Літва заклікала Еўропу прызнаць ГРУ і іншыя расійскія спецслужбы тэрарыстычнымі арганізацыямі
Кіраўнік літоўскай дыпламатыі Кястуціс Будрыс заявіў, што арганізаваныя Масквой падпалы ў еўрапейскіх краінах больш нельга называць мяккім тэрмінам «гібрыдная актыўнасць».
З ініцыятывай афіцыйна ўнесці расійскую ваенную выведку і іншыя сілавыя ведамствы РФ у еўрапейскі спіс тэрарыстычных арганізацый міністр замежных спраў Літвы Кястуціс Будрыс выступіў у нядзелю, 15 лістапада ў сацсетцы X.
Літоўскі міністр павіншаваў спецслужбы і праваахоўныя органы Эстоніі з аператыўным спыненнем дыверсіі супраць абароннай кампаніі Threod Systems і адзначыў, што выканаўцы пакінулі наўпроставыя доказы ўдзелу расійскіх куратараў.
«Расія больш не хаваецца за пасярэднікамі. Адбіткі пальцаў вядуць наўпрост да ГРУ. Калі дзяржаўная разведвальная служба арганізуе падпалы ў Еўропе, гэта не «гібрыдная актыўнасць». Гэта спансаваны дзяржавай тэрарызм. Час перастаць хавацца за эўфемізмамі. Еўропа павінна сур’ёзна разгледзець пытанне аб уключэнні ГРУ і іншых расійскіх разведвальных ды сілавых структур, датычных да дыверсійных аперацый, у спіс тэрарыстычных арганізацый», — напісаў Будрыс.
Паводле слоў кіраўніка МЗС Літвы, Масква пераходзіць да сабатажу ў тылу заходніх краін праз уласныя паразы на полі бою: не здолеўшы зламаць супраціў Украіны, Крэмль спрабуе запалохаць і дэстабілізаваць еўрапейскія грамадствы. Будрыс выказаў салідарнасць са сваім эстонскім калегам Маргусам Цахкнам і падкрэсліў, што кожны акт расійскай дыверсіі ў Еўропе павінен мець для Расіі ўсё больш высокую цану.
Што адбылося ў Эстоніі
Заява Вільні прагучала пасля таго, як Паліцыя бяспекі і пракуратура Эстоніі раскрылі падрабязнасці начнога нападу на завод кампаніі Threod Systems у муніцыпалітэце Віймсі пад Талінам, дзе вырабляюць разведвальныя беспілотнікі і аптычныя сістэмы. Інцыдэнт адбыўся 14 лістапада а 03:06, зламыснікі спрабавалі ўчыніць выбух і падпаліць вытворчы будынак, але ім перашкодзіла ахова прадпрыемства.
Па гарачых слядах эстонскія сілавікі пры дапамозе калег з Латвіі затрымалі восем падазраваных — усе яны з’яўляюцца жыхарамі Латвіі, пяцярых з іх пракуратура папрасіла суд узяць пад варту. Паводле звестак эстонскай контрразведкі, напад быў арганізаваны на прамую замову ГРУ. У адказ на дыверсію ўрад Эстоніі абвясціў, што з 1 снежня 2026 года закрые ўсе пагранічныя пункты пропуску на мяжы з Расіяй.
-
«Спадзяюся, ты памрэш і пазбавіш нас ад пакут». Пасля адстаўкі кіраўніка Nvidia Джэнсэна Хуанга праз шпіёнскі скандал падначаленыя расказалі пра ягоныя істэрыкі
-
Урад Чэхіі пазбаўляе грамадскія медыя фінансавай незалежнасці. У адказ у Празе пачаўся найбуйнейшы пратэст з 1989 года
-
Эстонія закрывае мяжу з Расіяй з 1 снежня. Прычынай стала спроба ГРУ падпаліць абаронны завод
Цяпер чытаюць
Дырэктар Віцебскага цэнтра сучаснага мастацтва Андрэй Духоўнікаў пераехаў у Сербію — ён расказаў пра даносы ў культуры, неадукаванасць міністраў і чый жа Шагал16
Каментары