«Mielnikava nie abaviazkova ahientka KDB, jana moža być achviaraj. A Łabiejeŭ jaje kupiŭ tym, što nazvaŭsia adzinokim baćkam ź dziećmi»
Z sakavika nieviadoma, dzie śpikierka Kaardynacyjnaj rady Anžalika Mielnikava. Byłaja polskaja kontrraźviedčyca zajaviła, što Mielnikava była ahientkaj KDB i ŭ Polščy «vykonvała zadańnie». Rasśledavalnik The Insider nie bačyć śviedčańniaŭ pra heta — i nie vyklučaje, što Mielnikava ciapier moža być nie ŭ Biełarusi, piša «Biełsat».
Major kontrraźviedki Ahienctva ŭnutranaj biaśpieki Polščy ŭ adstaŭcy, rabotnica fakultetu mižnarodnych adnosinaŭ Biełastockaha ŭniviersitetu Hanna Hraboŭska-Siviec vykazała ŭ efiry telekanała «TVP Info» viersiju źniknieńnia śpikierki Kaardynacyjnaj rady Anžaliki Mielnikavaj. Na jaje dumku, Mielnikava prajšła padrychtoŭku, pierad joj byli pastaŭlenyja vielmi kankretnyja zadačy na terytoryi Polščy. Kiraŭnik NAU Pavieł Łatuška, paplečnicaj jakoha ličyłasia Mielnikava, u repartažy «TVP Info» čarhovy raz zajaviŭ: jon nie vieryć, što jana była ahientkaj. U hetuju viersiju nie pavieryŭ i suaŭtar rasśledavańnia, u jakim vyjaviłasia, što Mielnikava sustrakałasia z ahientam śpiecsłužbaŭ Biełarusi.
Šef-redaktar The Insider Cimur Aleŭski raskazaŭ u «Studyi «Biełsatu», što jaho nie ździviła zajava pra suviaź Mielnikavaj sa śpiecsłužbami Biełarusi — a ździviła, što pra heta pačali kazać tolki ciapier i ŭ takich vyrazach.
Aleŭski zhadaŭ supolnaje rasśledavańnie «The Insider» i «Polityka» pra toje, što ŭ Mielnikavaj byŭ chłopiec Alaksiej Łabiejeŭ, jaki mieŭ pašpart prykryćcia i pavodziŭ siabie jak kuratar sa śpiecsłužbaŭ. Łabiejeŭ akazaŭsia litaralna ahientam Kamitetu dziaržaŭnaj biaśpieki Biełarusi. «Kibierpartyzany» paźniej vyśvietlili, što Łabiejeŭ z žonkaj zajmajucca kontrvyviednaj dziejnaściu, što jon ź inšymi ahientami zajmalisia pravakacyjami suprać biełaruskich apazicyjanieraŭ, u tym liku inscenizacyjaj zamachu na prapahandysta Ryhora Azaronka.
Vyjaviłasia taksama, što Łabiejeŭ vałodaŭ śpiecyjalnymi technikami pikapu — zalacańnia da dziaŭčat. Aleŭski adznačyŭ, što ahułam u pikap nie vieryć, ale heta technika, jakaja dazvalaje raźniavolena pavodzicca ź ludźmi supraćlehłaha połu i dapamahaje manipulavać ludźmi. Adna z krynicaŭ Aleŭskaha raspaviała, što bačyła, jak Łabiejeŭ paznajomiŭsia ź Mielnikavaj u čacie, kali jana jašče była ŭ Biełarusi, i začaravaŭ jaje apoviedami pra toje, «jaki jon cudoŭny čałaviek».
«Roznym žančynam u roznych čatach jon davaŭ roznuju lehiendu, — pierakazvaje Aleŭski słovy krynicy pra Łabiejeva. — Pierad kimści jon vystupaŭ žarsnym łaviełasam, a adnosna Anžaliki pavodziŭsia adzinokim baćkam ź dziećmi, jaki razam ź joj abmiarkoŭvaŭ pytańni vychavańnia dziaciej».
Łabiejeŭ užo ŭ 2021 hodzie byŭ u atačeńni Mielnikavaj — u momant jaje źjaŭleńnia ŭ Polščy. Pry tym u Mielnikavaj tady jašče byŭ muž, jaki rehularna jeździŭ u Biełaruś. Hraboŭska-Siviec vykazała zdahadku, što muž Mielnikavaj moh być «formaj suviazi».
Aleŭski nie nastojvaje na tym, što Mielnikava daŭno viedała, što Łabiejeŭ — ahient. Ale ž jana jašče da adjezdu ź Biełarusi viedała jaho asabista. Aleŭski adznačaje, što vakoł Mielnikavaj «daŭno vili sietku» — i mahčyma, što ŭ niejki momant «zaciahnuli piatlu na šyi», prymusili supracoŭničać. Jon źviartaje ŭvahu na słovy Hraboŭskaj-Siviec, ź jakich možna zrabić vysnovu: «Mielnikava — nie achviara, a suŭdzielnica». Aleŭski takich źviestak nie maje.
Siarod tych, chto šukaje Mielnikavu, suzasnavalnik fondaŭ «By_help» i «Bajsoł» Alaksiej Lavončyk, jaki navat abviaščaŭ hrašovuju ŭznaharodu za źviestki, što dapamohuć u pošuku. Jon raskazvaŭ «Biełsatu», što atrymlivaŭ šerah videa, na jakich niby Mielnikava. Ale z hetych videa niemahčyma było vyznačyć asobu abo łakacyju. Aleŭski pryznaje, što i jahonaja kamanda nie zmahła vyznačyć, dzie ciapier Mielnikava.
Šlach hublajecca ŭ Dubai, dzie jana była ŭ hateli razam ź dziećmi, raskazvaje Aleŭski. Niezrazumieła, kudy jana źlacieła. Moža, i ŭ Biełaruś, u Niaśviž, ale pra heta jość tolki čutki, jakija niemahčyma paćvierdzić.
«Ja dumaju, što kali b jana chadziła pa Niaśvižy, heta było b bolš, čym čutki, — ličyć Aleŭski. — Miarkujučy pa tym, što ničoha akramia čutak niama, u mianie jość zdahadka, što ich raspaŭsiudžvajuć tyja ž supracoŭniki KDB ź niejkich pryčynaŭ».
Varyjantaŭ šmat, razvažaje jon: moža, jaje vykarystoŭvajuć jak ahientku dzieści jašče; moža, jaje nie zmahli pryvieźci ŭ Biełaruś; moža, u jaje losie adbyvajecca jašče niešta dziŭnaje. Ale nijakich śladoŭ hetaha nie źjaviłasia.
U polskaj vyviedki, adznačaje Aleŭski, bolš mahčymaściaŭ, čym u žurnalistaŭ-rasśledavalnikaŭ: vyviedniki musili b mieć mahčymaść sačyć za pierachodam miežaŭ. Ale mahčyma, što z Dubaju Mielnikava pieramiaściłasia na terytoryju Sadružnaści niezaležnych dziaržavaŭ, i tamu polskaja vyviedka nie moža atrymać źviestki pra miežy. A kali b polskaja vyviedka viedała, što Mielnikava znachodzicca ŭ Biełarusi i supracoŭničała z KDB, to kazała b pra heta bolš upeŭniena, ličyć Aleŭski. A kali nie kaža, to, ličyć jon, polskaja vyviedka taksama nie viedaje, dzie Mielnikava: ci jana ŭciakła ad KDB, ci ŭdzielničaje ŭ inšaj apieracyi, ci jaje pakinuli ŭ spakoi.
«My z roznymi krynicami razmaŭlali, — zhadvaje Aleŭski. — Ź ludźmi, jakija jaje vielmi blizka asabista viedali. I ŭ tym liku ŭ mianie byŭ čałaviek, krynica, jaki ź joj razmaŭlaŭ absalutna dakładna — ja nie sumniajusia — užo paśla jaje źniknieńnia. I jon mnie vielmi pierakanaŭča sprabavaŭ skazać, što jana dobry čałaviek i nie stała kiepskim čałaviekam, jak pra jaje dumajuć. Nijakich dokazaŭ hetamu čałaviek pryvieści nie zmoh, ale hetuju emacyjnuju razmovu ja vielmi dobra zapomniŭ».
Hetaja razmova stała dla Aleŭskaha dobraj padstavaj praciahnuć pošuki, a nie rabić zaŭčasnyja vysnovy. Jon usio jašče ličyć: jość davoli vialikaja imaviernaść taho, što Mielnikava nie ŭ Biełarusi. I polskaja vyviedka, miarkuje jon, taksama moža tak dumać.
***
Śpikierka Kaardynacyjnaj rady Anžalika Mielnikava pakinuła terytoryju Polščy i Jeŭrasajuza 26 lutaha 2025 hoda i palacieła ŭ Łondan. Pavodle rasśledavalnikaŭ, za dzień da vyletu jana zareziervavała numar u piacizorkavym hateli na Šry-Łancy, dzie ŭžo byvała raniej. Z 28 lutaha da 7 sakavika Mielnikava žyła ŭ tym hateli ź dziećmi. 7 sakavika Mielnikava ź dziećmi palacieła ŭ Dubaj, tam jaje śled hublajecca. 25 sakavika jana pierastała vychodzić na suviaź. Dzie jana i što ź joj, niama infarmacyi.
Aficyjna było zajaŭlena pra jaje źniknieńnie 28 sakavika.
Kaardynacyjnaja rada zajaŭlała, što 13 sakavika ź jaje akaŭnta byli spampavanyja dakumienty, jakija datyčacca pracy arhanizacyi.
U tym ža miesiacy, pavodle źviestak «Kibierpartyzanaŭ», Mielnikava pieraviała na asabisty rachunak bolš za 150 tysiač dołaraŭ sa srodkaŭ fondu Białoruś Liberty. Viadoma taksama, što pierad źniknieńniem jana lotała na Kubu i ŭ Šry-Łanku razam z Alaksiejem Łabiejevym, supracoŭnikam łukašenkaŭskich śpiecsłužbaŭ.
Kamientary