Biełaruskija mytniki zatrymali vielizarnuju partyju narkotykaŭ — 637 kiłahramaŭ
Mytnyja orhany Biełarusi vyjavili kanał pastavak ź Jeŭrasajuza ŭ Rasiju niebiaśpiečnaha psichatropu. U partyi było 637 kiłahramaŭ rečyva.
Byli zatrymanyja hramadzianie Litvy, Biełarusi, Rasii i Ukrainy, datyčnyja da złačynstva. Psichatropy sprabavali ŭvieźci ŭ krainu ź litoŭskaha składa praz Łatviju ŭ hruzaviku, u jakim pavodle dakumientaŭ pavinny byli być pasudamyjnyja mašyny.
Mytniki na punkcie propusku «Hryhoraŭščyna» nakiravali vielikahruz na skaniravańnie, paśla čaho vyrašyli pravieści ahlad. Unutry techniki znajšli falhavanyja kanvierty — usiaho 540 upakovak pa 1 i 1,5 kh.
Ekśpiert paćvierdziŭ, što heta psichatrop 4-SMS. Pakolki hruzavik skiroŭvaŭsia dalej u Rasijskuju Fiederacyju, była praviedzienaja mižnarodnaja apieracyja pa vyjaŭleńni ŭsich udzielnikaŭ złačynnaj schiemy. U pracesie było znojdziena jašče 162 kiłahramy roznych narkotykaŭ i psichatropaŭ (hašyš, miefiedron, MDMA, klefiedron i inš.), schavanych na terytoryi pryvatnaha doma i ŭ lasach Maskoŭskaj vobłaści.
Usiaho kanfiskavanych rečyvaŭ chapiła b bolš čym na 3 miljony razavych doz. Košt takoj partyi na čornym rynku dasiahaje $75 miljonaŭ.
U dačynieńni da padazravanych uzbudžanaja kryminalnaja sprava ŭ Biełarusi i Rasii. Udzielnikam złačynnaj hrupy pahražaje pakarańnie ŭ vyhladzie pazbaŭleńnia voli terminam da 20 hadoŭ.
Kamientary