Syn prezidenta Ekvataryjalnaj Hviniei Rusłan Abijanh Nsue zajmaŭ pasady dziaržaŭnaha sakratara pa spravach sportu i moładzi i namieśnika hienieralnaha dyrektara nacyjanalnaj avijakampanii. A abvinavacili jaho ŭ niezakonnym prodažy samalota avijakampanii i prysabiečvańni hrošaj.
Teador Abijanh Nhiema Mbasoha — adzin z suśvietnych rekardsmienaŭ pa praciahłaści znachodžańnia va ŭładzie. Jon trymaje jaje ažno z 1979 hoda. Starejšy syn Abijanha z 2016 hoda zajmaje pasadu pieršaha vice-prezidenta krainy. A voś inšy syn paniasie zasłužanaje pakarańnie.
Jak paviedamlaje vydańnie Revista Real Equatorial Guinea, 26 žniŭnia sud Ekvataryjalnaj Hviniei pryhavaryŭ byłoha namieśnika hienieralnaha dyrektara avijakampanii CEIBA Intercontinental Rusłana Abijanha Nsue da šaści hadoŭ i adnaho dnia pazbaŭleńnia voli, što źjaŭlajecca minimalnym terminam pazbaŭleńnia voli, za prodaž samalota, jaki naležaŭ kampanii, i prysvajeńni vyručki ad ździełki.
Rasśledavańnie pa fakcie źniknieńnia samalota ATR 72-500, jaki naležaŭ nacyjanalnaj avijakampanii CEIBA Intercontinental, ułady krainy pačali ŭ listapadzie 2022 hoda.
Samalot z 2018 hoda byŭ adpraŭleny na Kanarskija astravy (Ispanija) dla ramontu. Adnak paźniej pavietranaje sudna było pradadziena firmie, jakaja pravodziła ramont, biez zhody naziralnaj rady avijakampanii.
Akramia samalota, źnikli i kala 700 tysiač jeŭra, pryznačanych na jaho ramont. Jak vyśvietliła śledstva, hrošy byli pieraličanyja na rachunak u Małajzii, a paźniej trapili ŭ Majami (ZŠA).
Hałoŭnym fihurantam spravy staŭ Rusłan Abijanh Nsue, adzin z synoŭ prezidenta krainy Teadora Abijanha Nhiemy Mbasoha. Na toj momant mužčyna zajmaŭ pasadu namieśnika hienieralnaha dyrektara CEIBA Intercontinental.
Padčas sudovaha pasiadžeńnia 50-hadovy Rusłan Abijanh Nsue, jaki raniej taksama zajmaŭ pasadu dziaržaŭnaha sakratara pa spravach sportu i moładzi, pryznaŭ fakt prodažu.
«Ja pryznaju damovu prodažu samalota za 250 000 jeŭra, ale ja atrymaŭ tolki 125 000, jakija ja pakłaŭ na svoj bankaŭski rachunak u Ispanii», — cytuje Nsue vydańnie VOA Afrique.
Jurystka avijakampanii patłumačyła ŭradavaj kamisii, stvoranaj dla rasśledavańnia faktaŭ, što Nsue «prapanavaŭ nie pieraličvać hrošy ad prodažu na rachunak CEIBA Intercontinental u madrydskim filijale, pakolki jon byŭ zamarožany». Zamiest hetaha srodki byli zaličanyja na asabisty rachunak tahačasnaha namieśnika dyrektara.
Kali hetyja abstaviny stali viadomyja i sam Abijanh Nsue pryznaŭsia ŭ zroblenym, vice-prezident krainy i jaho zvodny brat, Teadora Nhiema Abijanh Manhie, u studzieni 2023 hoda zahadaŭ aryštavać mužčynu i źniać z pasady.
Prysud
Sud Ekvataryjalnaj Hviniei pryznaŭ Rusłana Abijanha Nsue vinavatym u złačynstvie złoŭžyvańnia hramadskaj majomaściu. Jon abaviazany vypłacić dziaržavie štraf u pamiery bolš za 7600 jeŭra.
Akramia hetaha, asudžany musić viarnuć avijakampanii CEIBA Intercontinental kala 220 tysiač jeŭra i spłacić dadatkovuju kampiensacyju ŭ pamiery amal 22 tysiačy jeŭra. Da hetaha dadajucca i sudovyja vydatki.
Kali Rusłan Abijanh Nsue nie vypłacić usich pryznačanych sum, to pavinien budzie adbyć turemny termin daŭžynioj 6 hadoŭ i adzin dzień. Zrešty, hetyja sumy zusim nie vialikija dla člena prezidenckaj siamji.
Paviedamlajecca, što pa abvinavačvańniach u rastracie dziaržaŭnych srodkaŭ i złoŭžyvańni ŭładaj Abijanh Nsue byŭ apraŭdany.
Sudovy pieraśled Rusłana Abijanha Nsue biesprecedentny dla svajaka prezidenta hetaj nievialikaj, ale bahataj na naftu dziaržavy ŭ Centralnaj Afrycy.
Z momantu zdabyćcia niezaležnaści ad Ispanii ŭ 1968 hodzie Ekvataryjalnaja Hvinieja ličycca pravaabarončymi arhanizacyjami nie tolki adnoj z samych represiŭnych krain u śviecie, ale i adnoj z samych karumpavanych.
Prezident Teador Abijanh Nhiema Mbasoha, jakomu 82 hady, kiruje krainaj z 1979 hoda, kali ŭ vyniku dziaržaŭnaha pieravarotu zrynuŭ i zabiŭ svajho rodnaha dziadźku Fransiska Masijasa Nhiema Bijoha. Siarod dziejnych kiraŭnikoŭ dziaržaŭ śvietu, kali nie ličyć karala Šviecyi Karła XVI Hustava, jon znachodzicca va ŭładzie daŭžej za ŭsich.
Jak paviedamlaje Le Monde, starejšy syn hviniejskaha dyktatara i pieršy vice-prezident krainy Teadaryn Nhiema Abijanh Manhie, byŭ asudžany francuzskim sudom u lipieni 2021 hoda da troch hadoŭ pazbaŭleńnia voli ŭmoŭna i štrafu ŭ 30 miljonaŭ jeŭra za rastratu dziaržaŭnych srodkaŭ u ramkach spraŭ ab «niezakonna nabytaj majomaści». Prodaž kanfiskavanych aktyvaŭ Teadaryna Nhiema ŭ Francyi skłaŭ 6 miljonaŭ jeŭra.
U apošnija hady Biełaruś imkniecca raźvivać adnosiny z hetaj afrykanskaj krainaj. U 2023 hodzie biełaruski i hviniejski dyktatary naviedali adzin adnaho. U mai minułaha hoda ŭ Biełarusi znachodziŭsia ministr nacyjanalnaj abarony Ekvataryjalnaj Hviniei.
U Biełaruś prylacieŭ prezident Ekvataryjalnaj Hviniei — rekardsmien pa ŭtrymańni ŭłady ŭ sučasnym śviecie
Łukašenka prylacieŭ u Ekvataryjalnuju Hvinieju
U Biełaruś pryjechaŭ ministr nacyjanalnaj abarony Ekvataryjalnaj Hviniei
«Delehacyja z Ekvataryjalnaj Hviniei kaštavała našu śmiatanu — jany byli prosta začaravanyja». Ministr pra płany na biełaruskuju małočku
Ci šmat u śviecie zastałosia kiraŭnikoŭ dziaržaŭ, jakija pryjšli da ŭłady raniej za Łukašenku?
Kamientary