30 hadoŭ tamu minčuk zabiŭ byłoha muža svajoj žonki, ale spravu raskryli tolki zaraz
Śledčyja raskryli rezanansnaje złačynstva, učynienaje ŭ stalicy jašče ŭ sakaviku 1995 hoda. Tady ŭ padjeździe žyłoha doma na vulicy Palavoj znajšli cieła 43-hadovaha mužčyny ź pierarezanym horłam i ciažkimi traŭmami hałavy, paviedamlaje SK.
Na miescy zdareńnia zaŭvažyli niezvyčajnuju detal — nie całkam ukručanuju lampačku nad liftam, na jakoj zachavalisia adbitki palcaŭ. Mienavita hety śled praz hady dapamoh vyjści na padazravanaha.
Śledstva adpracoŭvała roznyja viersii, u tym liku rabavańnie. Adnak hetaja viersija chutka adpała — hrošy, dakumienty i asabistyja rečy achviary zastalisia pry im. Praviaralisia taksama mahčymyja suviazi zahinułaha z raniej sudzimymi za hvałtoŭnyja złačynstvy i ŭvažliva vyvučałasia jaho koła znosin. Adsutnaść śviedkaŭ i kankretnych dokazaŭ doŭhija hady zavodziła rasśledavańnie ŭ tupik.
Zahinuły žyŭ razam z byłoj žonkaj i synam. Žančyna raspaviadała, što muž złoŭžyvaŭ śpirtnym, byŭ ahresiŭny i časta pravakavaŭ kanflikty. Paźniej stała viadoma, što da zabojstva moh być datyčny jaje novy kachany — kaleha pa pracy. Mienavita jaho adbitki palcaŭ byli na toj samaj lampačcy. U 2008 hodzie mužčynu vyklikali na dopyt, adnak jon patłumačyŭ, što ŭ 1995 hodzie prosta mianiaŭ jaje pa prośbie svajoj ciapierašniaj žonki — i moh pakinuć śled.
Prasoŭvańnie ŭ spravie adbyłosia tolki ŭ 2025 hodzie dziakujučy sučasnym kryminalistyčnym technałohijam. Ekśpierty ŭstanavili: adbitki na lampačcy źjavilisia mienavita ŭ noč zabojstva, što abvierhła raniejšyja tłumačeńni padazravanaha.
Mužčyna pryznaŭsia, što doŭhi čas spačuvaŭ žančynie, u jakuju byŭ zakachany dziesiać hadoŭ, z-za jaje składanych adnosin z byłym mužam, i ŭ rešcie rešt vyrašyŭ «vyzvalić jaje ad mučyciela».
Viečaram 22 sakavika 1995 hoda jon padpilnavaŭ achviaru kala padjezda, raspyliŭ u tvar haz ź piarcovaha bałončyka, niekalki razoŭ udaryŭ małatkom pa hałavie, a potym pierarezaŭ horła niebiaśpiečnaj brytvaj.
Dalej padazravanaha achapiła panika: pa jaho słovach, jon chacieŭ, kab u padjeździe stała ciomna — tamu vykruciŭ lampačku. Paśla hetaha pajšoŭ na pracu — dziela alibi.
Zaraz 66-hadovamu minčuku vystaŭlena abvinavačańnie ŭ zabojstvie, ździejśnienym z asablivaj žorstkaściu. Pa rašeńni suda jon źmieščany pad vartu. Mužčynu moža čakać da 25 hadoŭ, pažyćciovaje źniavoleńnie, abo navat śmiarotnaje pakarańnie.
Ciapier čytajuć
Rasijskija i łukašenkaŭskija śpiecsłužby na fonie zalotu dronaŭ u Polšču praviali infaataku. Jaje zładžanaść daje padstavy dumać, što zalot byŭ spłanavany1515
Kamientary
Što tam adbitki. Cełyja džypy, byvaje, to źjaŭlajucca, kab miažu prarvać, to paśla źnikajuć.