У Польшчы завялі крыміналку за выкарыстанне пашпарта Новай Беларусі? Не. Вось што вядома на гэты момант
Беларусу выдалі новы дазвол на жыхарства, але цяпер адклікаюць яго для разбіральніцтва.
Ініцыятыва «Партызанка» заявіла, што беларуса могуць пазбавіць міжнароднай абароны за выкарыстанне пашпарта Новай Беларусі. І што, маўляў, яму можа пагражаць нават крымінальны пераслед. Навіну з радасцю падхапілі беларускія дзяржаўныя прапагандысты, але ў гісторыі пакуль вельмі мала канкрэтыкі.
Што вядома на гэты момант — з каментароў «Партызанкі» і выступлення яе заснавальніцы Ганны Маціеўскай на «Еўрарадыё».
Беларус рабіў у Польшчы чарговую замену дазволу на жыхарства. Паколькі ў яго скончыўся тэрмін дзеяння пашпарту, ён вырашыў дадаць да пакету дакументаў, якія ён прадастаўляў, яшчэ і пашпарт Новай Беларусі. У яго прынялі дакументы і — больш за тое — нават выдалі яму новы дазвол на жыхарства.
Аднак праз некаторы час ён атрымаў апавяшчэнне аб тым, што ў яго дачыненні распачалі працэдуру аб пазбаўленні міжнароднай абароны ў Польшчы. Ганна Маціеўская мяркуе, што польскія чыноўнікі палічылі атрыманне пашпарта магчымым узаемадзеяннем з беларускімі дзяржаўнымі органамі (бо не разабраліся, што гэта сувенірны дакумент) — якое забаронена ў сітуацыі, калі чалавек просіць міжнародную абарону.
«На гэты момант чалавек даў пісьмовыя тлумачэнні па сітуацыі. Найхутчэй, працэдура пазбаўлення міжнароднай абароны будзе спыненая», — падсумоўвае «Партызанка».
Размова пра магчымы крымінальны пераслед беларуса — адвольная інтэрпрэтацыя юрыстаў. На гэты момант нічога пра завядзенне крымінальнай справы невядома.
Пашпарт Новай Беларусі, безумоўна, не з'яўляецца афіцыйным дакументам, які замяняе пашпарт, і не можа выкарыстоўвацца для ідэнтыфікацыі асобы.
Памілаваныя 15 чалавек, сярод якіх 13 палітвязняў15
Каментары
[Зрэдагавана]