Cichanoŭskaja zaklikała biełarusaŭ na emihracyi być bolš aktyŭnymi, a nie spadziavacca na kabiniety

«Pieradusim chaču adznačyć, što nijakaj źmieny aficyjnaj Polščy ŭ dačynieńni biełarusaŭ niama. Va ŭładzie razumiejuć, što situacyja ŭ Biełarusi nie mianiajecca, što represii praciahvajucca, što ludziam niebiaśpiečna viartacca dadomu i ludzi vyjazdžajuć», — skazała demakratyčnaja lidarka, kamientujučy paviedamleńni pra toje, što polskija čynoŭniki ŭsio čaściej admaŭlajuć biełarusam u mižnarodnaj abaronie.

Kiraŭnica APK zaklikała dačakacca dalejšaj statystyki: maŭlaŭ, źviestki za adzin miesiac mohuć być vyklučeńniem. Adnačasova jana padkreśliła, što zaŭsiody abmiarkoŭvaje prablemu lehalizacyi biełarusaŭ na ŭsich sustrečach:

«My zaŭždy padymajem pytańnie lehalizacyi biełarusaŭ, kali my kamunikujem i z prezidenturaj, i z ofisam premjer-ministra, ministerstva zamiežnych spravaŭ. Niadaŭna Pavieł Łatuška byŭ na aŭdyjencyi ŭ ministra ŭnutranych spravaŭ, kab abmierkavać hetaje pytańnie».

Cichanoŭskaja kanstatavała, što i davodzicca doŭha čakać dakumientaŭ, i majucca nieraźviazanyja prablemy ź piensijanierami, z «dzietkami narodžanymi», z apastylem. «Adnak niama namieru niejak mianiać staŭleńnie da biełarusaŭ», — zajaviła lidarka:

«Tak, moža, sistema zanadta pavolnaja, ci šmat pryjazdžaje ludziej, i my ŭ adnoj čarzie ź inšymi mihrantami. Tut vielmi važna, što my i robim, tłumačyć, što biełarusy — heta nie zvyčajnyja mihranty, my tut nie pavodle svajho vybaru, my vymušanyja byli źjechać».

Adnačasova Cichanoŭskaja zaznačyła, što «Polšča vielmi pryjazna stavicca da biełarusaŭ, nas nie vyšturchoŭvajuć, i ŭłady razumiejuć, što chiby, jakija jość, treba vypraŭlać». Razam z tym biełarusam nie varta spadziavacca tolki na kiraŭnicu Kabinietu:

«Ja chaču zaklikać biełarusaŭ, kab taksama byli bolš aktyŭnyja, bo tolki ŭ kabinietach heta pytańnie nie vyrašajecca. Biełarusy taksama pavinny adčuvać svaju adkaznaść, što treba być bačnymi ŭ Polščy, treba vychodzić u miedyi i tłumačyć, što my tut, tłumačyć našyja situacyi, bo kali niama razumieńnia siarod palakaŭ ci ŭ miedyjach, što ŭsio praciahvajecca, što treba biełarusam dapamahčy, što biaśpiečnaja Biełaruś u vašych intaresach taksama, to i niama adčuvańnia krytyčnaści situacyi ŭ polskich uładaŭ, i mohuć adkładać rašeńnie hetaha pytańnia na potym. To-bok, budźcie aktyŭnymi, darahija biełarusy!»

Nadoječy Śviatłana Cichanoŭskaja pryznałasia, što ŭ polskim banku joj admovilisia adkryvać rachunak z uvahi na praterminavany biełaruski pašpart. Z takoj prablemaj sutykajucca šmat jakija biełarusy ŭ vyhnańni. Pakul sustrečy kiraŭnicy Pierachodnaha kabinietu z top-mieniedžarami niekalkich bankaŭ plonu nie dali:

«Kiraŭnictva hetych bankaŭ viedaje situacyju, i kožny raz, kali biełarus prychodzić i tłumačyć, što jon nie moža viarnucca dadomu, pašpart praterminavany, — pra heta ŭsie viedajuć. Ale banki — niezaležnyja struktury, tam palityka dziaržavy nie adbivajecca na palitycy niejkaha asobnaha banku. Ryzyki adkryćcia rachunkaŭ ludziam z krainy-suahresara pieraviešvajuć, tamu voś takaja błytanina. I niama niejkaha sistemnaha padychodu, bo ja baču: adnym adkryvajuć, inšym nie adkryvajuć. Nie zaŭsiody zrazumieła, ad čaho heta zaležyć».

Cichanoŭskaja miarkuje, što i ŭ hetym pytańni zdolnyja dapamahčy samyja biełarusy.

«Tut taksama treba pracavać razam, i ŭ miedyjach pra hetuju prablemu kazać, i na vyšejšym uzroŭni, što my i robim, i pracavać z bankami. Viedajecie, my jak pieršaprachodcy: takoj situacyi raniej nikoli nie było, i my sprabujem tut pahavaryć, tut pierakanać, tam rastłumačyć. Voś tak navobmacak my sprabujem vyrašyć hetuju prablemu», — padsumavała kiraŭnica Abjadnanaha pierachodnaha kabinietu.

• 7
• 1
• 4
• 9
• 0
• 0
• 0
• 2