Nievierahodnaja historyja pra dabryniu: kab zabrać chvoruju dziaŭčynku z maci, va Ukrainie ciahnik zrabiŭ prypynak pa-za raskładam
Usio pačałosia z adčajnaha zvarotu maci ŭ sacyjalnaj sietcy Threads da «Ukrzaliźnicy». Praz mocnyja śniehapady vioska apynułasia ŭ błakadzie, a dziaŭčyncy treba było terminova trapić na abśledavańnie ŭ staličnuju balnicu «Achmatdyt».
«Treba 12.01.2026 patrapić na ciahnik 772O Chmialnicki — Kijeŭ-Pasažyrski z chvorym dziciem, treba patrapić u «Achmatdyt» (skaročana ad «Achova maciarynstva i dziacinstva». — NN). Kvitki majem na zaŭtra 12.01.2026 na 11:00, vyjezd z Chmialnickaha.
Na žal, my žyviom u pasiołku, i praz marazy dy zaviruchu nas niama kamu z dačuškaj advieźci da ciahnika. Ci mahčyma, kab ciahnik 772O zrabiŭ prypynak na stancyi Koržyŭcy Chmialnickaha rajona? Dačuška lažačaja, 7 hadoŭ, dačka źnikłaha vajskoŭca, kvitki ŭ nas u pieršy vahon, 5‑ie i 7‑ie miescy», —
źviarnułasia Iryna Ułasienka da Ukrainskaj čyhunki 11 studzienia ŭ 17:49.
Paźniej u Threads žančyna patłumačyła, što žyvie ŭ pasiołku Łazavoje kala stancyi Koržyŭcy. Ad ich da Chmialnickaha 28 kiłamietraŭ napramuju, u abjezd — 40 kiłamietraŭ. Praź śniehapady zamiało darohi: «Pa vioscy pračyščana ahrafirmaj ad čyhunačnaha pierajezda da carkvy i ad pierajezda da pahorka, ale ŭ adnym miescy zanadta vysoka, i aŭtamabili sadziacca «brucham», i ich potym ciahnie traktar».
Stan maci byŭ blizki da paniki:
«Kali mnie a 17:00 paviedamili, što nie zmohuć advieźci da ciahnika, ja napisała ŭ viaskovuju hrupu — i cišynia. Ja siadzieła z kamiakom u horle 40 chvilin».
Pa słovach žančyny, jana nie tolki pakinuła paviedamleńni ŭ Threads, ale i telefanavała na haračuju liniju Ukrainskaj čyhunki.
A pačatku dziaviataj hadziny viečara žančyna atrymała sms ad Ukrainskaj čyhunki:
«My spynim ciahnik u Koržyŭcach. Ale mohuć być zatrymki». Žančynie paraili adsočvać aktualnuju infarmacyju na sajcie.
Taksama Irynie adkazała łakamatyŭnaja bryhada ciahnika ŭ Threads:
«Tak, my zrobim prypynak na stancyi Koržyŭcy dla vašaj pasadki. Trymajciesia, my z vami. Žadajem zdaroŭja dziciaci».
«Kali mnie adpisali, što spyniać ciahnik, ja raspłakałasia. Ja šukała ludziej nie tolki ź vioski, a i z horada, chto b moh pryjechać dy advieźci. Znajšoŭsia čałaviek, jaki ŭžo byŭ hatovy achviaravać svaim adpačynkam pierad źmienaj (darečy, taksama rabotnik «Ukrzaliźnicy»), ale prypynak ciahnika na chvilinku — heta samaje lepšaje rašeńnie. Ja biaźmiežna ŭdziačnaja», — napisała Iryna.
Na nastupny dzień Irynie paviedamili, što ciahnik budzie na stancyi ŭ 11:21.
«My zrabili heta za dźvie chviliny… Ščyra dziakujem, my ŭ ciahniku. Vy nievierahodnyja. Łakamatyŭnaja bryhada, vy cudoŭnyja ludzi. Mocnaha vam zdaroŭja i mirnaha nieba. Siabry pa Threads, i vam my vielmi ŭdziačnyja. Asabliva Vikusia», —
paviedamiła ščaślivaja žančyna ŭsim tym, chto chvalavaŭsia za jaje.
Na pytańnie, ci jość kamu sustreć ich u Kijevie, Iryna adkazała:
«Kuma nas zabiare i adviazie adrazu ŭ «Achmatdyt», bo ŭ jaje, na žal, niama śviatła, vady, ciapła, i žyvie jana až na 15‑m paviersie. Ščyra spadziajusia, što chutka ŭsio vierniecca da normy, naš niazłomny narod».
Dačka Iryny atrymała traŭmu siem miesiacaŭ tamu ŭ dziciačym sadku. Paśla niaŭdałaha lačeńnia ŭ Chmialnickaj abłasnoj dziciačaj balnicy raźviŭsia asteamielit — infiekcyjna-zapalenčaje zachvorvańnie, pry jakim paražajucca kaściavy mozh, kaściavaja tkanka i nadkośnica.
Jak tłumačyć Iryna, u balnicy jaje dačce buduć rabić MRT, pa vynikach jakoha vyrašać, ci možna źniać śpiecyjalny kaŭnier z šyi. A sama maleča maryć ab tym, kab «choć trochi pasiadzieć ci ŭstać».
Nakont baćki dziaŭčynki Iryna napisała:
«Tata zaraz na ŭschodzie. Tak stałasia, što ŭ dačuški dva taty: adzin bijałahičny, jaki źnik siem miesiacaŭ tamu na vajnie, a druhi pa sercy i dušy — taksama vajskoviec».
Karystalniki Threads nie chavajuć svajho zachapleńnia jak maci, tak i Ukrainskaj čyhunkaj:
«Boža, nievierahodna! Vy małajčyna, što advažylisia, nie pasaromielisia paprasić ab dapamozie dziela dačuški, što znajšli sposab, jak vyrašyć prablemu. Vy mocnaja. Niachaj dačuška jak maha chutčej vyzdaraŭlivaje. Na žal, u maim asiarodździ jość ludzi, jakija tolki i skardziacca na toje, jak usio vakoł va Ukrainie drenna, nikoli nie šukajuć mahčymaści vyrašyć prablemy samastojna, im usie vinavatyja štości pastajanna. Ukrzaliźnica, vy ŭ katory raz dakazali svaju čałaviečnaść, dziakujem».
«Paśla takich pastoŭ ja razumieju… Hety śviet jašče možna vyratavać!!»
«Boža, jak pryjemna čytać takija naviny. Niachaj vaša dzicia budzie zdarovaje, a Ukrzaliźnicy — nizki pakłon».
«Ukrzaliźnica, vy małajcy, nievierahodny ŭčynak, dziakuj ad usich ukraincaŭ. Tak mała treba dla ščaścia — usiaho tolki prypynak na niekalki chvilin, i niachaj uvieś śviet pačakaje! I viedajecie, my ŭsie vieryli, što ŭ Iryny i ŭ vas usio składziecca!!!!»
Prakuratura pra śmierć Miełkaziorava: žurnalist mieŭ chraničnuju chvarobu17
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli3535
Kamientary
Toje, što napisaŭ ty - heta viadomy demamahičny pryjom pad nazvaj "Aniektadyčnaje śviedčańnie" (Anecdotal Evidence). Kali biarecca vypadak i vydajecca za tendencyju.