Skandalnaja rasijskaja sietka hramadskaha charčavańnia «Jobidajobi» rehistruje svoj tavarny znak u Biełarusi
Skandalna viadomaja rasijskaja sietka dastaŭki sušy i rołaŭ «Jobidajobi» vyrašyła zarehistravać svoj tavarny znak u Biełarusi. Zajaŭka na jaho rehistracyju źjaviłasia ŭ rejestry Nacyjanalnaha centra intelektualnaj ułasnaści krainy, piša Office Life.
Rasijskaja sietka dastaŭki sušy pracuje na biełaruskim rynku ŭžo bolš za hod. Pra toje, što jana płanuje vyjści ŭ Biełaruś, kazali ŭ kastryčniku 2024 hoda. Tady kamanda prajekta pisała, što naša kraina — «pryjarytetny rehijon raźvićcia» sietki, a taksama zapuściła rekłamnuju kampaniju dla pošuku frančajzi ŭ Biełarusi.
Upieršyniu dastaŭka ad «Jobidajobi» zapracavała ŭ Homieli, praŭda, pad inšaj nazvaj — «Jo sušy i roły». Siońnia pad hetym brendam sietka pracuje ŭ siami rehijonach Biełarusi — u Baranavičach, Homieli, Słucku, Minsku, Mahilovie, Mazyry i Salihorsku. Što da tavarnaha znaka, to heta łahatyp dastaŭki ŭ vyhladzie litary «Jo».
Zajaŭku na jaho rehistracyju ŭ dvuch kłasach tavaraŭ i troch kłasach pasłuh padała biełaruskaja kampanija «Kampjutarny ramonak». Prykmietna, što asnoŭnym vidam dziejnaści kampanii paznačanaja dziejnaść u halinie kampjutarnaha prahramavańnia.
Kampanija była stvoranaja ŭ kancy sakavika 2025 hoda ŭ Minsku. Jaje adzinaja ŭłaśnica — Nadzieja Avaniesava. U struktury sietki jana pracuje na pasadzie kiraŭnicy mižnarodnaha napramku «Jobidojobi». Da hetaha Nadzieja na rasijskim rynku pracavała ŭ łakalnych strukturach amierykanskich sietak piceryj Domino's i Papa John's, a taksama ŭ strukturach inšych kampanij u siehmiencie fud-rytejłu.
Sietku «Jobidajobi» ŭ 2016 hodzie zapuścili pradprymalniki Dźmitryj Pradzied i Kanstancin Zimien z Krasnajarska. U Rasii dastaŭka chutka stała viadomaj dziakujučy svajoj skandalnaj naźvie i pravakacyjnamu padychodu da markietynhu.
Tak, u śniežni 2024 hoda kampanija źmianiła nazvu svajoj jurydyčnaj asoby z «Jobidajobi» na «Sušy z prystaŭkaj «sušy» pavodle pazovu FAS Rasii. Tady ŭ viedamstvie paviedamlali, što pieršapačatkovaje firmovaje najmieńnie było «suhučnym sa słovami nienarmatyŭnaj leksiki, jakija majuć nieprystojny źmiest, a taksama supiarečyć hramadskim intaresam i pryncypam marali». Adnak u častki frančajzi nazva brendu na šyldach nie źmianiłasia, a niekatoryja źmianili jaje na «Jo sušy».
Kamientary