«Магчыма, нам трэба падумаць аб стварэнні часовага лагера». Дэмсілы рыхтуюцца да магчымай масавай дэпартацыі палітвязняў з Беларусі
10 верасня ў Вільні прайшла сустрэча лідаркі дэмсіл Святланы Ціханоўскай з прадстаўнікамі арганізацый дапамогі палітвязням. Абмяркоўвалася, сярод іншага, падрыхтоўка неабходнай інфраструктуры на выпадак масавай дэпартацыі палітвязняў з Беларусі, каб аказаць ім першую неабходную дапамогу.
У сустрэчы бралі ўдзел прадстаўнікі Асацыяцыі палітвязняў Беларусі, ПЦ «Вясна», фонду «Дапамога», фонду «Краіна для жыцця», Чырвонага Крыжа Літвы і Беларускага дома правоў чалавека.
«Мы ўжо бачылі асобныя вызваленні, але гаворка можа пайсці пра значна большыя маштабы. Гэта азначае, што не павінна быць імправізацыі — патрэбна загадзя падрыхтаваная інфраструктура падтрымкі, каб людзі адразу атрымалі жыллё, медыцынскую, псіхалагічную і юрыдычную дапамогу.
Заявы міжнародных лідараў паказваюць, што сцэнарый шырокіх вызваленняў можа стаць рэальнасцю ў любы момант. Таму наш абавязак як беларускай супольнасці — быць гатовымі ўжо сёння.
Гэта патрабуе згуртаванасці, выразнай каардынацыі і поўнай адказнасці перад тымі, хто выходзіць на волю пасля цяжкіх гадоў зняволення», — сказала Вольга Зазулінская, прадстаўніца па сацыяльнай палітыцы Кабінета.
Дэмакратычныя сілы разлічваюць, што вызваленне вязняў будзе працягвацца, «аднак, на жаль, выглядае, што вызваленых будуць прымусова дэпартаваць з краіны». Пра гэта заявіла Святлана Ціханоўская на сустрэчы, паведаміў «Позірку» яе галоўны дарадца Франак Вячорка.
«Таму я адразу прапаную называць рэчы сваімі імёнамі: не вызваленне, а дэпартацыя. Нам трэба быць гатовымі прыняць гэтых людзей», — сказала на сустрэчы дэмлідарка.
«Першае, што трэба зрабіць — ацаніць, колькі ўжо маем наяўных месцаў, ложкаў і рэсурсаў у Польшчы і Літве, — сказала Ціханоўская. — Другое — зрабіць разлік, якія рэсурсы і магчымасці неабходныя, каб прыняць 100, 500, 1000 чалавек. Трэба ўлічыць, што Літве і Польшчы таксама трэба будзе дадатковы час, каб вырабіць дакументы. Магчыма, нам трэба падумаць пра стварэнне часовага лагера».
На думку Ціханоўскай, варта зрабіць прапановы розным краінам ЕС, якія ўжо прымалі ўцекачоў, у тым ліку Чэхіі, Германіі, каб накіраваць частку дэпартаваных палітвязняў туды.
Яна паведаміла, што 11 верасня будзе сустракацца з прадстаўнікамі Еўрапейскай камісіі, а таксама паўночных і балтыйскіх краін наконт дадатковай тэрміновай дапамогі.
11 верасня Ціханоўская плануе сустрэчы з прадстаўнікамі Еўракамісіі і паўночных краін з мэтай абмеркавання тэрміновай дапамогі.
Апошняе вызваленне палітвязняў адбылося 21 чэрвеня. Пасля прыезду ў Беларусь прадстаўнікоў ЗША на волю выйшлі 14 чалавек. Сярод іх быў і Сяргей Ціханоўскі, які правёў у зняволенні больш за пяць гадоў.
15 жніўня Дональд Трамп і Лукашэнка пагаварылі па тэлефоне, пакуль прэзідэнт ЗША накіроўваўся на перамовы з кіраўніком РФ Уладзімірам Пуціным на Алясцы. Трамп паведамляў, што мэта званка — «падзякаваць яго за вызваленне 16 зняволеных». «Мы таксама абмяркоўваем магчымасць вызвалення яшчэ 1300 зняволеных», — распавядаў Трамп. А 5 верасня Трамп падчас размоў з журналістамі ў Белым доме пахваліў Аляксандра Лукашэнку за вызваленне 16 закладнікаў і паведаміў, што Вашынгтон і Мінск вядуць перамовы пра вызваленне яшчэ каля 1,4 тысячы чалавек.
Каментары
В Финляндии полно пустующей недвиги после того как границу с Россией закрыли.