Krainy Jeŭrasajuza nie zmahli damovicca pra stvareńnie «ściany ad dronaŭ»
Jeŭrapiejskija krainy nie zdoleli damovicca nakont stvareńnia tak zvanaj «ściany ad dronaŭ», jakaja pavinna była b abaranić ich ad bieśpiłotnikaŭ z Rasii. Nieprymańnie vyklikajuć jak sama ideja, tak i jaje nazva, piša Politico.
Dla dziaržaŭ na ŭschodnim fłanzie NATA — ad Finlandyi da Rumynii — antydronavaja sistema vyhladaje nieabchodnaj, bo jany rehularna sutykajucca z zalotam rasijskich i «nieviadomych» bieśpiłotnikaŭ. Adnak krainy, što znachodziacca dalej ad miažy, ličać ideju zanadta darahoj i sumniavajucca, jak jana budzie spałučacca z płanami ES i NATA. Niekatorych taksama niepakoić, što Brusel atrymaje zanadta vialiki ŭpłyŭ na nacyjanalnuju abaronnuju palityku.
Na samicie ŭ Kapienhahienie prezident Francyi Emanuel Makron adznačyŭ, što abarona ad dronaŭ — važny pryjarytet, ale «idealnaj ściany dla Jeŭropy nie isnuje»: zakryć usiu miažu ŭ 3000 kiłamietraŭ prosta niemahčyma. Fiederalny kancler Hiermanii Frydrych Mierc taksama vykazaŭsia suprać płana vielmi rezka, choć u samoj Hiermanii niadaŭna ŭźnikli prablemy ź nieviadomymi dronami, u tym liku na terytoryi aeraporta Miunchiena.
Jeŭradeputatka Channa Nojman padkreśliła, što adna ściana nie vyrašyć asnoŭnych prablem biaśpieki: jana nie abaronić ad kibiernapadaŭ, nie dapamoža z supraćpavietranaj abaronaj i vytvorčaściu bojeprypasaŭ.
Jeŭrakamisar pa abaronie Andrus Kubilus zajaviŭ, što sistemu vyjaŭleńnia dronaŭ možna stvaryć prykładna za hod, ale na poŭnafunkcyjanalnuju sietku na sušy i mory spatrebicca značna bolš času i srodkaŭ. Tolki dla Polščy i Bałtyjskich krain prajekt moža kaštavać kala 1 miljarda jeŭra. Kubilus pryznaŭ, što nazyvać hety prajekt «ścianoj» nie zusim pravilna — heta nie pavinna stać «novaj linijaj Mažyno».
Razmovy abvastryła i finansavaja častka: krainy z uschodu chočuć vykarystoŭvać na budaŭnictva sistemy hrošy ES, u toj čas jak lidaraŭ Italii i Hrecyi turbuje, što taki prajekt budzie karysny tolki ŭschodnim dziaržavam, a nie ŭsiamu Jeŭrasajuzu.
Ciapier čytajuć
Kryk dušy Žyhara pra hrupu Kavaleŭskaha: Hučać zajavy, što Łukašenka lehitymny prezident, choć i nie abrany demakratyčna30
Kamientary
Tak, u postmadernie hałoŭnaje navat nie sama sprava, a jaje jaje nazvać!)