Balin Miler vioŭ žyvuju tranślacyju svajho ŭzdymu ŭ TikToku ŭ sieradu. Jaho padzieńnie sa skały taksama trapiła ŭ efir.
Skałałaz-influensier Balin Miler z Alaski zahinuŭ paśla padzieńnia sa znakamitaj viertykalnaj skały El-Kapitana ŭ nacyjanalnym parku Josemici, štat Kalifornija ŭ ZŠA, piša Bi-bi-si.
23-hadovy Balin vioŭ pramuju tranślacyju svajho ŭzdymu ŭ pramym efiry TikTok u sieradu. Jaho padzieńnie sa skały taksama trapiła ŭ efir.
U emacyjnaj publikacyi ŭ sacyjalnych sietkach, jakaja paćviardžaje śmierć syna, jaho maci Žanin Žyrar-Murman napisała: «Majo serca raźbita na tysiačy askołkaŭ. Ja nie viedaju, jak pieražyć heta. Ja tak mocna jaho lublu. Ja chaču pračnucca ad hetaha žachlivaha kašmaru».
Pryčyny zdareńnia pakul nieviadomyja, ale brat Balina, Dyłan, paviedamiŭ AFP, što toj ździajśniaŭ uzdym pa maršrucie «Mora mary» vyšynioj 730 mietraŭ, vykarystoŭvajučy techniku nižniaj strachoŭki, jakaja dazvalaje ŭźbiracca ŭ adzinočku, zastajučysia pry hetym padstrachavanym.
Fatohraf Tom Evans zdymaŭ uzdym Milera na praciahu niekalkich dzion i znachodziŭsia kala skały ŭ momant padzieńnia. Jon raspavioŭ, što Balin užo zaviaršyŭ uzdym i padymaŭ ryštunak na viaroŭcy, ale sumka zachrasła.
Pavodle Toma, skałałaz pačaŭ spuskacca, kab vyzvalić sumku.
«Jaho viaroŭka nie dachodziła da miesca, dzie znachodziłasia sumka, na niekalki futaŭ, ale jon, zdajecca, hetaha nie zaŭvažyŭ. Pa šlachu ŭniz jon saśliznuŭ z kanca viaroŭki», — napisaŭ Evans.
Balin Miler naradziŭsia ŭ Ankorydžy i ź dziacinstva zajmaŭsia skałałažańniem razam z baćkam i bratam.
Jon byŭ daśviedčanym skałałazam. Jon atrymaŭ mižnarodnuju viadomaść paśla taho, jak ździejśniŭ pieršaje solnaje ŭźbirańnie pa maršrucie Slovak Direct na hary Mak-Kinli na Alascy. U svaim Instagram jon tady napisaŭ, što hetaje zaniało 56 hadzin.
«U jaho, badaj, byli adny z samych uražlivych apošnich šaści miesiacaŭ skałałažańni z usich, kaho ja mahu ŭspomnić», — skazaŭ vopytny alpinist Klint Chiełandar u intervju «Anchorage Daily News» u lipieni.
Inšy viadomy skałałaz z Alaski, Mark Viestman, paraŭnaŭ jaho z Aleksam Chonałdam — pieršym čałaviekam, jaki prajšoŭ uvieś maršrut na El-Kapitana biez strachoŭki.
Pavodle časopisa «Climbing», Miler pravioŭ niekalki tydniaŭ, zajmajučysia solnym skałałažańniem u Patahonii i Kanadskich Skalistych harach. U studzieni jon zaviaršyŭ adzin z samych składanych ledzianych maršrutaŭ pad nazvaj Reality Bath. Balin Miler staŭ druhim čałaviekam, jaki ździejśniŭ uźbirańnie na Reality Bath u adzinočku z momantu jaho adkryćcia 37 hadoŭ tamu.
Siarod padpisčykaŭ jon byŭ viadomy jak «chłopiec z aranžavaj pałatkaj» z-za jaho jarkaha łahiera la padnožža El-Kapitana.
El-Kapitana — vielizarnaja hranitnaja skała vyšynioj kala 3000 futaŭ (915 mietraŭ). Jana źjaŭlajecca važnaj słavutaściu nacyjanalnaha parka i pryciahvaje skałałazaŭ, što śpiecyjalizujucca na vyšynnych maršrutach, z usiaho śvietu.
Miler zahinuŭ u pieršy dzień prypynieńnia pracy fiederalnaha ŭrada, z-za jakoha nacyjanalnyja parki zastalisia ŭ cełym adkrytymi, ale ich absłuhoŭvańnie było abmiežavana, a infarmacyjnyja centry — začynieny.
Słužba nacyjanalnych parkaŭ zajaviła, što viadzie rasśledavańnie incydentu, i što «rejndžary i ekstrannyja słužby adreahavali nieadkładna».
Śmierć Milera stała treciaj u parku Josemici za hety hod. U červieni 18‑hadovy žychar Techasa zahinuŭ, uźbirajučysia pa inšaj skale biez strachoŭki. U žniŭni 29‑hadovy turyst zahinuŭ paśla taho, jak jaho ŭdaryła pa hałavie vialikaja halina dreva.
Ciapier čytajuć
Syny «litoŭskaha špijona» adpravili Łukašenku list. Tym časam uspłyli novyja detali jaho spravy3
Kamientary