«Mahčyma, nam treba padumać ab stvareńni časovaha łahiera». Demsiły rychtujucca da mahčymaj masavaj departacyi palitviaźniaŭ ź Biełarusi
10 vieraśnia ŭ Vilni prajšła sustreča lidarki demsił Śviatłany Cichanoŭskaj z pradstaŭnikami arhanizacyj dapamohi palitviaźniam. Abmiarkoŭvałasia, siarod inšaha, padrychtoŭka nieabchodnaj infrastruktury na vypadak masavaj departacyi palitviaźniaŭ ź Biełarusi, kab akazać im pieršuju nieabchodnuju dapamohu.
U sustrečy brali ŭdzieł pradstaŭniki Asacyjacyi palitviaźniaŭ Biełarusi, PC «Viasna», fondu «Dapamoha», fondu «Kraina dla žyćcia», Čyrvonaha Kryža Litvy i Biełaruskaha doma pravoŭ čałavieka.
«My ŭžo bačyli asobnyja vyzvaleńni, ale havorka moža pajści pra značna bolšyja maštaby. Heta aznačaje, što nie pavinna być impravizacyi — patrebna zahadzia padrychtavanaja infrastruktura padtrymki, kab ludzi adrazu atrymali žyllo, miedycynskuju, psichałahičnuju i jurydyčnuju dapamohu.
Zajavy mižnarodnych lidaraŭ pakazvajuć, što scenaryj šyrokich vyzvaleńniaŭ moža stać realnaściu ŭ luby momant. Tamu naš abaviazak jak biełaruskaj supolnaści — być hatovymi ŭžo siońnia.
Heta patrabuje zhurtavanaści, vyraznaj kaardynacyi i poŭnaj adkaznaści pierad tymi, chto vychodzić na volu paśla ciažkich hadoŭ źniavoleńnia», — skazała Volha Zazulinskaja, pradstaŭnica pa sacyjalnaj palitycy Kabinieta.
Demakratyčnyja siły raźličvajuć, što vyzvaleńnie viaźniaŭ budzie praciahvacca, «adnak, na žal, vyhladaje, što vyzvalenych buduć prymusova departavać z krainy». Pra heta zajaviła Śviatłana Cichanoŭskaja na sustrečy, paviedamiŭ «Pozirku» jaje hałoŭny daradca Franak Viačorka.
«Tamu ja adrazu prapanuju nazyvać rečy svaimi imionami: nie vyzvaleńnie, a departacyja. Nam treba być hatovymi pryniać hetych ludziej», — skazała na sustrečy demlidarka.
«Pieršaje, što treba zrabić — acanić, kolki ŭžo majem najaŭnych miescaŭ, łožkaŭ i resursaŭ u Polščy i Litvie, — skazała Cichanoŭskaja. — Druhoje — zrabić raźlik, jakija resursy i mahčymaści nieabchodnyja, kab pryniać 100, 500, 1000 čałaviek. Treba ŭličyć, što Litvie i Polščy taksama treba budzie dadatkovy čas, kab vyrabić dakumienty. Mahčyma, nam treba padumać pra stvareńnie časovaha łahiera».
Na dumku Cichanoŭskaj, varta zrabić prapanovy roznym krainam ES, jakija ŭžo prymali ŭciekačoŭ, u tym liku Čechii, Hiermanii, kab nakiravać častku departavanych palitviaźniaŭ tudy.
Jana paviedamiła, što 11 vieraśnia budzie sustrakacca z pradstaŭnikami Jeŭrapiejskaj kamisii, a taksama paŭnočnych i bałtyjskich krain nakont dadatkovaj terminovaj dapamohi.
11 vieraśnia Cichanoŭskaja płanuje sustrečy z pradstaŭnikami Jeŭrakamisii i paŭnočnych krain z metaj abmierkavańnia terminovaj dapamohi.
Apošniaje vyzvaleńnie palitviaźniaŭ adbyłosia 21 červienia. Paśla pryjezdu ŭ Biełaruś pradstaŭnikoŭ ZŠA na volu vyjšli 14 čałaviek. Siarod ich byŭ i Siarhiej Cichanoŭski, jaki pravioŭ u źniavoleńni bolš za piać hadoŭ.
15 žniŭnia Donald Tramp i Łukašenka pahavaryli pa telefonie, pakul prezident ZŠA nakiroŭvaŭsia na pieramovy z kiraŭnikom RF Uładzimiram Pucinym na Alascy. Tramp paviedamlaŭ, što meta zvanka — «padziakavać jaho za vyzvaleńnie 16 źniavolenych». «My taksama abmiarkoŭvajem mahčymaść vyzvaleńnia jašče 1300 źniavolenych», — raspaviadaŭ Tramp. A 5 vieraśnia Tramp padčas razmoŭ z žurnalistami ŭ Biełym domie pachvaliŭ Alaksandra Łukašenku za vyzvaleńnie 16 zakładnikaŭ i paviedamiŭ, što Vašynhton i Minsk viaduć pieramovy pra vyzvaleńnie jašče kala 1,4 tysiačy čałaviek.
Ciapier čytajuć
Žurnalist Mancevič, błohiery Kazłoŭ i Vinahradaŭ, palityk Kučuk. paplečniki Aŭtuchoviča i Statkieviča. Chto jašče z palitviaźniaŭ vyzvaliŭsia siońnia?22
Kamientary
V Finlandii połno pustujuŝiej niedvihi pośle toho kak hranicu s Rośsijej zakryli.