«Radziva Prudok», «Šept» i «Pa što idzieš voŭča?» uvosień pakažuć u Polščy
Śpiektakli projduć u Varšavie i Hdańsku.
Fundacyja INEXKULT raspačynaje novy teatralny siezon śpiektaklami pa biełaruskich knižnych biestsielerach. U Polščy pakažuć pastanoŭki «Radziva Prudok», «Šept» i «Pa što idzieš voŭča?».
«Šept»
Heta pastanoŭka pavodle adnajmiennaj knihi Siarhieja Leskiecia. Śpiektakl prapanoŭvaje zanurycca ŭ tajamničy i, na žal, sychodziačy śviet biełaruskich šaptuch, jakija ciaham stahodździaŭ lekavali ludziej ziołkami, ahniom, vadoju i zamovami. Jany źviartalisia da prakavietnych bahoŭ i da chryścijanskich śviatych, mieli ŭłasnyja rytuały dy recepty vykaranieńnia chvaroby i mahli sahreć adnym słovam. Biełaruski fatohraf i etnohraf Siarhiej Leskieć bolš za dzieviać hadoŭ zanatoŭvaŭ svaje sustrečy z takimi babulami (a pieravažna, šaptuchami byli žančyny) na fotastužku dy dyktafon i naźbiraŭ nie tolki sami zamovy, ale i śviedčańni tahačasnaha žyćcia, ciepłyni i viaskovaj piaščoty da ludziej.
Śviatłana Anikiej, Dźmitryj Łukjančyk i Michaił Zuj stvarajuć teatralnuju zamovu z hałasoŭ znacharak, muzyki i minimalistyčnaj scenahrafii, dzie šept — heta čyrvonaja nitka, što źnitoŭvaje hledačoŭ nie tolki adzin z adnym, ale i z sapraŭdnaj biełaruskaj spadčynaj.
Kali: 28 vieraśnia, niadziela, 19:00
Dzie: Hdańsk, Gdański Teatr Szekspirowski
Kvitki možna nabyć tut.
Kali: 2 kastryčnika, čaćvier, 19:00
Dzie: Varšava, Terminal Kultury Gocław
Kvitki možna nabyć tut.
«Pa što idzieš, voŭča?»
Śpiektakl pavodle adnajmiennaha biestsielera Jevy Viežnaviec. Hałoŭnaja hierainia — Ryna — maje kala 40 hadoŭ i prahu da ałkaholu, a ciapier viartajecca ź niamieckaha Darmštadtu ŭ biełaruskuju hłybinku, kab pachavać staruju babulu, zhadać svajo žyćcio i znajści, prynamsi, svaje karani. A, mo, i niešta bolšaje, bo Biełaruś — heta kraj, dzie možna pražyć u adnoj vioscy ŭsio žyćcio, ale źmianić niekalki krain, jašče bolš uładaroŭ i nazapasić taki dośvied, nibyta heta ty pražyŭ žyćcio 102-hadovaj babuli dy jašče i svajo.
Šmatmoŭny ekśpierymient, žanočaja historyja, pieraplecienaja z historyjaj usioj Uschodniaj Jeŭropy, hipierrealizm i absurd jak častki paŭsiadzionnaha žyćcia — usio heta ŭvasobiłasia ŭ śpiektaklu, dzie sumieś žudasnaha i kranalnaha nikoha nie pakinie abyjakavym. U śpiektakli zadziejničanyja Jaŭhienija Kulbačnaja, Volha Hryhoraš, Śviatłana Zielankoŭskaja i Monika Davidziuk.
U 2021 hodzie apovieść Jevy Viežnaviec «Pa što idzieš, voŭča?» atrymała litaraturnuju premiju imia Ježy Hiedrojcia za najlepšuju knihu. Siońnia jana pierakładzienaja na šeść moŭ, a adnajmienny śpiektakl z pośpiecham prajšoŭ u Varšavie, Biełastoku i francuzskim Avińjonie padčas sioletniaha mižnarodnaha teatralnaha fiestyvalu.
Kali: 26 kastryčnika, niadziela, 19:00
Dzie: Hdańsk, Gdański Teatr Szekspirowski
Kvitki možna nabyć tut.
Dla žycharoŭ Hdańska jość śpiecyjalnaja prapanova kupić kvitki adrazu na dva śpiektakli tańniej («Šept» i «Pa što idzieš, voŭča?») — nabyć možna tut.
«Radziva Prudok»
Kultavaje padarožža ŭ biełaruski viaskovy kosmas pa knižnym biestsielery Andrusia Horvata. Niekali aŭtar pracavaŭ dvornikam u Kupałaŭskim teatry, a potym źmianiŭ Minsk na paleski Prudok. Ź dziońniku viaskovych zamalovak paŭstała kniha, a potym i śpiektakl, jakija adpraŭlajuć biełarusaŭ u suśviet viaskovaha žyćcia, vodar pałynu dy dziadoŭskich ihruš, zornaje nieba i biezdań nastalhii pa niaŭłoŭnym, ale vielmi darahim minułym. Adčuć siabie častkaj hetaha čaroŭnaha suśvietu dapamahajuć niejmaviernyja Śviatłana Anikiej, Michaś Zuj i Źmicier Jesianievič.
Kali: 3 lutaha, aŭtorak, 19:00
Dzie: Varšava, Terminal Kultury Gocław
Kvitki možna nabyć tut. Da kanca 2025 hoda možna ŭziać kvitok na «Radziva Prudok» sa źnižkaj 25% pa pramakodzie INEX2025.
Ciapier čytajuć
Chto toj redaktar biełaruskaj Vikipiedyi, jakoha pasadzili na dva hady za «dyskredytacyju Biełarusi»19
Kamientary