Prakopjeŭ pra skandał vakoł Stryžaka: Nie treba kožny vypadak drennych manier analizavać praz hiendar. Heta pašlacina, jano pieraškadžaje pieramahčy Pucina

Hramadski dziejač i były restaratar Vadzim Prakopjeŭ vykazaŭsia nakont skandału z dykpikami Andreja Stryžaka ŭ novym vypusku prahramy «Svarka-šou» na DW Biełaruś.

Pa słovach Prakopjeva, padobnyja skandały — heta «całkam narmalny chod padziej». Jon ličyć, što ludzi nie idealnyja, i spasyłajecca na cytatu ź sieryjała «Mad Men»: «People do things» («Ludzi robiać roznyja rečy»). Na jaho dumku, treba hladzieć na situacyju «šyrej i hłybiej», nie chavajučy prablemy, jak heta robicca ŭ aŭtakratyjach:

«Jany (ludzi. — NN) niedaskanałyja, časam sasudy sa zła i brudu. Treba hladzieć šyrej i hłybiej, ni ŭ jakim razie nie ŭžyvać tunelny zrok. I dakładna nie bierahčy «kryštalny sasud», jak u aŭtakratyjach — «nie vynosić śmiećcie z chaty, ni ŭ jakim razie».

Na pohlad Prakopjeva, demakratyčnaje hramadstva, pavinna adkryta abmiarkoŭvać niepryjemnyja prajavy žyćcia, kab rabić adpaviednyja vysnovy i raźvivać krytyčnaje myśleńnie:

«Ja razumieju, navošta heta robiać u aŭtakratyjach, ale ŭ demakratyjach hetaha rabić nie treba. Tamu my pavinny hladzieć na žyćcio całkam i šyroka, va ŭsich jaho prajavach, pryjemnych i nieapietytnych. I rabić vysnovy adpaviednyja, inakš krytyčnaha myśleńnia ŭ biełarusaŭ nie razaŭjecca, i budzie nam biada, i «viek voli nie vidać».

Kali viadoŭca ŭdakładniła, ci nie źjaŭlajucca padobnyja pavodziny mužčyn u dačynieńni da žančyn novym trendam, charakternym dla biełarusaŭ, Prakopjeŭ kateharyčna zajaviŭ: «Nie, ja tak nie dumaju». Jon padkreśliŭ, što maralnyja normy dla jaho nie źjaŭlajucca čymści źmienlivym i zaležnym ad času:

«Mianie całkam zadavolić poźnieviktaryjanski standart, kali vy mianie žadajecie spytać. Mnie zusim nie patrebny prahres sacyjalny dla taho, kab sudzić drennyja maniery».

Razam z hetym Prakopjeŭ padkreśliŭ: «Nam nie treba razhladać hetuju situacyju ź psichałahičnaha ci sacyjalnaha punktu hledžańnia. Nam treba razhladać jaje z žyćciovaha i z palityčnaha punktu hledžańnia», — i pierajšoŭ da krytyki sučasnych trendaŭ, jakija, na jaho dumku, skažajuć realnaść i asłablajuć zachodniuju cyvilizacyju.

«Vy razumiejecie, my žyviom u žachlivyja časy, kali hiendarnyja daśledavańni ličacca ŭžo navukaj. My žyviom u časy, kali pačynaje kvitnieć tanny psichaanaliz. Kali kožnaja maładaja maci, nie paśpieŭšy vychavać syna, užo stanovicca hieštalt-terapieŭtam.

I ŭ hramadstva vialikaja spakusa (i, na žal, heta ŭsio padtrymlivajecca prahresiŭnymi miedyja) razhladać heta z punktu hledžańnia škały «achviara-hvałtaŭnik», z punkta hledžańnia roŭnaści pałoŭ abo ich pravoŭ.

Heta dosyć ubohaja i dosyć kryvaja škała i punkt hledžańnia, jakaja pavinna admierci. U Amierycy (ja ŭjaŭlaju, jaki pohlad na Amieryku zaraz maje jeŭrapiejski hladač) hetaja epocha zakančvajecca, i dziakuj bohu, tamu što hetaja epocha moža prosta padpiłavać suk, na jakim znachodzicca zachodniaja cyvilizacyja».

Na ŭdakładniajučaje pytańnie, u čym prablema z hiendarnymi daśledavańniami, Prakopjeŭ vykazaŭ svajo staŭleńnie:

«Prablema ŭ tym, što zachodniaja cyvilizacyja pajšła nie ŭ toj bok. Prablema ŭ tym, što ŭ naš čas, padčas ličbavaj revalucyi i voś takoha prahresu, jaki źjaŭlajecca śledstvam pieramohi ŭ chałodnaj pieršaj vajnie (časam hety čas nazyvajuć «peace dividends time»), jano sparadziła dastatkova cikavyja sacyjalnyja fienomieny, jakija nie dazvolać zachodniaj cyvilizacyi vyjhrać u vosi zła. Heta nastolki surjozna.

I kali hramadstva budzie kancentravacca na druharadnych, treciaradnych prablemach i zabudziecca karani, i zabudziecca, čamu zachodniaja cyvilizacyja, ułasna, vystajała i ŭzyšła za apošnija 500 hadoŭ, to nam usim nie pazdarovicca».

U vyniku Prakopjeŭ paraiŭ:

«Nie treba čych i kožny vypadak drennych manier ci sacyjalnych pamyłak analizavać z punktu hledžańnia hiendara. Heta prosta niejkaja pašlacina. I heta tak raspaŭsiudžana, i heta vielmi zhubna dla taho, kab vyjhravać u Pucina vajnu».

• 20
• 0
• 1
• 5
• 0
• 0
• 0
• 0