Viktar Babaryka atrymlivaŭ da 300 listoŭ za dzień

«U lutym 2023 hoda paśla taho, jak mianie ź Viktaram Babarykam zakinuli ŭ ŠIZA, mnie, Maksimu Znaku, Mikałaju Statkieviču, Mašy Kaleśnikavaj i Siarhieju Cichanoŭskamu ŭklučyli režym «inkamunikada».

Treba skazać, što ŭ 2020 i 2021 hadach nijakich asablivych prablem z atrymańniem listoŭ nie było. Dachodziła daloka nie ŭsio, ale svaje 50—70 listoŭ na dzień ja atrymlivaŭ, Viktar Babaryka byvała atrymlivaŭ i pa 300 u dzień. Cenzary ŭ Žodzinie byli dobryja i navat prynosili mnie asobna maje stosy listoŭ, ja ź imi razmaŭlaŭ.

Tak, niechta dapisvaŭsia ź dziasiataj sproby, z Ukrainy naohuł stajaŭ niejki błok na listy, ale ŭ mianie skłaŭsia kruh z čałaviek 40—50, ź jakimi ja naładziŭ pastajannuju pierapisku. Adpraŭlaŭ ludziam malunki, partrety.

U lutym 2022 hoda pierad pačatkam vajny biez tłumačeńnia pryčyn palityčnym zabaranili pisać i addavać listy nie ad blizkich svajakoŭ. Ad dziadźki, ciotki ja ŭžo amal ničoha nie atrymlivaŭ. Navat ad brata dachodziŭ adzin ź piaci. Časam ludzi padmanvali sistemu i padpisvalisia maim proźviščam — i niekatoryja listy tak dachodzili. Ale ŭ lutym 2023 hoda ja čamuści trapiŭ u śpis «vybranych» palitźniavolenych, jakich schavaŭšy ad usich, pazbavili luboj suviazi z vonkavym śvietam. Spyniłasia lubaja pierapiska, čaćviarych advakataŭ pazbavili licenzij, astatnija admaŭlalisia navat prosta padpisvać kantrakt.

Paśla ŭniasieńnia mianie ŭ śpis terarystaŭ mnie nielha było pakłaści hrošy na rachunak, i ja nie moh banalna dazvolić sabie kupić tualetnuju papieru i zubnuju pastu. Mianie schavali ŭ budynak ŠIZA, dzie ja pravioŭ kala 90 sutak + try razy pa paŭhoda ŭ PKT. Zvanki i spatkańni, naturalna, zabaronieny. Tempieratura ŭ kamiery zimoj dniom +9. Ja ŭpeŭnieny, što kali b ja nie ŭskryŭsia (23 šyŭki na ruce i šyi), to ŭvieś hety čas mianie trymali b u adzinočcy, a tak daviałosia kahości da mianie padsialić, kab sačyŭ.

Baćki abivali parohi, pryjazdžajučy z Baranavičaŭ u Navapołack, dzie načalnik Mašadzijeŭ prosta ździekavaŭsia ź ich, ničoha pra mianie nie paviedamlajučy, tolki kažučy, što ja nie pamior. Spačatku ja navat nie zrazumieŭ, što mnie zabaroniena pierapiska. Pisaŭ, pisaŭ — i nie atrymlivaŭ adkazaŭ. Dzień za dniom, tydzień za tydniem, ja pačaŭ panikavać, ci nie pamierli maje rodnyja. Administracyja prosta ździekavałasia ŭ adkaz na pytańni, što adbyvajecca z majoj pierapiskaj.

Prosta kazali, što tabie nichto nie piša, pra ciabie zabyli.

Ale ja pisaŭ, mianiaŭ rečy na kanvierty i ŭsio pisaŭ, pisaŭ. Adpraŭlaŭ sotni listoŭ, jakija išli apieratyŭniku ŭ śmietnicu. Pisaŭ skarhi ŭ DIN, prakuraturu, administracyju prezidenta, ale jany z Navapołackaj kałonii nie vychodzili. Za hety čas u mianie pamior dzied, pamior dziadźka, ale nivodnaha lista, nivodnaj telehramy mnie nie addali i nie paviedamili. Pra heta ja daviedaŭsia tolki praz dva hady. Pasprabavaŭšy ŭsie sposaby dabicca choć niejkaha adkazu, vyrašyŭ uskrycca jašče raz, ale nie paśpieŭ — mianie pavieźli ŭ «amierykanku», a praz 10 miesiacaŭ viarnuli ŭ łahier znoŭ u ŠIZA, dzie jašče praz 2 miesiacy vyzvalili. Ale ŭ majoj čaćviortaj kamiery źnizu pamiž siomaj naraj i ścianoj dahetul lažyć «mojka», jakuju ŭ 2023 hodzie ja schavaŭ i jakuju nie znajšli ni na adnym pieratrusie. Paśla hetaha pasta, viadoma, znojduć.

Maksim Znak užo bolš za 1000 dzion u režymie «inkamunikada», a heta jašče horš za katavańni. Heta biesčałaviečna — pazbaŭlać nievinavatych ludziej luboj suviazi ź siamjoj na hady. A ichnija svajaki majuć takija ž šancy zvarjacieć», — piša Ihar Łosik.

• 0
• 0
• 0
• 0
• 1
• 6
• 10
• 0