Adzin z bujnych polskich bankaŭ dazvoliŭ karystańnie rachunkami z časovym paśviedčańniem asoby inšaziemca
Z kanca śniežnia 2025 hoda adzin z polskich bankaŭ — Millennium — pačaŭ aficyjna prymać časovaje paśviedčańnie asoby inšaziemca jak dakumient, što paćviardžaje asobu. Heta aznačaje, što klijenty z takim paśviedčańniem mohuć paŭnavartasna karystacca svaimi bankaŭskimi rachunkami, u tym liku elektronnym bankinham, u miežach zaklučanych damovaŭ.
Pra heta rašeńnie banka paviedamili ŭ Kamisii finansavaha nahladu Polščy ŭ adkaz na zvarot namieśnika kiraŭnicy Abjadnanaha pierachodnaha kabinieta i kiraŭnika Narodnaha antykryzisnaha ŭpraŭleńnia Paŭła Łatuški. U svaim zvarocie Łatuška źviartaŭ uvahu na prablemy, ź jakimi sutykajucca biełarusy ŭ Polščy pry atrymańni bankaŭskich pasłuh.
Jašče ŭ listapadzie 2025 hoda Łatuška adznačaŭ, što, niahledziačy na peŭny prahres, nie ŭsie banki paśladoŭna pryznajuć časovaje paśviedčańnie asoby. U jakaści prykładu jon pryvioŭ situacyju, kali biełarusu z praterminavanym pašpartam i dziejnym časovym paśviedčańniem było admoŭlena ŭ praciahu absłuhoŭvańnia rachunku ŭ banku Millennium.
U adkaz Kamisija finansavaha nahladu paviedamiła, što vyvučyła hety vypadak sumiesna z bankam. U vyniku Millennium ukaraniŭ novyja rašeńni, jakija adpaviadajuć patrabavańniam rehulatara, i z 30 śniežnia 2025 hoda pačaŭ aficyjna pryznavać časovaje paśviedčańnie asoby zamiežnika jak paŭnavartasny dakumient dla identyfikacyi klijenta.
Akramia taho, Pavieł Łatuška prapanavaŭ nie błakavać rachunki biełarusaŭ, u jakich skončyŭsia termin dziejańnia pašparta, da momantu, pakul jany nie atrymajuć rašeńnie pa dazvole na žycharstva. U jakaści paćvierdžańnia statusu čakańnia jon prapanavaŭ vykarystoŭvać štamp u pašparcie abo inšy dakumient, što śviedčyć pra padaču zajavy.
U Kamisii finansavaha nahladu adkazali, što hetaje pytańnie ciapier analizujecca ź jurydyčnaha punktu hledžańnia sumiesna ź Ministerstvam unutranych spraŭ. Kančatkovaja pazicyja pavinna być taksama ŭzhodnienaja z Hienieralnym inśpiektaram finansavaj infarmacyi, jaki adkazvaje za pytańni supraćdziejańnia admyvańniu hrošaj i finansavańniu teraryzmu.
Na aficyjnym partale polskaha ŭrada pačaŭ pracavać biełaruskamoŭny raździeł
Polski bank PKO vieryfikavaŭ biełarusku biez DNŽ i razbłakavaŭ joj dostup da rachunku
«Za moj košt katali niezrazumieła kaho». Biełaruska zaŭvažyła, što ź jaje polskaj karty śpisvajucca hrošy za čužyja pajezdki ŭ taksi pa Tbilisi
Biełarusy ŭ Polščy zajmajuć druhoje miesca siarod inšaziemcaŭ pavodle ipatečnych kredytaŭ
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary