Rasijskija rakiety navučylisia abychodzić Patriot: abarona Kijeva słabieje

U apošnija miesiacy pavialičyłasia kolkaść rasijskich razburalnych avijaŭdaraŭ pa terytoryi Ukrainy. I heta, jak piša Financial Times, śviedčać, što Maskva damahłasia istotnaj madernizacyi svaich rakiet, zrabiŭšy ich bolš efiektyŭnymi suprać ukrainskaj supraćpavietranaj abarony, uklučajučy amierykanskija kompleksy Patriot.

Pavodle infarmacyi, jakuju Financial Times atrymała ad ukrainskich i zachodnich aficyjnych asob, havorka idzie pra madyfikacyju mabilnych kompleksaŭ «Iskander-M» (dalnaść palotu zapuščanych rakiet składaje da 500 km) i aerabalistyčnych rakiet «Kinžał», jakija mohuć pralacieć adlehłaść da 480 kiłamietraŭ.

Kali raniej ich trajektoryja była ŭ cełym pradkazalnaj, to ciapier rakiety zdolnyja na finalnym učastku palotu vykonvać składanyja manieŭry: rezka mianiać kurs, błytać radary i pierachodzić u amal viertykalnaje pikiravańnie.

Heta značna ŭskładniaje pracu sistem Patriot, jakija źjaŭlajucca adzinymi va ŭkrainskim arsienale, zdolnymi źbivać balistyčnyja celi.

U toj čas, jak kryłatyja rakiety mohuć źbivacca inšymi, mienš składanymi sistemami SPA, suprać balistyčnych pahroz efiektyŭnyja tolki «Petryjoty». Adzin z byłych ukrainskich čynoŭnikaŭ nazvaŭ hetyja źmieny «pierałomnym momantam dla Rasii».

Pavialičyć

Pavodle publičnych dadzienych ukrainskich VPS, sabranych łondanskim Centram infarmacyjnaj ustojlivaści i praanalizavanych Financial Times, uzrovień pierachopu balistyčnych rakiet va Ukrainie palepšyŭsia za leta, dasiahnuŭšy 37% u žniŭni, ale ŭ vieraśni rezka ŭpaŭ da 6%, niahledziačy na mienšuju kolkaść zapuskaŭ.

Niadaŭna Vajenna-pavietranyja siły Ukrainy paviedamili, što ŭsie čatyry zapuščanyja za noč rakiety «Iskander-M» abminuli abaronu i dasiahnuli svaich celaŭ.

Pavodle paviedamleńniaŭ, hetym letam u Kijevie i vakolicach byli mocna paškodžany rakietami jak minimum čatyry zavody pa vytvorčaści bieśpiłotnikaŭ, u tym liku pradpryjemstva, jakoje vyrablała tureckija drony Bayraktar. Padčas adnoj z takich atak rakiety nie tolki parazili cech pa vytvorčaści kampanientaŭ dla BPŁA, ale i paškodzili raźmieščanyja pobač ofisy pradstaŭnictva ES i Brytanskaha savieta.

Hetyja danyja paćviardžajucca i ŭ spravazdačy Ahienctva vajennaj raźviedki ZŠA (DIA), dzie adznačajecca, što Uzbrojenyja siły Ukrainy sutyknulisia ź ciažkaściami pry vykarystańni Patriot z-za niadaŭnich taktyčnych udaskanaleńniaŭ Rasii.

Technałahičnaja honka

Analityki miarkujuć, što Rasija dasiahnuła hetaha nie za košt darahich aparatnych źmien, a šlacham prahramnaj madernizacyi sistem naviadzieńnia. Maskva analizuje danyja ab pierachopach i ŭnosić karektyvy, kab zrabić palot rakiety maksimalna składanym dla sistem SPA.

U adkaz Ukraina pieradaje infarmacyju ab pracy Patriot u Pientahon i amierykanskim vytvorcam (Raytheon i Lockheed Martin) dla raspracoŭki kontrzachadaŭ. Adnak, pa słovach adnaho z čynoŭnikaŭ, hetyja abnaŭleńni časta nie paśpiavajuć za chutkaściu rasijskich taktyčnych źmien.

Akramia techniki, Rasija metanakiravana paluje na sami kompleksy Patriot i na ich vysokakvalifikavanych apierataraŭ. Tak, u śniežni 2024 hoda padčas rasijskaha ŭdaru zahinuŭ padpałkoŭnik Dzianis Sakun, hałoŭny inžynier zienitna-rakietnaha padraździaleńnia, jaki ŭdzielničaŭ u pieršym u śviecie paśpiachovym pierachopie rakiety «Kinžał».

Pahroza napiaredadni zimy

Novaja taktyka Rasii stvaraje asabliva vostruju pahrozu napiaredadni zimy. Prezident Uładzimir Zialenski papiaredžvaje, što Maskva, vierahodna, vierniecca da svajoj tradycyjnaj stratehii — masavych udaraŭ pa enierhietyčnaj infrastruktury, kab pahruzić krainu ŭ ciemru i źnizić maralny duch nasielnictva.

Adnak sioleta, z ulikam pavyšanaj efiektyŭnaści rasijskich rakiet, hetaja pahroza stanovicca značna bolš surjoznaj, čym minułaj zimoj.

Ukraina nie raskryvaje dakładnuju kolkaść i raźmiaščeńnie svaich sistem, ale viadoma, što było pastaŭlena jak minimum šeść batarej, a kampanienty jašče dla troch niadaŭna prybyli z Hiermanii i Narviehii. Hetaha katastrafična niedastatkova dla abarony ŭsioj krainy. Mienavita tamu Zialenski nastojliva zaklikaje zachodnich partnioraŭ paskoryć pastaŭki, prapanujučy nabyć da dziesiaci poŭnych kompleksaŭ Patriot.

Razam z prośbami ab pastaŭkach novych sistem SPA Kijeŭ padkreślivaje nieabchodnaść inšaha, nie mienš važnaha kroku. Ukrainskija dypłamaty nastojvajuć na tym, kab partniory pierakryli kanały pastavak zachodnich kampanientaŭ u Rasiju, u tym liku praz takija krainy, jak Kitaj. Bo pakul Maskva maje dostup da sučasnych technałohij, jana budzie praciahvać udaskanalvać svaju zbroju, robiačy abaronu ŭsio bolš składanaj i darahoj.

• 1
• 0
• 0
• 0
• 2
• 4
• 5
• 0