Stali viadomyja novyja padrabiaznaści DTZ u Hroznym: zahinuŭ kiroŭca aŭto, u jaki ŭjechaŭ kartež Adama Kadyrava

U druhoj pałovie dnia kartež Adama Kadyrava, jaki jechaŭ na vialikaj chutkaści pa Starapramysłoŭskaj šašy, sutyknuŭsia z mašynaj, što vyjazdžała na šašu z vulicy Tasujeva. Akramia abmiežavańniaŭ chutkaści, raspavioŭ «Novaj haziecie Jeŭropa» vidavočca zdareńnia, kiroŭca hałaŭnoj mašyny karteža praihnaravaŭ i čyrvony sihnał śviatłafora na skryžavańni Starapramysłoŭskaj šašy i vulicy Tasujeva.

Paškodžańni atrymali adrazu niekalki mašyn kartežu (jany nie paśpieli zatarmazić i ŭrezalisia adna ŭ adnu). Adnak macniej za ŭsio paciarpieła hałaŭnaja mašyna, u jakoj znachodzilisia syn Kadyrava i troje jaho ciełaachoŭnikaŭ. Za rulom mašyny byŭ načalnik achovy 18‑hadovaha Adama Kadyrava — Apci Iraschanaŭ, plamieńnik ministra MUS pa Čačenskaj Respublicy Asłana Iraschanava.

Usie čaćviora, uklučajučy syna Kadyrava, byli špitalizavany ŭ respublikanskuju kliničnuju balnicu chutkaj miedycynskaj dapamohi imia Chanbijeva.

U načalnika achovy Kadyrava-małodšaha Apci Iraschanava byŭ dyjahnastavany pierałom pazvanka šyjnaha adździeła, u astatnich, uklučajučy Adama Kadyrava, — traŭmy, jakija nie ŭjaŭlajuć pahrozy dla žyćcia (udary, parezy tvaru i ruk, a taksama niaznačnaja strata kryvi).

Tym nie mienš, ułady rehijona pryniali rašeńnie ab terminovaj evakuacyi Adama Kadyrava i jaho ciełaachoŭnikaŭ u Maskvu, dla čaho byŭ zadziejničany śpiecyjalizavany miedycynski bort respublikanskaha MNS. Hety samalot nazyvajuć «miedycynskim špitalem» i vykarystoŭvajuć dla transparciroŭki ciažkich pacyjentaŭ, jakim patrebna vysokakvalifikavanaja miedycynskaja dapamoha.

Ni Adam Kadyraŭ, ni jaho achoŭniki ŭ takich mierach i lačeńni, na dumku krynic, nie mieli patreby.

Zahinuły kiroŭca

Pavodle słoŭ adnaho ź lekaraŭ, jakoha pracytavała krynica vydańnia, «syn Kadyrava i jaho achoŭniki bolš paciarpieli ad padušak biaśpieki ŭ svaich darahich inamarkach, a voś prostym ludziam u mašynie, u jakuju jany ŭrezalisia z usioj dury, pašancavała mienš».

Pavodle danych «Novaj haziety Jeŭropa», kiroŭca, jaki znachodziŭsia ŭ mašynie, ź jakoj sutyknuŭsia kartež Adama Kadyrava, zahinuŭ.

Jak raspaviała krynica «Novaj haziety Jeŭropa» ŭ śledčym kamitecie Čačni, ni ŭviečary ŭ piatnicu, ni na nastupny dzień DTZ z udziełam Adama Kadyrava nie było zarehistravana ŭ knizie ŭliku zajaŭ ab złačynstvach, ab administracyjnych pravaparušeńniach i zdareńniach. «Chutčej za ŭsio, kryminalnuju spravu, jak zaŭsiody byvaje ŭ takich vypadkach, zavodzić nichto nie daść, heta značyć rasśledavańnia i pakarańnia vinavatych znoŭ nie budzie», — ličyć krynica.

• 0
• 1
• 3
• 7
• 0
• 2
• 16
• 0