Sikorski pra intervju Mierkiel: Kanclerka zabyłasia, čym zajmaŭsia jaje ŭrad
Ministr zamiežnych spraŭ Polščy Radasłaŭ Sikorski rezka adreahavaŭ na vykazvańni byłoj kanclerki Hiermanii Anhieły Mierkiel, jakaja ŭ intervju vienhierskamu žurnalistu zajaviła, što ŭ 2021 hodzie Jeŭrasajuz nie zmoh arhanizavać pramyja pieramovy z Uładzimiram Pucinym z-za piarečańniaŭ Polščy i krain Bałtyi.
Sikorski adznačyŭ, što ŭsprymaje słovy Mierkiel hetak ža sama, jak i jaje papiaredniuju zajavu pra toje, što nichto z Centralnaj Jeŭropy nie vystupaŭ suprać budaŭnictva Nord Stream. Jon nahadaŭ:
«Nahadaju, što ja tady kazaŭ, što nam nie padabajucca pahadnieńni nad našymi hałovami. Kanclerka zabyłasia, jak heta vyhladała tady i čym zajmaŭsia jaje ŭrad».
Kamientar palityk zrabiŭ padčas sustrečy z žurnalistami paśla pieramoŭ ź ministarkaj zamiežnych spraŭ Finlandyi Elinaj Vałtanien u Varšavie.
U razmovie ź vienhierskim vydańniem Anhieła Mierkiel raskazała, što ŭ 2021 hodzie razam z Emanuelem Makronam chacieła arhanizavać dyjałoh pamiž Jeŭrasajuzam i Uładzimiram Pucinym, bo ŭžo tady adčuvała, što «Minskija damovy stračvajuć sens». Ale suprać hetaha vystupili Polšča i krainy Bałtyi, jakija ličyli, što ŭ ES niama adzinaj palityki ŭ adnosinach da Maskvy.
Mierkiel uznačalvała ŭrad Hiermanii z 2005 pa 2021 hod, a ciapier znachodzicca na piensii. U 2024 hodzie jana apublikavała svaje miemuary pad nazvaj «Svaboda. Uspaminy 1954—2021».
Kamientary
Skiorkski trapna adkazaŭ. Chacia kali b nie aficyjnaja pasada, moh b jašče macniej.