Žurnalistu Alehu Supruniuku ŭ kałonii nie dajuć karystacca słychavym aparatam

Sa słoŭ Alaksandra Fiaduty, jon dvojčy razmaŭlaŭ z Aleham Supruniukom u listapadzie 2025 hoda.

Akazałasia, što žurnalistu, jaki maje invalidnaść pa słychu, u kałonii nie dali mahčymaści karystacca słychavym aparatam. Z hetaj pryčyny spadar Aleh praktyčna ničoha nie čuŭ i mieŭ vializnyja prablemy ŭ kamunikacyi ź inšymi ludźmi.

«Spačatku my adzin adnaho nie paznali. Tolki na treci dzień ja zapytaŭsia ŭ jaho: «Vy — žurnalist?». «A vy — Fiaduta?», — spytaŭ u adkaz Aleh Supruniuk. Słychavoha aparata jon nie mieŭ i byŭ całkam hłuchi. Ja razmaŭlaŭ ź im tak, kab jon moh čytać pa vusnach. Inšyja źniavolenyja tak, na žal, nie ŭmiejuć, i tamu Supruniuku navat nie było z kim parazmaŭlać», — raskazaŭ Alaksandr Fiaduta.

Z tych karotkich razmoŭ spadar Alaksandr daviedaŭsia, što za niepraciahły čas znachodžańnia ŭ kałonii žurnalist užo pabyvaŭ u štrafnym izalatary.

U kałonii Aleha Supruniuka raźmierkavali padmiatać padłohu na vytvorčaści. Heta praca, jakuju zvyčajna dajuć fizična asłablenym viaźniam. Pavodle słoŭ Fiaduty, inšyja viaźni staviacca da jaho dobrazyčliva i spahadliva — razumiejuć, što praz hłuchatu i biez słychavoha aparata jamu ciažka kamunikavać. U volny čas Aleh, jak i ŭsie, šmat čytaje — «navat bolš za inšych, bo bavić čas u razmovach jon nie moža, a tamu zastajecca praktyčna ŭ adzinocie».

Ci vyrašyłasia z taho času ŭ žurnalista prablema ź niemahčymaściu karystacca žyćciova važnaj dla jaho miedycynskaj pryładaj — na siońnia nieviadoma.

Aleh Supruniuk — 58‑hadovy žurnalist z Bresta. Za čas u prafiesii jon pracavaŭ u haziecie «Briestskij kuŕjer», anłajn-vydańni «Pioršy rehijon», supracoŭničaŭ ź inšymi niezaležnymi vydańniami. Jaho zatrymali ŭ studzieni 2025 hoda, i amal piać miesiacaŭ pra los žurnalista ničoha nie było viadoma.

Tolki ŭ pačatku lipienia prakuratura Bresckaj vobłaści raspaŭsiudziła infarmacyju, što ŭ sud nakiravanaja kryminalnaja sprava, raspačataja suprać žychara Bresta pavodle častki 3 artykuła 361—1 Kryminalnaha kodeksa. Viedamstva nie nazvała imia i proźvišča abvinavačanaha, tolki śćviardžała, što nie paźniej kastryčnika 2023 hoda mužčyna ŭvajšoŭ u skład «Biełaruskaj asacyjacyi žurnalistaŭ», pryznanaj «ekstremisckim farmavańniem» rašeńniem KDB ad 28 lutaha 2023 hoda.

8 žniŭnia 2025 hoda Aleh Supruniuk byŭ asudžany da 3 hadoŭ pazbaŭleńnia voli z adbyćciom u kałonii ahulnaha režymu. Sud Bresckaj vobłaści pryznaŭ jaho vinavatym va «ŭdziele ŭ ekstremisckim farmavańni» (pavodle č. 3 art. 361—1 KK RB). U minułym kastryčniku imia žurnalista źjaviłasia na sajcie MUS u pieraliku asob, «datyčnych da ekstremisckaj dziejnaści». Biełaruskaja pravaabarončaja supolnaść ličyć Aleha Supruniuka palityčnym źniavolenym.

• 0
• 0
• 0
• 1
• 0
• 3
• 3
• 0