Minułaj nočču Rasija naniesła samy mahutny za ŭsiu vajnu ŭdar pa ŭkrainskich hazavych abjektach
U noč na 3 kastryčnika Rasija ździejśniła samy maštabny za ŭsiu vajnu ŭdar pa hazavych abjektach Ukrainy, paviedamiła ŭkrainskaje pradpryjemstva «Naftahaz».
Pavodle źviestak «Naftahaza», pad ataku trapili pradpryjemstvy pa zdabyčy i pierapracoŭcy hazu ŭ Charkaŭskaj i Pałtaŭskaj abłaściach. Častka ź ich atrymała krytyčnyja paškodžańni.
Ukrainskija vajskoŭcy paviedamili, što ŭ napadzie było vykarystana 35 rakiet i 381 bieśpiłotnik, asnoŭnaj metaj stali abjekty enierhietyčnaj infrastruktury.
Kiraŭnik «Naftahaza» Siarhiej Karecki nazvaŭ heta metanakiravanym teroram suprać mirnych abjektaŭ, jakija zabiaśpiečvajuć ludziej ciapłom i hazam. Jon padkreśliŭ, što ŭdary nie majuć vajennaha sensu, ich meta — sarvać aciaplalny siezon.
Minabarony Rasii, u svaju čarhu, zajaviła, što ŭdary nibyta nanosilisia pa vajskova-pramysłovych pradpryjemstvach i enierhietyčnych abjektach, jakija ich zabiaśpiečvali.
Ukrainski bok śćviardžaje, što Maskva ŭžo treciuju zimu zapar vykarystoŭvaje vyprabavańni choładam i razbureńni enierhasistemy jak instrumient cisku na hramadzian. Premjer-ministarka Ukrainy Julija Śvirydzienka abvinavaciła Rasiju ŭ tym, što jana sprabuje pazbavić ludziej mahčymaści pierazimavać u ciaple.
Kamientary