«U mianie nie było miljonaŭ u 14 hadoŭ». Džaan Roŭlinh adrynuła sprobu Emy Uotsan pamirycca paśla svarki vakoł transfobii

Uotsan nabyła suśvietnuju słavu dziakujučy roli Hiermijony ŭ filmach pra Hary Potera, źniatych pavodle knih Roŭlinh. Ich adnosiny sapsavalisia, kali ŭ 2020 hodzie suprać piśmieńnicy byli vyłučany abvinavačvańni ŭ transfobii, a Uotsan publična vystupiła ŭ padtrymku transhiendarnych žančyn, piša VVS.

Na minułym tydni Uotsan zajaviła, što pa-raniejšamu lubić Roŭlinh i ŭdziačnaja joj za mahčymaść syhrać takoha piersanaža, «jakoha, kali ščyra, nie było ŭ historyi anhlijskaj litaratury».

«Ja prosta nie ŭjaŭlaju situacyi, pry jakoj ja mahła b pa jakich-niebudź pryčynach jaje skasavać, abo skasavać hety fakt, — skazała aktrysa. — Bolš za ŭsio ja chaču — i na heta spadziajusia — što ludzi, ź jakimi ja nie zhodna, buduć mianie lubić. Spadziajusia, što zmahu hetaksama lubić tych ludziej, mierkavańni jakich ja nie zaŭsiody padzialaju».

«Prosta nie znachodžu inšaha vyjścia, akramia jak trymać hetyja dźvie vidavočna niespałučalnyja rečy paasobku i spadziavacca, što kali-niebudź jany zmohuć syścisia. A moža być, pryniać, što choć hetaha nikoli nie zdarycca, abodva fakty mohuć być praŭdaj», — dadała Uotsan.

Hety post šmat chto rascaniŭ jak sprobu namacać adnosiny ź piśmieńnicaj, adnak Roŭlinh adkazała na zajavy Uotsan davoli žorstka.

U čym sutnaść sprečki?

«Jak u inšych ludziej, jakija nikoli nie žyli ŭ stałym uzroście biez paduški biaśpieki ŭ vyhladzie bahaćcia i viadomaści, u Emy vielmi mała dośviedu sapraŭdnaha žyćcia, — napisała Roŭlinh. — Jaho tak mała, što jana navat nie razumieje, nakolki mocna jana hetaha nie razumieje».

Pavialičyć

35‑hadovaja Uotsan źniałasia ŭ vaśmi filmach pra Hary Potera, jakija vychodzili z 2001‑ha da 2011 hoda. Jana ihrała adnu z hałoŭnych hieraiń sahi — maładuju čaraŭnicu Hiermijonu Hrejndžar.

Jak i vykanaŭca hałoŭnaj roli Denieł Redklif, jana dystancyjavałasia ad Roŭlinh, kali piśmieńnicu pačali krytykavać za jaje vykazvańni pra tranśpierson.

Roŭlinh pierakananaja, što sučasnyja ŭjaŭleńni pra hiendarnuju identyčnaść razmyvajuć paniaćcie bijałahičnaj pałavoj prynaležnaści i padryvajuć pravy žančyn. Niekatoryja pryraŭnoŭvajuć takuju pazicyju da transfobii, adnak piśmieńnica abvinavačvańni adkidvaje.

«Nivodzin akcior, jaki kali-niebudź ihraŭ stvoranych mnoj piersanažaŭ, nie abaviazany sa mnoj zhadžacca, — napisała Roŭlinh. — Heta nastolki ž niedarečna, jak kali b ja źviarała svajo ciapierašniaje mierkavańnie z čałaviekam, jaki byŭ maim načalnikam, kali mnie byŭ 21 hod».

Piśmieńnica pryznałasia, što joj «ciažka pazbavicca ad niekatoraha bieražlivaha staŭleńnia» da čałavieka, jakoha jana viedała z 10‑hadovaha ŭzrostu: «Da adnosna niadaŭniaha času ŭ mianie nie atrymlivałasia całkam ścierci z pamiaci dziaciej, jakija apynulisia ŭ vielizarnaj i žachlivaj kinastudyi i jakija pramaŭlali svaje repliki pierad kamieraj tolki paśla łaskavych uhavoraŭ».

Abvastreńnie sprečki: što nasamreč skazała Uotsan?

Roŭlinh adznačyła, što «pavarotnym punktam» dla jaje staŭ vystup Uotsan na cyrymonii ŭručeńnia pryzoŭ Brytanskaj akademii kino i televizijnych mastactvaŭ (BAFTA) u 2022 hodzie.

Viadučaja Rebieł Uiłsan pradstaviła aktrysu tak: «Jana z honaram nazyvaje siabie fieministkaj, ale my ŭsie viedajem, što nasamreč jana viedźma». Uotsan u adkaz zajaviła, što «pradstaŭlaje tut USICH viedźmaŭ» — i hetu remarku mnohija traktavali jak vykazvańnie ŭ padtrymku trans-supolnaści.

Zatym aktrysa pramoviła dva słovy adnymi vusnami — i niekatoryja paličyli, što jana skazała «akramia adnoj» («bar one»). U takim vypadku možna było b padumać, što jana maje na ŭvazie Roŭlinh. Ale pakolki jaje słoŭ nie było čuvać, takuju traktoŭku nielha ličyć adnaznačnaj — nasamreč Uotsan mahła skazać i prosta «darečy kažučy» («by the way»).

Roŭlinh pryznałasia, što bolš za ŭsio jaje zasmuciła zapiska Uotsan, jakuju taja adpraviła joj na piku skandału vakoł abvinavačvańniaŭ u transfobii. Choć u aktrysy byŭ numar telefona Roŭlinh, jana abmiežavałasia karotkaj frazaj: «Mnie vielmi škada, što vam davodzicca praz usio heta prachodzić».

«I heta zdaryłasia ŭ momant, kali mnie aktyŭna pahražali śmierciu, zhvałtavańniem i katavańniami. Kali mnie pryjšłosia značna ŭzmacnić miery pa zabieśpiačeńni ŭłasnaj biaśpieki i ja pastajanna bajałasia za svaju siamju, — piša Roŭlinh. — A Ema publična padlivała aleju ŭ ahoń, ale pry hetym ličyła, što jaje adnaskładovaje vykazvańnie zakłapočanaści zapeŭnić mianie ŭ jaje hłybokim supieražyvańni i dabryni».

Piśmieńnica dadała, što z-za svajho stanovišča Uotsan, «vierahodna, nikoli nie spatrebicca» vykarystoŭvać tyja žanočyja prybiralni i pakoi dla pieraapranańnia, da jakich, na jaje dumku, nie pavinny mieć dostup trans-piersony.

«U mianie nie było miljonaŭ u 14 hadoŭ. Ja žyła ŭ biednaści — i pry hetym pisała knihu, dziakujučy jakoj Ema stała znakamitaj, — nahadała Roŭlinh. — Tamu na asnovie svajho asabistaha dośviedu ja razumieju, što nasamreč značyć dla žančyn i dziaŭčynak, jakija nie majuć jaje pryvilejaŭ, źniščeńnie pravoŭ žančyn, u jakim z takim impetam udzielničaje Ema».

«Darosłyja ludzi nie pavinny ličyć, što jany mohuć adnačasova znacca z aktyvistami, jakija rehularna zaklikajuć da zabojstva ich siabra, i pry hetym pradjaŭlać pravy na luboŭ hetaha byłoha siabra — tak, byccam by havorka idzie pra ich maci», — ličyć aŭtarka «Hary Potera».

«U Emy, viadoma ž, jość poŭnaje prava nie zhadžacca sa mnoj — i navat publična havaryć pra svaje pačućci da mianie. Ale ŭ mianie jość toje ž samaje prava — i ja narešcie vyrašyła im skarystacca», — zajaviła Roŭlinh.

• 27
• 0
• 1
• 3
• 0
• 2
• 0
• 0