Eks-aficer polskaj kontrraźviedki: Mielnikava supracoŭničała sa śpiecsłužbami Biełarusi jašče da emihracyi
«Mielnikava prajšła padrychtoŭku, byli pastaŭleny vielmi kankretnyja zadačy. I hetyja zadačy jana vykonvała na terytoryi Polščy», — miarkuje Hanna Hraboŭska-Siviec.
Źnikłaja śpikierka Kaardynacyjnaj rady (KR) Anžalika Mielnikava supracoŭničała ź biełaruskimi śpiecsłužbami i była pryciahnutaja da hetaha jašče da emihracyi — takoje mierkavańnie vykazała major kontrraźviedki Ahienctva ŭnutranaj biaśpieki Polščy ŭ adstaŭcy, supracoŭnica fakulteta mižnarodnych adnosin Biełastockaha ŭniviersiteta (doktar) Hanna Hraboŭska-Siviec u prahramie «Śpiecyjalny repartaž» u efiry polskaha telekanała TVP Info 5 kastryčnika, piša «Pozirk».
Vypusk pad nazvaj «Apieracyja Mielnikava» byŭ pryśviečany jaje źniknieńniu.
«Mielnikava prajšła padrychtoŭku, byli pastaŭleny vielmi kankretnyja zadačy. I hetyja zadačy jana vykonvała na terytoryi Polščy», — skazała Hraboŭska-Siviec.
Uzajemaadnosiny z byłym mužam, jaki svabodna pryjazdžaŭ da pradstaŭnicy demakratyčnych sił u Polšču ź Biełarusi i viartaŭsia nazad, «byli formaj suviazi», miarkuje śpikierka. Były muž palityčnaj dziejački znachodziŭsia pad nahladam biełaruskich śpiecsłužb, pierakananaja jana.
«[Heta] padtrymańnie pastajannaha kantaktu, prykrytaje vielmi nadziejnaj lehiendaj», — dadała Hraboŭska-Siviec, majučy na ŭvazie sustrečy byłoha muža Mielnikavaj ź ich dziećmi.
«Heta idealna ŭpisvajecca ŭ modus operandi, h.zn. sposab dziejańnia raźviedki, i vydatna lehienduje hety kantakt, — praciahnuła ekśpiertka. — Vielmi śpiecyfičnyja abstaviny źniknieńnia Mielnikavaj taksama možna patłumačyć movaj śpiecsłužb — kali b ja była zakazčycaj, taksama b užyła takija instrumienty — kryzis sa zdaroŭjem, źniknieńnie hrošaj» (majecca na ŭvazie srodki, pryznačanyja dla inicyjatyvy «Kibierpartyzany» i, pavodle najaŭnaj infarmacyi, źniatyja eks-śpikierkaj KR z bankaŭskaha rachunku).
«Toje, što svajho ahienta my abvinavačvajem u złačynstvie i pravakujem situacyju, u jakoj jon uciakaje, źnikaje niedzie biasśledna z hetymi hrašyma — heta idealnaja lehienda, vielmi papularnaja <…> u śpiecsłužbaŭ. Tamu, na maju dumku, tut usio vydatna składajecca», — padsumavała Hraboŭska-Siviec.
Kiraŭnik Narodnaha antykryzisnaha ŭpraŭleńnia (NAU) Pavieł Łatuška ŭ repartažy čarhovy raz zajaviŭ: jon nie vieryć, što Mielnikava była ahientam śpiecsłužbaŭ Minska.
Pavodle Stanisłavy Hlińnik, jakaja skłała paŭnamoctvy vice-śpikierki KR u žniŭni, pieršapačatkova razhladałasia dzieviać asnoŭnych viersij taho, što mahło adbycca ź Mielnikavaj.
«Na siońnia, napeŭna, zastałosia try. Jość viersija, što jana była supracoŭnicaj biełaruskich słužbaŭ z samaha pačatku. Druhaja viersija — što pačała supracoŭnictva [ź imi] pad prymusam niadaŭna. I treciaja — što była sproba jaje zavierbavać i nacisnuć, jakaja pajšła nie ŭ tym kirunku», — dadała Hlińnik.
Pry hetym jana dapuskaje, što Mielnikavaj moža nie być u žyvych.
***
Śpikierka Kaardynacyjnaj rady Anžalika Mielnikava pakinuła terytoryju Polščy i Jeŭrasajuza 26 lutaha 2025 hoda i palacieła ŭ Łondan. Pavodle rasśledavalnikaŭ, za dzień da vyletu jana zareziervavała numar u piacizorkavym hateli na Šry-Łancy, dzie ŭžo byvała raniej. Z 28 lutaha da 7 sakavika Mielnikava žyła ŭ tym hateli ź dziećmi. 7 sakavika Mielnikava ź dziećmi palacieła ŭ Dubaj, tam jaje śled hublajecca. 25 sakavika jana pierastała vychodzić na suviaź. Dzie jana i što ź joj, niama infarmacyi.
Kaardynacyjnaja rada zajaŭlała, što 13 sakavika ź jaje akaunta byli spampavanyja dakumienty, jakija datyčacca pracy arhanizacyi.
U tym ža miesiacy, pavodle źviestak «Kibierpartyzanaŭ», Mielnikava pieraviała na asabisty rachunak bolš za 150 tysiač dołaraŭ sa srodkaŭ fondu Białoruś Liberty. Viadoma taksama, što pierad źniknieńniem jana lotała na Kubu i ŭ Šry-Łanku razam z Alaksiejem Łabiejevym, supracoŭnikam łukašenkaŭskich śpiecsłužbaŭ.
Ciapier čytajuć
Kryk dušy Žyhara pra hrupu Kavaleŭskaha: Hučać zajavy, što Łukašenka lehitymny prezident, choć i nie abrany demakratyčna49
Kamientary
[Zredahavana]
[Zredahavana]