Raskošnaja supierjachta koštam kala $200 miljonaŭ naležyć najbahaciejšamu rasijaninu Andreju Mielničenku, uradžencu Homiela. Užo try hady jana ržavieje i prychodzić u zaniapad u porcie Dubaja. Praz sankcyi jachta nie moža ŭvajści ŭ zachodnija porty i zastałasia biez naležnaha techničnaha absłuhoŭvańnia.
Na praciahu mnohich hadoŭ 119‑mietrovaja matornaja jachta «A» (tak, jaje nazva składajecca z adnoj litary, ź jakoj pačynajucca imiony samoha miljardera i jaho žonki Alaksandry), dyzajn jakoj natchniony formami padvodnych łodak, ličyłasia adnym z samych efiektnych płyvučych pałacaŭ rasijskich aliharchaŭ.
Adnak ciapier, udalečyni ad jeŭrapiejskich vierfiaŭ, sudna zaniadbanaje i pastupova razburajecca. Jak piša Luxury Launches, prastoj u Dubai štohod abychodzicca ŭładalniku prykładna ŭ $30 miljonaŭ.
Jachta, nazva jakoj dazvalaje być pieršaj u marskich rejestrach i śpisach, pabudavanaja niamieckaj vierfju Blohm+Voss pa prajekcie znakamitaha dyzajniera Filipa Starka ŭ abstanoŭcy strohaj sakretnaści, raniej uražvała nie tolki źniešnim vyhladam, ale i interjeram.
Amal 2200 kvadratnych mietraŭ žyłoj płoščy, uklučajučy hałoŭnuju spalniu na 230 kvadrataŭ, i siem raskošnych kajut dla 14 haściej. Dla azdableńnia vykarystoŭvalisia kryštali Baccarat — kryštalnaje tam usio, ad voknaŭ da mebli. Pa čutkach, jachta abstalavana kulenieprabivalnymi voknami i bijamietryčnym dostupam.
Adnak z pačatkam vajny i ŭviadzieńniem sankcyj usie hetyja cudy inžynieryi i raskošy stali biessensoŭnymi. Basiejny stajać pustyja, detali interjeru pakrytyja pyłam z pustyni, a samo sudna ŭsio bolš razburajecca.
Jachta, zapas chodu jakoj na krejsierskaj chutkaści 19 vuzłoŭ składaje 6500 marskich mil, jakija jana moža pieraadoleć za 16 dzion, vydatkavaŭšy 750 tysiač litraŭ paliva, farmalna nie aryštavanaja, ale paśla taho, jak jaje ŭładalnik trapiŭ u sankcyjny śpis ES, jana pierastała zachodzić u jeŭrapiejskija vody. Praz strach kanfiskacyi jachtu pieramiaścili ŭ biaśpiečnuju havań u Dubai, dzie jana i staić biez spravy.
Inšaja jachta miljardera — paruśnik «A», jaki ličycca samym vialikim u śviecie motasiejleram (paruśnikam z matornym ruchavikom) — paciarpieła jašče bolš. U sakaviku 2022 hoda jana była kanfiskavanaja italjanskaj finansavaj hvardyjaj u Tryjeście i ciapier patrabuje jašče bolš darahoha ramontu.
Andrej Mielničenka naradziŭsia 8 sakavika 1972 hoda ŭ Homieli. Vučycca jon zjechaŭ u Maskvu, zastaŭsia žyć u Rasii. Syn savieckaha fizika, Mielničenka kinuŭ navučańnie, kali ŭ 1991 hodzie raspaŭsia SSSR, kab zasnavać sietku punktaŭ abmienu valuty. Praz dva hady jon zasnavaŭ svoj bank.
Jaho najbujniejšyja aktyvy — kampanija pa vytvorčaści ŭhnajeńniaŭ «JeŭraChim» i Sibirskaja vuhalnaja enierhietyčnaja kampanija, jakija jon pieratvaryŭ u hihantaŭ rasijskaj ekanomiki. U 2023 hodzie Forbes aceńvaŭ jaho bahaćcie ŭ $25,2 miljarda (1‑ie miesca ŭ Rasii i 58‑ie miesca ŭ śviecie).
U 2021 hodzie Mielničenka atrymaŭ hramadzianstva AAE. Paśla pačatku vajny pierajechaŭ u emirat Ras-el-Chajma. U sakaviku 2022 hoda trapiŭ pad sankcyi ES, jamu zabaronieny ŭjezd u Jeŭrasajuz, a jaho aktyvy zamarožanyja. Farmalna vyjšaŭ z uładańnia svaimi kampanijami, ale jość padazreńni, što jon praciahvaje ich kantralavać praz padstaŭnych asob.
«Tak, heta vialikaja pamyłka, ale vyśviatlać, chto vinavaty, a chto nie, — vielmi niebiaśpiečna». Najbahaciejšy rasijanin, jaki rodam ź Biełarusi, pasprabavaŭ apraŭdacca za vajnu
Rasijskaha miljardera biełaruskaha pachodžańnia chočuć pazbavić šviejcarskaha DNŽ
Uradženiec Homiela ŭznačaliŭ śpis najbahaciejšych biznesmienaŭ Rasii pa viersii Forbes. Jaho bahaćcie aceńvajecca ŭ $25,2 młrd
Kamientary