U Babrujsku za 200 tysiač dalaraŭ pradajuć były armiejski štab. Ciapier u im raźmiaščajecca sinahoha
U Babrujsku novych ułaśnikaŭ šukaje nie samy zvyčajny budynak. Heta — były armiejski štab. Budynak, raźmieščany niepadalok ad Biareziny i Babrujskaj krepaści, pradajecca za daŭhi ŭłaśnika — pryvatnaj kampanii.
Tarhi za były vajskovy budynak, u jakim zaraz «kvataruje» ŭ tym liku i sinahoha, projduć na elektronnaj placoŭcy «BiełJurZabieśpiačeńnie». Pačatkovaja cana składaje krychu bolš za 200 tysiač dołaraŭ, piša Realt.by.
Były štab (tam ža kaliści raźmiaščałasia i stałovaja) znachodzicca ŭ Babrujsku, na vulicy Kirava, 25Je. Heta — davoli cichaje miesca, niedaloka ad rek Babrujka i Bierazina.
Z 1947 hoda ŭ Babrujsku raźmiaščałasia 5‑ia Hvardziejskaja tankavaja armija. U 1992 hodzie jaje rasfarmiravali. Pabudovy, jakija zastalisia paśla sychodu vajskoŭcaŭ, byli pieradadzieny na bałans dziaržavy, niekatoryja ź ich paźniej trapili ŭ pryvatnyja ruki. Tak adbyłosia i sa štabam na vulicy Kirava. Zaraz budynak znachodzicca ŭ zdavalniajučym stanie. Jaho pamiaškańni zdajucca ŭ arendu roznym arhanizacyjam. Siarod arandataraŭ — kapiravalny centr, prakat aŭtamabilaŭ i… sinahoha. Tak, mienavita tut znachodzicca sinahoha «Babrujski dvoryk».
Ahulnaja płošča pabudovy naličvaje 4287 kvadratnych mietraŭ. U skład łota ŭvachodzić trochpaviarchovy budynak z prybudovami i padvałam. Abjekt raźmieščany na ziamielnym učastku płoščaj 57 sotak. Nadzieł dastaniecca novamu ŭłaśniku na pravie arendy.
Adznačajecca, što budynak pradajecca za daŭhi ŭłaśnika — kampanii «Start-Korp», jakaja zajmajecca aptovym i roźničnym handlem. Siarod składaniaściaŭ — aryšt, zabarona ździajśnieńnia rehistracyjnych dziejańniaŭ sudovaha vykanaŭcy i arendnyja abaviazacielstvy.
Tarhi za byłuju vajskovuju pabudovu pačnucca z 619 tysiač rubloŭ (206 tysiač dalaraŭ). Zajaŭki prymajucca da 27 kastryčnika.
Aŭkcyjon projdzie 28 kastryčnika na elektronnaj placoŭcy «BiełJurZabieśpiačeńnie».
Darečy, pobač sa štabam za daŭhi taho ž ułaśnika pradajecca i były vajenny cir. Pabudovu płoščaj 189 kvadrataŭ acanili ŭ 55,9 tysiač rubloŭ (18,5 tysiačy dalaraŭ).
Ciapier čytajuć
Mackievič: Cichanoŭskuju źniać, zamianić, pieraabrać nielha. Nie mučajciesia. Nielha — i ŭsio38
Kamientary