U Polščy pradstavili jašče adzin zakonaprajekt ab hramadzianstvie: 15 hadoŭ žyćcia ŭ krainie, polskaja na ŭzroŭni S1 i daviedka ab niesudzimaści na radzimie

Kolki treba pražyć u Polščy

6 kastryčnika prajekt unieśli ŭ Siejm deputaty «PiS» Pavieł Chreniak i Michał Moskal. Jon prapanuje, kab u ahulnym vypadku pryznać polskim hramadzianinam možna było inšaziemca, jaki bieśpierapynna pražyvaje ŭ Polščy na padstavie pastajannaha DNŽ (stałaha pobytu) nie mienš za 10 hadoŭ (zamiest ciapierašnich troch hadoŭ) i maje stabilny dachod i prava zajmać žyłoje pamiaškańnie. Hetaja ž norma ŭtrymlivajecca ŭ prajekcie, jaki ŭnios u Siejm prezident Karal Naŭrocki.

Adnak kali ŭ prezidenckim prajekcie ŭmovy pryznańnia hramadzianami asobaŭ z kartaj palaka, muža i žonki — hramadzian Polščy i biežancaŭ nie pierahladajucca, to «PiS» choča pierahledzieć i ich.

Tak, inšaziemcy sa statusam biežanca pavinny buduć pražyć na stałym pobycie, atrymanym na padstavie biežanstva, 10 hadoŭ (a nie dva, jak zaraz), kab padać dakumienty na hramadzianstva.

Piać hadoŭ (zamiest ciapierašnich dvuch) na padstavie stałaha pobytu abo statusu doŭhaterminovaha rezidenta ES pavinny buduć pražyć u Polščy muž i žonka hramadzian Polščy — pry hetym u šlubie jany pavinny być nie mienš za šeść hadoŭ.

Taksama piać hadoŭ (a nie hod, jak zaraz) na pastajannym DNŽ buduć čakać hramadzianstva inšaziemcy, jakija majuć stały pobyt na padstavie karty palaka albo polskaha pachodžańnia.

Akramia taho, budzie ŭzmocnienaja i jašče adna norma. Pavodle dziejsnaha zakanadaŭstva, pretendavać na hramadzianstva moža luby inšaziemiec, lehalna i bieśpierapynna pražyvajučy ŭ Polščy na praciahu 10 hadoŭ i majučy kartu stałaha pobytu abo doŭhaterminovaha rezidenta ES. «PiS» choča pavialičyć hety termin da 15 hadoŭ i pry hetym uvieści niekalki dadatkovych umovaŭ. Apošnija piać hadoŭ pierad padačaj zajavy inšaziemiec nie moža karystacca sacyjalnaj dapamohaj, pryznačanaj ludziam ź vielmi nizkimi dachodami, nie pavinien pryciahvacca da kryminalnaj adkaznaści, a taksama pavinien mieć stanoŭčuju charaktarystyku kamiendanta palicyi pa miescy pražyvańnia na praciahu apošnich 10 hadoŭ.

Adznačym, što bieśpierapynnym ličycca znachodžańnie, kali nivodny vyjezd inšaziemca za miežy Polščy nie pieravyšaŭ šaści miesiacaŭ, a sumarnaja praciahłaść usich vyjezdaŭ nie pieravysiła 10 miesiacaŭ. Takim čynam, z Polščy za 15 hadoŭ nielha budzie ŭ ahulnaj sumie vyjechać bolš čym na 10 miesiacaŭ. Siudy nie ŭklučajucca tolki niekatoryja pajezdki, naprykład, kamandziroŭki ad polskaj firmy abo stažyroŭki ad polskaj navučalnaj ustanovy.

Polskaja mova i daviedka ab sudzimaściach

Deputaty «PiS» prapanujuć patrabavać ad inšaziemca, jaki pretenduje na polskaje hramadzianstva, viedy movy na ŭzroŭni nie nižej za S1 (ciapier — B1), a taksama zdačy Dziaržaŭnaha hramadzianskaha ekzamiena, dzie buduć praviarać viedy pra Polšču.

Akramia taho, inšaziemiec pavinien budzie pradstavić dakumienty, što jon nie pryciahvaŭsia da kryminalnaj adkaznaści ŭ svajoj krainie — vidavočna, hetu ŭmovu nie zmohuć vykanać inšaziemcy, jakija majuć mižnarodnuju abaronu.

Jakija pierśpiektyvy hetaha zakonaprajekta

Ciapier u Polščy padrychtavany ŭžo dva zakonaprajekty, ŭzmacniajučyja pryznańnie inšaziemcaŭ hramadzianami Polščy: adzin pastupiŭ ad Karala Naŭrockaha, druhi — ad «PiS». Ale jašče adzin zakonaprajekt abiacaje padrychtavać urad. Pra heta zajaviŭ kiraŭnik MUS Marcin Kierviński. Nastolki možna papiarednie sudzić, u im nie buduć pierahledžany terminy žyćcia ŭ krainie, ale viedać polskuju movu treba budzie na ŭzroŭni B2, da taho ž budzie ŭviedzieny test z prykładna 40 pytańniaŭ, što praviarajuć viedy pra Polšču i stupień intehracyi.

Raskazvajučy pra hetyja płany, Kierviński adznačyŭ, što i ciapier polskaje hramadzianstva atrymlivajuć u ahulnym vypadku nie za try hady, jak heta časam padajecca. Try hady nieabchodna pražyć u krainie tolki na padstavie stałaha pobytu abo karty rezidenta ES, a hetyja dakumienty možna atrymać tolki paśla piaci hadoŭ žyćcia ŭ krainie.

Kali taki zakonaprajekt budzie raspracavany, to, vierahodna, za jaho budzie hałasavać parłamienckaja bolšaść. U «PiS» i pravaj «Kanfiederacyi», jakaja moža padtrymać papraŭki «PiS», bolšaści niama. Tamu, vierahodna, zakonaprajekt «PiS» u Siejmie nie projdzie. Tym nie mienš sam fakt raspracoŭki takoha dakumienta śviedčyć pra ŭzmacnieńnie staŭleńnia da inšaziemcaŭ siarod polskich palityčnych elit.

• 4
• 5
• 2
• 20
• 0
• 1
• 5
• 0