Źmieny ŭ zakon: biaspraŭnikaŭ padzielać na niekalki katehoryj, a pjanych piešachodaŭ pačnuć štrafavać biez papiaredžańnia
Heta praduhledžana prajektam zakona «Ab uniasieńni źmianieńniaŭ u kodeksy pa pytańniach administracyjnaj adkaznaści», jaki ŭ piatnicu byŭ pryniaty deputatami Pałaty pradstaŭnikoŭ u pieršym čytańni.
Namieśnik staršyni Pastajannaj kamisii pa zakanadaŭstvie Pałaty pradstaŭnikoŭ Alaksandr Amieljaniuk rastłumačyŭ: u dačynieńni da kiroŭcaŭ biez pravoŭ idzie havorka pra ŭmieranuju libieralizacyju, paviedamlaje pres-słužba MUS.
Zaraz ustanoŭlena administracyjnaja adkaznaść asoby, jakaja kiruje transpartnym srodkam i nie maje takoha prava. Pad hetuju katehoryju padpadajuć i asoby, jakija nikoli nie vučylisia i nie atrymlivali pravoŭ, i hramadzianie, jakija pazbaŭleny hetaha prava za ździajśnieńnie pravaparušeńniaŭ, i tyja, chto praterminavaŭ svajo paśviedčańnie.
Zakonaprajektam unosiacca źmieny, jakija raźmiažoŭvajuć hetyja katehoryi. Naprykład, dla taho, chto nie padoŭžyŭ termin dziejańnia paśviedčańnia kiroŭcy, adkaznaść budzie miakčejšaj.
U toj ža čas, pavodle statystyki DAI, šmat pravaparušeńniaŭ ździajśniajuć piešachody, što znachodziacca ŭ stanie ałkaholnaha apjanieńnia. Častaja źjava — jany sami stanoviacca achviarami.
— Pavodle zakona piešachod, jaki znachodzicca ŭ stanie apjanieńnia, za pieršaje parušeńnie budzie tolki papiaredžany. Hetaj miery niedastatkova. Tamu karekciroŭka praduhledžvaje adkaznaść piešachoda, jaki znachodzicca ŭ takim stanie. Biez papiaredžańnia jon moža być adrazu pryciahnuty da administracyjnaj adkaznaści, — rastłumačyŭ deputat.
Kamientary
Adkaznaść nie za toje, što pjany. A kali pjany parušyć PDR, to ŭ pieršy raz atrymaje nie papiaredžańnie, a štraf.