nam nieviadoma ab zvarotach takoha rodu», — adkazaŭ Pališčuk, nijak nie zhadaŭšy zajavu Łukašenki suprać takich pastavak.
Kiraŭnik departamienta MUS RF skazaŭ, što ŭ vypadku pastupleńnia takich zvarotaŭ «jany buduć samym uvažlivym čynam vyvučany vajennymi śpiecyjalistami». «Vynikovaje rašeńnie budzie prymacca vajenna-palityčnym kiraŭnictvam dźviuch krain u duchu sajuźnictva», — skazaŭ dypłamat.
Kiraŭnik departamienta MUS RF zajaviŭ, što «ŭ apošnija hady jakasna ŭmacavałasia adpaviednaja dahavorna-pravavaja baza Sajuznaj dziaržavy».
Jon nahadaŭ, što «ŭ śniežni 2024 hoda Vyšejšy Dziaržsaviet zaćvierdziŭ Kancepcyju biaśpieki, a prezidenty dźviuch krain padpisali miždziaržaŭny dahavor ab harantyjach biaśpieki, jaki ŭstupiŭ u siłu ŭ sakaviku biahučaha hoda».
«U im zafiksavany pieralik uzajemnych abaviazacielstvaŭ pa abaronie, abaronie suvierenitetu, niezaležnaści i kanstytucyjnaha ładu Rasii i Biełarusi, cełasnaści i niedatykalnaści terytoryi i źniešniaj miažy Sajuznaj dziaržavy», — skazaŭ dypłamat.
Pavodle jaho słoŭ, «dla hetaha mohuć zadziejničać usie najaŭnyja siły i srodki, uklučajučy jadziernuju zbroju ŭ adpaviednaści z Asnovami dziaržaŭnaj palityki Rasijskaj Fiederacyi ŭ halinie jadziernaha strymlivańnia».
«U dahavory prapisany harantyi nieadkładnaha pradastaŭleńnia pa ŭzhadnieńni kiraŭnikami Rasii i Biełarusi vajennaj, vajenna-techničnaj i inšaj dapamohi paśla aficyjnaha zvarotu boku, jaki padvierhnuŭsia ahresii abo pahrozie ahresii», — dadaŭ Pališčuk.
Pališčuk paćvierdziŭ, što «pa damoŭlenaści prezidentaŭ da kanca hoda čakajecca raźmiaščeńnie na terytoryi Biełarusi — u dadatak da rasijskaj niestratehičnaj jadziernaj zbroi — rakietnych kompleksaŭ «Arešnik».
«Takoha ŭ śviecie niama». Pucin abviaściŭ pra vyprabavańni padvodnaha aparata «Pasiejdon» ź jadziernaj ustanoŭkaj
Pucin pachvaliŭsia vyprabavańniami rakiety «ź nieabmiežavanaj dalokaściu»
Tramp adkazaŭ Pucinu na vychvalańnie rakietaj «Buravieśnik»
«Arešnik» nam patrebny, a «Pasiejdon» i «Buravieśnik» — nie. Łukašenka — pra zadačy dla VPK
Kamientary
[Zredahavana]
Jašče adno uskosnaje padćvierdžańnie što ni Łu tut haspadar, jen tut paprostu pryznačany, ci jašče praściej - na utrymańni.