Milicyja schavała hałoŭnaje — mahiloŭski mańjak-lifcior užo siadzieŭ za zhvałtavańnie. Ale jaho nie pravieryli na datyčnaść da zabojstvaŭ
Mahiloviec Juryj Dziamjanaŭ spyniŭsia ŭ svaich złačynstvach, bo trapiŭ na chimiju.
Siłaviki paviedamili, što narešcie znajšli mahiloŭskaha sieryjnaha zabojcu, jaki z 1996 pa 1999 hod zhvałtavaŭ i zabiŭ minimum vosiem dziaŭčat u Mahilovie, Oršy, Žodzinie, Viciebsku.
Čamu ž mańjak spyniŭsia?
«U 1999 hodzie padazravany traplaŭ u pole zroku pravaachoŭnych orhanaŭ i praz heta spałochaŭsia. U dalejšym jon žyŭ u svaim pryvatnym domie, pracavaŭ na pradpryjemstvie, dzie ŭ jaho nie było nijakich kanfliktaŭ», — raspavioŭ načalnik Hałoŭnaha ŭpraŭleńnia kryminalnaha vyšuku kryminalnaj milicyi MUS Alaksandr Kapišaŭ.
Ale milicejskija načalniki nie dahavorvajuć. Mańjak-lifcior — a z dapamohaj «Biełpoła» «Naša Niva» daviedałasia, što heta 53‑hadovy mahiloviec Juryj Dziamjanaŭ — nie prosta «traplaŭ u pole zroku siłavikoŭ». U 2001 hodzie jon navat atrymaŭ termin za sprobu zhvałtavańnia — ale tolki za adzin vypadak. Vyhladaje, što na datyčnaść da zabojstvaŭ i inšych zhvałtavańniaŭ jaho prosta nie pravieryli.
U mai 1997 hoda Dziamjanaŭ sprabavaŭ zhvałtavać hramadzianku M. K. kala mahiloŭskaha Pałaca pijanieraŭ, pahražajučy joj nažom. U 2001 hodzie pačaŭsia sud nad im, u vyniku jakoha mužčyna atrymaŭ chimiju z nakiravańniem amal na čatyry hady. U 2003 hodzie Dziamjanaŭ vyjšaŭ na svabodu pa amnistyi.
Na siońnia dakazana vosiem zabojstvaŭ, dva zamachi na zabojstva i zhvałtavańni, ździejśnienyja Dziamjanavym. Na śledčych dopytach i ekśpierymientach jon biezemacyjna i budzionna raskazvaje: «Zhvałtavaŭ trup, bo jakaja roźnica? Jana jašče ciopleńkaja, tolki nie supraciŭlajecca. Što dabru prapadać užo?»
Dziamjanaŭ abiraŭ dziaŭčyn ad 12 da 20 hadoŭ, zachodziačy za imi ŭ padjezdy, lifty i navat kvateru. Spačatku jon kazaŭ achviaram, što tolki dakraniecca da cieła i pamasturbuje, prasiŭ nie kryčać — tady, maŭlaŭ, usio skončycca dobra. Ale dziaŭčyny, naturalna, kryčali, tamu jon ich zabivaŭ.
Mužčyna ŭ svoj čas pracavaŭ u budaŭničym treście №17. Ułasnaj siamji nie zavioŭ. Jaho maci ŭžo niama ŭ žyvych. Baćka, zhodna z apošnimi najaŭnymi dadzienymi ŭ bazach BelPol, byŭ načalnikam płanavalnaha adździeła Mostabudaŭničaha ŭpraŭleńnia №1.
Zhodna ź psichałahična-psichijatryčnaj ekśpiertyzaj, Dziamjanaŭ maje «nizkija maralnyja jakaści», chvareje (i raniej chvareŭ) na źmiašany šyzoidny sacyjalny razład asoby, a taksama na množny razład pałavoj ciahi.
Śledstva prosić źviartacca da ich tych, chto maje dadatkovuju infarmacyju pra złačynnuju dziejnaść padazravanaha.
Milicyja schavała hałoŭnaje — mahiloŭski mańjak-lifcior užo siadzieŭ za zhvałtavańnie. Ale jaho nie pravieryli na datyčnaść da zabojstvaŭ3
Kamientary
Na maju lepšuju siabroŭku (tady školnicu) u Minsku ŭ dzievianostych kala liftu napaŭ padobny piersanaž. Ale ŭciok, bo pačuŭ šum čyichci krokaŭ.