Džon Koŭł: U kančatkovym vyniku meta vieści biznes ź Biełaruśsiu, viarnuć jaje ŭ mižnarodnuju supolnaść

«Heta fiłasofija dypłamatyi Donalda Trampa: vy budujecie adnosiny i hladzicie, kudy možna ruchacca dalej»

— Vy kazali, što ŭ najbližejšaj budučyni na volu mohuć vyjści jašče 1000 palitviaźniaŭ. Ciapier ciažka ŭjavić krok bolš surjozny za źniaćcie sankcyj z kaliju. Ci hatovyja ZŠA prapanavać Łukašenku što-niebudź jašče za vyzvaleńnie takoj vialikaj hrupy viaźniaŭ?

— Bolšaść sankcyj byli ŭviedzienyja praz źjaŭleńnie palitviaźniaŭ u 2020 hodzie. Tamu, kali mnohija buduć vyzvalenyja ŭ najbližejšaj budučyni, pryčyna dla abmiežavańniaŭ — abo ich častka — źniknie. Mienavita heta ja razhladaju jak prapanovu prezidentu Biełarusi.

— Bolšaść z vyzvalenych 13 śniežnia 123 čałaviek byli adpraŭlenyja va Ukrainu. Ci stała heta dla vas niečakanaściu? Kali mienavita na pieramoŭnym stale źjaviłasia pytańnie pra ŭkrainski napramak?

— Nie, heta nie było niečakanaściu. Chutčej heta było źviazana z łahistykaj, a nie z čymści inšym. Viaźni znachodzilisia fizična bližej da Ukrainy. I naša pazicyja była takoj: nam usio roŭna, dzie jany apynucca paśla vyzvaleńnia. My zabrali častku ź ich u Litvu, ale bolšaść pajechała praz Ukrainu. Heta nie było vialikaj prablemaj, heta łahistyka. Ukraincy vielmi hodna pryniali ŭsich, i my arhanizavali sustreču ludziej. Niekatoryja pajechali praz Polšču, ale naša praca — vyciahnuć ich z turmy.

Pry hetym były palitviazień Pavieł Sieviaryniec raskazvaŭ, što jaho vyvieźli z turmy ŭ Hrodnie, što na zachadzie Biełarusi, na miažu z Ukrainaj na poŭdni krainy. Jaho kanvajavali bolš za sutki ź miaškom na hałavie.

— U intervju WSJ vy zajavili, što vam «usio roŭna, z kim my razmaŭlajem. Heta sapraŭdy ŭ styli Trampa. Jakaja tabie sprava, z kim ty havoryš, kali hety čałaviek moža dać tabie toje, što ty chočaš — voś i ŭsio, što maje značeńnie». Čaho mienavita ZŠA chočuć ad Łukašenki?

— Złučanyja Štaty chočuć vyzvalić palitviaźniaŭ i raźvivać narmalnyja stasunki z vašaj krainaj. Heta praces, jaki zojmie čas, ale meta takaja: u kančatkovym vyniku vieści biznes ź Biełaruśsiu, viarnuć jaje ŭ mižnarodnuju supolnaść.

— Dzie dla vas prachodziać čyrvonyja linii ŭ znosinach z Łukašenkam? Ci jość rečy, na jakija vy nikoli nie pojdziecie dziela ździełki ź im?

— Heta pytańnie pakul nie ŭźnikała. Na hetym etapie ja nie viedaju. Ale adna reč, jakaja prapuskałasia ŭvieś hety čas: ja dumaju, što Łukašenku treba addać naležnaje za vyzvaleńnie hetych ludziej, niezaležna ad taho, dziela čaho heta robicca abo jakija jaho matyvy. Na voli ŭžo apynulisia bolš za 250 čałaviek. I kali b Łukašenka na heta nie pajšoŭ, jany ŭsio jašče byli b u turmie. Tamu ja miarkuju, što treba addać jamu naležnaje. Było b cudoŭna, kali b usie byli na voli, ale na hetym etapie ja nie znachodžusia ŭ hetym punkcie.

— Vy sustrakalisia z Łukašenkam užo trojčy. Jak vy aceńvajecie jaho jak pieramoŭnika? Ci adčuvajecca, što jon surjozna rychtujecca da vašych sustreč i dobra aryjentujecca va ŭsich temach?

— U nas vielmi dobryja dypłamatyčnyja adnosiny. My ładzim adzin z adnym. I heta toje, u što ja vieru. Pahladzicie, heta fiłasofija dypłamatyi Donalda Trampa: vy budujecie dačynieńni i hladzicie, kudy možna ruchacca dalej. I mienavita heta my robim z Łukašenkam. I heta toje, što prezident Tramp robić z usimi. Jon navat pierapisvajecca z meram Ńju-Jorka, jaki sacyjalist. Tak što ja dumaju, što fiłasofija Trampa takaja: kali sumniavaješsia — razmaŭlaj.

— Paśla ŭsich vašych sustreč ličycie vy Łukašenku dyktataram?

— Ja nie budu adkazvać na heta pytańnie ciapier. Viedajecie, na hetym etapie heta nie mnie vyrašać.

Pavialičyć

«Kali jany aryštujuć novych ludziej, to my dabiaromsia da hetaha paźniej, paśla taho, jak vyzvalim pieršuju partyju»

— Na vašu dumku, pavinna Biełaruś zastavacca ŭ arbicie Rasii ci kraina maje prava vybrać inšy, zachodni šlach?

— U samym pačatku [dyjałohu] ź Biełaruśsiu my vyznačyli, što Złučanyja Štaty i ja nie budziem umiešvacca ŭ jaje adnosiny z Pucinym abo Rasijaj. Na hety momant, jak ja ŭžo kazaŭ, naša praca — vyciahnuć palitviaźniaŭ. Što budzie paśla hetaha? Pažyviom — pabačym. Ale my nie ŭmiešvajemsia ŭ dačynieńni, jakija ŭ Łukašenki z Pucinym užo amal 30 hadoŭ. Heta nie toje, čym ja zajmajusia. Heta nie maja misija.

— U Biełarusi dahetul pieraśledujuć hramadzian za ich palityčnuju pazicyju. Z momantu, kali vy vyzvalili 123 čałavieki, 40 novych byli pryznany palitviaźniami. U 2025 hodzie ŭ Biełarusi pa palityčnych matyvach asudzili nie mienš za 1254 čałavieki. Represii ŭ našaj krainie nie spyniajucca ni na chvilinu. Ci jość siarod patrabavańniaŭ ZŠA punkt ab ich spynieńni?

— Ja budu havaryć z Łukašenkam pra heta, ale naša pazicyja — vyciahnuć tych, kaho pasadzili ŭ 2020 hodzie paśla vybaraŭ. Heta naša misija. Kali jany aryštujuć novych ludziej, to my dabiaromsia da hetaha paźniej, paśla taho jak vyzvalim pieršuju partyju. A heta ad 900 da 1000 čałaviek, usie tyja ludzi, jakija tam. Maja misija — vyciahnuć ich. Potym my pahavorym pra toje, što adbyvajecca ŭ Biełarusi.

— Na jakim etapie pieramoŭ vy daviedvajeciesia, kaho mienavita vyzvalać? U vieraśni vy kazali, što ZŠA nie farmujuć śpisy, hetym zajmajecca biełaruski bok. Ci što-niebudź źmianiłasia z taho času?

— My pracujem nad śpisam ź Biełaruśsiu. Zaraz heta ŭ pracesie. Ale tak, śpis isnuje.

— U adnym z apošnich svaich zapisaŭ u Ch vy padkreślili, što vyzvaleńnie biełaruskich palitviaźniaŭ — heta całkam zasłuha ZŠA. Tym nie mienš, Ofis Cichanoŭskaj dy inšyja palityki zajaŭlajuć, što vy ź imi kansultujeciesia. Ci tak heta i z kim z demsił vy abo vašy kalehi ŭ biełaruskim napramku padtrymlivajecie kantakt?

— Jość šmat ludziej, jakija zajaŭlajuć, što ja pracuju abo kansultujusia ź imi, ale heta nie tak. Złučanyja Štaty — voś na kaho ja pracuju. Ja nie viedaju, chto heta skazaŭ, ale ja nie kansultujusia ni z kim z hetych ludziej. Ja kansultujusia z uradam Biełarusi i ŭradam ZŠA. Voś što ja rablu.

• 2
• 0
• 1
• 3
• 0
• 0
• 0
• 0