Što pahražaje mahiloŭskamu mańjaku-lifcioru? Jurydyčny kazus, ale maksimum za vosiem trupaŭ — 15 hadoŭ kałonii
Pa palityčnych spravach ciapier dajuć bolš, čym za sieryju zabojstvaŭ atrymaje mańjak Juryj Dziamjanaŭ.
Samaja hučnaja historyja apošnich dzion — aryšt 53‑hadovaha mahiloŭskaha mańjaka Juryja Dziamjanava, jaki ŭ kancy 1990‑ch zabiŭ minimum vosiem dziaŭčat, a paśla zaloh na dno. U situacyjach z takoj kolkaściu achviar biełaruskija sudy čaściakom prysudžajuć rasstreły, ale Dziamjanavu, chutčej za ŭsio, pašancuje — za jaho zhulaŭ čas.
Dziamjanaŭ ździajśniaŭ svaje złačynstvy ŭ 1996‑1999 hadach. Ciapierašni Kryminalny kodeks zapracavaŭ tolki ŭ 2001 hodzie, tamu mańjaka pavinny sudzić pa Kryminalnym kodeksie BSSR 1960 hoda.
Naŭmysnaje zabojstva bolš čym dvuch čałaviek (art. 100 Kryminalnaha kodeksa BSSR) — asabliva ciažkaje złačynstva. Za jaho praduhledžvałasia ad 8 da 15 hadoŭ kałonii albo rasstreł.
U Dziamjanava buduć jašče artykuły za zhvałtavańnie, ale ŭ lubym razie zabojstva — samaje ciažkaje ź jaho składu złačynstva.
Zhodna z tahačasnymi praviłami, terminy daŭniny dla asabliva ciažkaha złačynstva składali 10 hadoŭ. Ale vyklučeńnie rabiłasia dla situacyj, kali čałavieku moh by pahražać rasstreł — i heta jakraz vypadak Dziamjanava. Pytańnie, ci całkam vyzvalać u takoj situacyi złačyncu ad adkaznaści za daŭninoj padziej, vyrašaje sud.
Adnak u lubym razie rasstrelvać u takoj situacyi nielha (artykuł 46 Kryminalnaha kodeksa BSSR). Maksimalnaje pakarańnie dla Dziamjanava — 15 hadoŭ kałonii.
Praŭda, dla śledčych zastajecca ščylina — ciačeńnie terminaŭ daŭniny prypyniajecca, kali čałaviek ździajśniaje novaje naŭmysnaje złačynstva. Adnak heta vielmi składanaja schiema — treba budzie šukać niekalki novych surjoznych złačynstvaŭ, jakija Dziamjanaŭ rabiŭ z 1999 hoda, kab raz za razam «praciahvać» termin daŭniny pa zabojstvach i zhvałtavańniach.
Toje, što Dziamjanaŭ adsiadzieŭ u pačatku 2000‑ch za sprobu zhvałtavańnia, ničoha nie mianiaje — jon adkazvaŭ za złačynstva, ździejśnienaje ŭ 1997 hodzie. A jano navat starejšaje za jaho apošnija zabojstvy.
Kali mańjak atrymaje maksimalna mahčymy termin, jon vyjdzie na svabodu raniej za 2040‑y — jamu tady budzie kala 68 hadoŭ.
Zrešty, pakul nieviadoma, ci ŭvohule Dziamjanaŭ budzie adkazvać pierad zakonam — u lubym razie jaho čakaje psichijatryčnaja ekśpiertyza, jakaja vyznačyć jaho adekvatnaść.
Staraja ekśpiertyza ŭžo vyznačała ŭ jaho šyzoidny sacyjalny razład asoby, ale tady miedyki paličyli, što jon pavinien adkazać za sprobu zhvałtavańnia.
U Mahilovie złavili mańjaka-lifciora, jaki ŭ 1990‑ia zhvałtavaŭ i zabiŭ vosiem dziaŭčat
Jak tak vyjšła, što mahiloŭski mańjak-lifcior, jaki zabiŭ vosiem dziaŭčat, spyniŭsia paśla 1999 hoda?
Milicyja schavała hałoŭnaje — mahiloŭski mańjak-lifcior užo siadzieŭ za zhvałtavańnie. Ale jaho nie pravieryli na datyčnaść da zabojstvaŭ
Vypadkovy śviedka zaśpieŭ mańjaka-lifciora kala achviary. I paprasiŭ jaho pabyć pobač z zabitaj dziaŭčynaj, pakul nie pryjedzie milicyja
«Zabili maju siastru, a praź niekalki miesiacaŭ zdaryłasia trahiedyja sa školnicaj». Biełaruski — pra mańjaka, jakoha łavili 25 hadoŭ
Kamientary