«Zarobak startavaŭ z $440». Biełaruski raskazali, jak pracujuć i zarablajuć na Blizkim Uschodzie
Pieršy raz z Nastaśsiaj žurnalisty vydańnia «Anłajnier» sustrelisia ŭ lifcie hatela, pryčym absalutna vypadkova: jana pavolna chodzić pa terytoryi na kadrach promarolika, a jany nazirajuć za hetym, spuskajučysia na sustreču ŭ łobi. Siem hadoŭ tamu Naścia ŭpieršyniu prylacieła ŭ Katar na letniuju padpracoŭku, kab potym viartacca siudy znoŭ i znoŭ.
«Padčas sumoŭja pad stałom siadzieła siastra i adkazvała na anhlijskaj movie»
Rodam dziaŭčyna z Homiela, tam ža vučyłasia va ŭniviersitecie imia Skaryny. Ale adnoj vučoby dziaŭčynie było mała, chaciełasia jak maha chutčej pačać pracavać. Na pajezdku za miažu jaje natchniła siastra, jakaja sama paśpieła papracavać u Emiratach i Katary. Nie spyniŭ navat minimalny ŭzrovień viedańnia anhielskaj movy. Pryčym pracavać Naścia sabrałasia chostes ŭ hateli, dzie znosiny z haściami — asnoŭny abaviazak.
«Kali čahości mocna chočaš, zrobiš heta lubymi šlachami. Kali ja prachodziła intervju, uzrovień anhlijskaj u mianie byŭ minimalny — z razradu «Chau a ju, maj nejm iz Naścia». Tamu padčas anłajn-intervju ŭ mianie pad stałom siadzieła siastra i adkazvała na pytańni, a ja prosta adkryvała rot», — sa śmiecham uspaminaje Nastaśsia.
Płan spracavaŭ: paśla taho samaha pieršaha sumoŭja Naściu zaprasili na pracu. Pryčym spracavaŭ jon kudy maštabniej, čym čakała sama hierainia. U Katar na pracu dziaŭčyna lotała ŭsie hady vučoby, a try hady tamu pierabrałasia siudy «na fuł-tajm», jak havoryć sama Naścia. Pryčym da pieršaj pajezdki biełaruska ničoha nie viedała pra krainu i navat kiepska ŭjaŭlała, dzie jana znachodzicca.
U 2018 hodzie pra Katar sapraŭdy havaryli značna mienš — usio źmianiŭ čempijanat śvietu pa futbole, jaki prajšoŭ tut u 2022-m. Napiaredadni ŭ Dosie adkryłasia vielizarnaja kolkaść hatelaŭ, handlovych placovak i kulturnych abjektaŭ, a ź imi i značna vyras popyt na zamiežnych rabotnikaŭ.
Na što źviartali ŭvahu pry najmie, akramia anhlijskaj movy? Pa słovach Naści, važnaja prezientabielnaja źniešnaść, ale adbor pry hetym nie nahadvaje madelny kastynh. U astatnim usio standartna: kolki hadoŭ, adkul rodam, jaki dośvied pracy, jakija mety.
«Kali ja ŭžo pryjechała, u hateli byli trochi šakavanyja. Ale šlachu nazad u ich nie było: nie adpraviać ža mianie nazad, kvitok kaštuje doraha. Viadoma, tak rabić nie varta. Mnie pašancavała: ja trapiła ŭ hatel, dzie ŭsie supracoŭniki havaryli pa-rusku. Ale naša mieniedžarka łajała ich, kali jany pierachodzili sa mnoj na ruskuju movu: chacieła, kab ja jak maha chutčej zasvoiła anhlijskuju.
Ja viedała svaju pracu, mahła minimalna niešta adkazać. Ale starałasia paźbiahać haściej, jakim treba było skurpulozna niešta rastłumačyć. I ŭsio adno ŭžo za piać miesiacaŭ ja zmahła vielmi dobra prakačać anhlijskuju. Ja čałaviek kamunikabielny, pačała šmat z kim znajomicca — tak i padciahnuła movu».
Jak nakont umoŭ pracy? Jak raskazvaje Naścia, va ŭsich krainach GCC (sajuz šaści arabskich dziaržaŭ na Aravijskim paŭvostravie: Saudaŭskaj Aravii, AAE, Kuviejta, Katara, Amana i Bachrejna) pryjezdžym supracoŭnikam pryniata davać žyllo i charčavańnie, a taksama apłačvać prajezd.
Zarobak pry hetym tady prapanoŭvali nievialiki — 1600 katarskich ryjałaŭ (kala $440). Ale ŭsiu hetuju sumu možna było adkładać (plus čajavyja), bo bazavyja patreby zakryvała kampanija. Ciapier, jak adznačaje Naścia, zarobki vyraśli i dla startavych pazicyj pačynajucca ad 2500 ryjałaŭ ($690).
«Ja ŭspaminaju toj čas ź vialikim ciapłom. Było vielmi kłasna, takaja škoła žyćcia! Znajomišsia ź vialikaj kolkaściu ludziej, z mnohimi ja maju znosiny da hetaha času».
Toje, jak Naścia ŭjaŭlała svaju pracu, usio ž adroźnivałasia ad realnaści. Mierkavałasia, što jana budzie chostes u restaranie hatela. Ale na miescy vyśvietliłasia, što štat ukamplektavany, i zamiest restarana joj prapanavali pracu ŭ kłubie z zusim inšym hrafikam — da druhoj hadziny nočy. A z zakryćciom źmieny i darohaj da doma vychodziła ŭsie try-čatyry hadziny.
Darečy, u bolšaści hatelaŭ šaścidzionny pracoŭny tydzień. Ale kaho ŭ 21 hod taki hrafik spyniaŭ ad taho, kab žyć svajo lepšaje žyćcio?
«U mianie było adčuvańnie, što ja vyrvałasia na volu. Enierhii šmat. Čatyry hadziny paśpiš — i spakojna možna vychodzić na pracu. Tak što navat z adnym vychadnym času na adpačynak chapała».
Pry hetym Naścia padkreślivaje: Docha siem hadoŭ tamu i ciapier mocna adroźnivajucca. Pa jaje ŭspaminach, na miescy hatela, u jakim jana ciapier razmaŭlaje z žurnalistami, tady ničoha nie było.
Na miescy Łusaiła — cełaha horada, jaki pabudavali śpiecyjalna da čempijanatu śvietu pa futbole 2022 hoda — była pustynia.
Nie było i šykoŭnaha handlova-zabaŭlalnaha centra Vendome Mall, u jakim ciapier 580 kram.
«Dy i miascovyja žychary stali bolš adkrytymi. Źjaŭlajecca bolš hramadskich prastor, restaranaŭ. Viadoma, usio nie tak aktyŭna, jak u Dubai. Tut bolš siamiejny vajb».
Na hetym etapie da razmovy padklučajecca siabroŭka i adnakłaśnica Naści Viktoryja. Jana ŭ Katary pracavała ŭ prodažach, uklučajučy kramy luksavych brendaŭ. I ź jaje słoŭ, ciažkaściaŭ było niamała. Sam zarobak nikoli nie zatrymlivali, bo heta parušeńnie zakona, ale mahli nie adrazu vypłačvać bonusy. Z apošniaha miesca pracy jana pajšła bieź ich.
«Raniej ja była takaja bieschrybietnaja, nikoli nie mahła pastajać za siabie, kali što, adrazu biehła płakać. Tut ja navučyłasia siabie abaraniać. U pryncypie, kali ty znachodzišsia ŭ inšaj krainie adzin, heta nieabchodna. Heta ŭ Biełarusi možna paskardzicca: «Mama, tata, viedajecie, što zdaryłasia!» I jany pačynajuć raić, što zrabić. A tut ty sama saboj, zakony zusim inšyja, tamu nijakija parady nie spracujuć», — razvažaje Vika.
«U mianie, naadvarot, vopyt vielmi stanoŭčy, — padkreślivaje Naścia. — Ja paśpieła papracavać u Homieli aficyjantkaj — adrazu paśla škoły. I ŭ nas byŭ mieniedžar, jaki ŭvieś čas sprabavaŭ uzvysicca za košt piersanału: prydziraŭsia, kryčaŭ. Tut ja nie mahu ŭjavić takuju situacyju. Mahčyma, heta asabista mnie šancavała. Ale kab niechta staŭ kryčać? Ni za što. Mieniedžar zaŭsiody padydzie, pahavoryć z taboj. Znosiny vielmi pavažlivyja. Plus zaŭsiody imknucca maksimalna źjadnać kamandu, zamatyvavać. Ciabie nie presujuć, ty sam chočaš heta rabić. Mnie taki padychod vielmi spadabaŭsia.
A jašče kłasna, što tut lohka prasoŭvacca pa karjernaj leśvicy: z pazicyi aficyjanta možna daraści da mieniedžara. Usio budzie zaležać tolki ad tvaich zdolnaściaŭ. Pry hetym usie navat na vielmi vysokich pasadach, z kim ja maju znosiny, nie ŭpeŭnienyja, što chočuć zastacca tut nazaŭždy. Mnohija trymajuć u hałavie dumku pra viartańnie dadomu».
Sama Naścia ciapier pracuje ŭ śfiery social media marketing.
«Miesiac pracavała biez vychadnych pa 10 hadzin»
Svaju historyju padrabiaźniej pačynaje raskazvać i Vika. U Katar jana pryjechała piać hadoŭ tamu. Adrazu ŭładkavałasia pracavać u kaviarniu — zarobak byŭ 3500 ryjałaŭ (pa ciapierašnim kursie kala $950). Va ŭstanovach płacili bolš, čym u hatelach. Tak atrymałasia, što pracavała jana tam razam ź inšaj adnakłaśnicaj: Dochu pryjechali skarać niamała homielskich dziaŭčat.
«My papracavali paŭhoda, i da nas jak klijentka pryjšła dziaŭčyna. Jana była rodam z Hrecyi, ale razmaŭlała pa-rusku. Prapanavała pracavać u prodažach. Było strašna, tamu što ŭ hetym vypadku nie davali žyllo. Zarobak vyšejšy, ale kvateru treba šukać samim. My ryzyknuli. Zarobak vyras da 6000 ryałaŭ ($1650), ale za žyllo my na dvaich addavali 5500 ($1500). Tut heta zaŭsiody samy vialiki artykuł vydatkaŭ, tamu bolšaść pryjezdžych «šeryć» žyllo. Pryčym kvatera ličyłasia vielmi biudžetnaj i była choć i dvuchpakajoŭkaj, ale zusim maleńkaj i ŭ nie samym prestyžnym rajonie».
Vika ź siabroŭkaj prapracavali tam dva hady. U dobry pieryjad z bonusami mahli zarabić 8000 ryjałaŭ (kala $2200) i navat bolš, ale heta z ulikam davoli napružanaha hrafiku. I ŭsio ž dziaŭčaty vyrašyli pasprabavać siabie ŭ pracy ź luksam.
«My chadzili pa handlovych centrach, raznosili svaje CV. I kali nas paklikali na intervju, usio było ŭžo vielmi surjozna. Jano doŭžyłasia dźvie hadziny, zadavali raznastajnyja pytańni, u tym liku, naprykład, jak časta ja płaču.
Pra sami brendy ničoha nie pytalisia. Heta kampanija, jakaja trymaje šmat kramaŭ pa franšyzie, tamu navat składana pradbačyć, kudy ciabie mohuć adpravić. Ale infarmacyju pra kampaniju my vučyli: kali była zasnavanaja, ź jakimi brendami supracoŭničaje. Tam u śpisie tolki viadomy luks: Valentino, Bottega, Tom Ford, Manolo Blahnik, Dolce & Gabbana. Jašče mianie paprasili sabrać niekalki łukaŭ z tych rečaŭ, jakija byli ŭ kramie. Adkazu pryjšłosia čakać vielmi doŭha, bolš za dva miesiacy».
Spačatku Vicy vielmi padabałasia praca: luksavy siehmient pryjšoŭsia joj pa dušy. Ale potym joj z kalehami treba było pierajazdžać u novy handlovy centr, a adkryćcio kramy — heta zaŭsiody ciažki etap. Tak što pracy było šmat.
«Tak supała, što moł adkryŭsia pierad Ramadanam. My ledź nie sutkami tam znachodzilisia — nie spali, nie pili, nie jeli. Było vielmi mała piersanału, plus pačalisia rasprodažy. Ja mahła pracavać biez vychadnych pa dva tydni, pa try, dy navat pa miesiacy. Mnie ŭžo zdradžvali niervy i zakančvalisia siły. Nie mahu skazać, što mnie tam było kiepska, prosta byŭ vielmi źniasilvajučy pieryjad. Ujavicie, miesiac biez vychadnych pracavać pa 10 hadzin.
Pry hetym materyjalna ŭznaharodžvalisia tolki vysokija prodažy, kali pradaŭ bolš za svoj płan abo peŭnyja adzinki tavaru — naprykład, sukienka ad-kuciur abo sumku sa źmiainaj skury. Tak možna było zarabić dadatkovyja 2000 ryjałaŭ ($550). A tak pierapracoŭki viartalisia dadatkovymi vychadnymi abo možna było raniej pryjści na pracu / pajści ź jaje».
Surazmoŭcy tłumačać, što pieryjad Ramadana źmianiaje ŭsio. Naprykład, niekatoryja kramy zakrytyja da abiedu ŭ piatnicu, kali ŭ musulman prachodzić kalektyŭnaja malitva, inšyja zakryvajucca tolki niepasredna na čas samoj malitvy. Pracoŭny dzień moža doŭžycca nie vosiem standartnych hadzin, a šeść, a čas pracy samich handlovych centraŭ moža źmiaščacca na načny.
Cikavaja sistema i z zarobkami. Jon zaležyć ad taho, kolki paprosić sam kandydat. Plus u miascovych zarobak moža być apryjory vyšejšy.
«U kožnaha na intervju pytajucca pra čakańni adnosna zarobku. Kali chtości skaža mienš, čym hatovyja byli prapanavać, stolki i daduć. Naprykład, u mianie zarobak byŭ 9000, u majoj kalehi — 12000, a ŭ inšaj — 5000. Ale prasiła ja 10500», — raskazvaje Vika.
«Canić siabie treba, ale razumna. U tym ža sałonie adzin majstar moža vykonvać svaju pracu kudy bolš jakasna, tamu što ŭ jaho bolš vopytu. Łahična, što i apłata budzie vyšejšaj», — dapaŭniaje Naścia.
Akramia vopytu, vielmi šanujecca viedańnie arabskaj movy. Ni Naścia, ni Vika jaje pakul nie viedajuć: vyvučeńnie akazałasia vielmi ciažkim. Da taho ž mova choć i adzinaja dla mnohich krain, ale ŭ kožnaj svoj dyjalekt. Umoŭny marakaniec i katarka mohuć i nie zrazumieć adzin adnaho.
U samym Katary, dzie 85% usiaho nasielnictva — heta pryjezdžyja, całkam možna abychodzicca tolki anhlijskaj. Jość i całkam ruskamoŭnyja sałony pryhažości ci inšyja ŭstanovy.
Patreba ŭ rabotnikach pa-raniejšamu jość va ŭsich śfierach: Docha ŭsio jašče nahadvaje vialikuju budoŭlu. Pastajanna patrebnyja rabotniki i ŭ hateli, i ŭ restarany, i ŭ kramy, i ŭ bjuci-sałony.
«+50 — heta jak u nas −20 zimoj. Nikomu nie prychodzić da hałavy iści na špacyr u park»
Da čaho było składana adaptavacca? Punkt pra rastańnie z rodnymi vynosim za dužki. Tym bolš dziaŭčatam pašancavała: jany trymalisia razam — try adnakłaśnicy.
«Mnie zdajecca, ja mahu prystasavacca da ŭsiaho ŭ žyćci, — kaža Vika. — Ale viedaju, što niekatoryja skardziacca na abmiežavańni ŭ vopratcy.
Treba razumieć: heta musulmanskaja kraina. Ty ž pryjechaŭ siudy, heta byŭ tvoj vybar — nu nielha tut chadzić napaŭhołaj. U topie na šlejkach abo ŭ karotkich šortach mohuć nie puścić u handlovy centr. Na ŭvachodzie ŭ moł hetyja praviły prapisanyja.
Jašče adno papularnaje ŭ mnohich pryjazdžych pytańnie — a što z ałkaholem? Uvozić jaho samim u Katar nielha. U krainie jość, ale dastać jaho nie tak prosta. Jość usiaho adna krama, dzie mohuć zakuplacca ekspaty — nie musulmanie. Ale treba atrymać licenziju, jakaja vydajecca sa zhody pracadaŭcy. A suma, jakuju možna patracić, zaležyć ad uzroŭniu dachodu.
Pry hetym u kramie ceny kudy bolš łajalnyja, čym u kaviarni. Kab trapić u kramu, treba na sajcie zabraniravać datu i čas. Biez zapisu nie projdzieš: na ŭvachodzie «kardon» ź siekjuryci».
— A jak vy pravodzicie vychodnyja? Što tut možna rabić takoha, što redka robiać u Biełarusi?
— Pačniem z taho, što tut u mnohich apartamientach jość ahulny basiejn. Ale možam i na plaž vybracca. Niešta śpiecyfičnaje składana nazvać. My pasprabavali ŭ pustyni pakatacca na viarbludach, na džypach pa vydmach. Na hetym, mabyć, usio. Ale tut vielmi šmat pryhožych miescaŭ i zaŭsiody ciopła», — raskazvaje Viktoryja.
— Nadvorje tut — heta asobnaje pytańnie…
— Pieršaje leta tut ja dumała, što pamru. U pramym sensie traciła prytomnaść na pracy. Ale paźniej adaptavałasia. Ciapier mahu vytrymać i +50. Pa sutnaści, heta jak u nas —20 zimoj. Ty ž nie pojdzieš pa parku špacyravać — chutčej budzieš pravodzić čas u mołach abo kaviarniach, dzie jość kandycyjaniery, — tłumačyć Vika.
— A jak miascovyja staviacca da pryjezdžych?
— Kali vy nie robicie ničoha abraźlivaha, nie razhulvajecie pa vulicy ŭ pjanym vyhladzie, narmalna apranutyja, to jany vielmi pryjaznyja. Kali trapicie da ich u dom, buduć maksimalna haścinnyja, — praciahvajuć raspaviadać surazmoŭcy.
— Pavyšanaja ŭvaha da pryhožych dziaŭčat jość?
— Tak, takoje moža być, asabliva da słavianak. Ale mnie tut padabajecca, što ty adčuvaješ siabie supierbiaśpiečna. Dziaŭčyna moža ŭ luby čas dnia i nočy vyjści na vulicu i viedać, što ź joj ničoha nie zdarycca. Nichto nie budzie chapać za ruku ci abzyvać. Zakanadaŭstva zaŭsiody na baku žančyny. Kali ty vyrašyš źviarnucca ŭ palicyju i raskazać, što ciabie pakryŭdzili, jany abaviazkova prymuć miery.
Što tyčycca adnosin, nie ŭsio tak prosta. Miascovyja mužčyny mohuć ažanicca ź inšaziemkaj, ale heta pavinna być nie pieršaja žonka. Vyklučeńni byvajuć, ale vielmi redka.
Samo paniaćcie «sustrakacca» ŭ miascovych adsutničaje: kali patencyjnaja para spadabałasia adzin adnamu, baćki iduć damaŭlacca pra šlub. Časam abminuć i etap simpatyi — usio vyrašaje starejšaje pakaleńnie. Siabroŭstva pamiž chłopcam i dziaŭčynaj taksama ličycca nonsensam — źmiašanyja kampanii maładych ludziej naŭrad ci sustrenieš u kaviarni.
«U mianie na pracy była znajomaja — katarka, a voś jaje muž — inšaziemiec. I jany nie mohuć aficyjna tut raśpisacca, navat z ulikam taho, što jaje siamja nie suprać. Tak što ŭ vypadku žančyn usio jašče składaniej», — raskazvaje Vika.
«I tut nielha žyć razam, kali vy nie žanatyja. Kali chtości paskardzicca ŭ palicyju, mohuć być surjoznyja nastupstvy. Jašče adno strohaje praviła: kali pryjazdžaja dziaŭčyna zaciažaryć, budučy nie zamužam, jaje pasadziać u turmu, a paźniej departujuć biez prava viartańnia ŭ Katar, — dadaje Naścia. — Niadaŭna ja chadziła ŭ palicyju, bo ŭ mianie skrali kašalok. Sa mnoj byŭ moj małady čałaviek. U zajavie heta paprasili nie paznačać i napisać, što ja była adna».
«Darečy, mnohija ličać, što žančyny tut zusim niesamastojnyja i redka pracujuć. Heta nie tak. Navat za apošnija hady ja zaŭvažaju, što ŭsio bolš dziaŭčat chočuć być finansava niezaležnymi ad muža.
Pry hetym na jaho ŭskładajecca asnoŭnaja adkaznaść za zabieśpiačeńnie siamji, a zapraŭlaje domam, adnaznačna, žančyna. Ale historyja, kali tata pracuje, a mama pryhožaja — heta chutčej pra pakaleńnie miascovych dziadulaŭ i babul», — raźviejvajuć dziaŭčaty papularny mif.
«Uvohule, tut vielmi mocnyja siamiejnyja kaštoŭnaści. Baćki šmat času pravodziać ź dziećmi. Zrazumieła, što mnohim siemjam dapamahajuć niani, ale čas ź siamjoj — heta nie opcyja, a abaviazkovaja častka raskładu. Razvody jość, ale baćki praciahvajuć mieć znosiny ź dziećmi. Kali jany čujuć, što taty mohuć hadami nie bačycca sa svaimi dziećmi i nie dapamahać im, heta vyklikaje vielizarnaje ździŭleńnie», — kaža Viktoryja.
Naprykancy trochi pra mary. Vika žartam pryznajecca, što chaciełasia b zajmacca čymści, što prynosić zadavalnieńnie i nijakaha napruhi. A Naścia padumvaje pra aŭtarskija ekskursii, kab była mahčymaść pakazvać Dochu i krainu ŭ cełym vačyma čałavieka, jaki vydatna ŭ joj aryjentujecca, — ad samaha tusovačnaha kłuba da najlepšaj arabskaj kuchni ŭ horadzie.
«Viedajecie, jak kamientuje vaša zatrymańnie apazicyja? «Aryštavany pamahaty režymu». Turemnaja spoviedź lidara prafsajuzaŭ Jarašuka2
«Viedajecie, jak kamientuje vaša zatrymańnie apazicyja? «Aryštavany pamahaty režymu». Turemnaja spoviedź lidara prafsajuzaŭ Jarašuka
«Ruki preč ad sasisačak!». U sacsietkach horača abmiarkoŭvajuć baraćbu Łukašenki z kavaj na zapraŭkach. Niekatoryja zaklikajuć dziejničać bolš žorstka1111
Kamientary