Poŭzaŭ na kaleniach u śmiećci. Mužčyna pieraryŭ zvałku, kab znajści piarścionki žonki
Kanadziec pieraryŭ hory śmiećcia na miascovaj zvałcy ŭ adčajnaj, ramantyčnaj — i ŭ vyniku paśpiachovaj — sprobie znajści vypadkova vykinutyja piarścionki svajoj žonki, piša Bi-bi-si.
Historyja pačałasia z taho, što Styŭ Van Isieldajk i jahonaja žonka Žanin, jakija pražyli ŭ šlubie 26 hadoŭ, prynieśli dadomu pakiet papkornu z kinateatra i rassypali jaho ŭ svaim sadzie.
Pakul jany jaho prybirali, piarścionki Žanin, vierahodna, upali ŭ pakiet z papkornam, jaki potym vykinuli ŭ kantejnier dla kampostu.
Para zrazumieła, što piarścionki źnikli, tolki paśla taho, jak kampost užo vyvieźli. Tamu na nastupny dzień Styŭ pajechaŭ na zvałku i pačaŭ adčajnyja pošuki siarod 18 ton arhaničnych adkidaŭ.
«Ja byŭ davoli aptymistyčny», — kaža jon u kamientary Bi-bi-si, tłumačačy, što musiŭ znajści ich, bo «žonka pavinna mieć svaje piarścionki, ci nie tak?»
Pierahledzieŭšy zapisy z chatnich kamier videanazirańnia, kab vyznačyć dakładny momant, kali zhubilisia dyjamientavyja piarścionki, jon zrazumieŭ, što pošuki treba vieści na palihonie Mission Sanitary Landfill u Brytanskaj Kałumbii.
«Maja žonka była skieptyčna nastrojenaja. Ja skazaŭ joj: zaŭtra z ranicy pajedu na zvałku i paprašu dazvołu pašukać», — raskazaŭ jon.
«A jana takaja: «jany ciabie nie puściać». A ja kažu: «nikoli nie viedaješ, treba pasprabavać», — uspaminaje Styŭ.
Uzbroiŭšysia rydloŭkaj i paraj palčatak, 15 žniŭnia jon pačaŭ rycca siarod hniłoj travy i charčovych adkidaŭ u pošukach śladoŭ papkornu z kinateatra.
«Dzień byŭ daždžlivy. Było nie vielmi horača», — kaža jon i dadaje, što spryjalnaje nadvorje dapamahło «strymać smurod».
Eni Uebster, supracoŭnik zvałki, dapamahaŭ u pošukach, vykarystoŭvajučy ekskavatar.
«Ja ŭžo dumaŭ, jak by jamu skazać, kab jon prosta kupiŭ žoncy novyja» — pryznaŭsia Uebster.
Jon uspomniŭ, jak bačyŭ Isieldajka na kaleniach u kučy brudu.
«Nivodzin čałaviek pry zdarovym rozumie nie staŭ by heta rabić», — skazaŭ jon.
Ale cudam pieršy piarścionak chutka znajšoŭsia — Styŭ paznaŭ kaŭbaski, jakija jaho siamja vykinuła razam z kampostam.
A mienš čym za hadzinu znajšli i druhi.
Jon adrazu patelefanavaŭ žoncy, jakaja ŭ hety čas padbirała mietałašukalnik, kab dapamahčy ŭ pošukach, i jana raspłakałasia ad ščaścia.
«Šmat ludziej uražanyja hetaj historyjaj. Ale i ja sam taksama ŭražany, — skazaŭ Styŭ u kamientary BBC. — Układvaješ usie svaje nadziei i robiš usio, što možaš».
Žanin, u svaju čarhu, adznačyła, što heta pryhoda zrabiła ich šlub macniejšym.
«Ja viedaju, nakolki mocna jon mianie lubić — bo byŭ hatovy pierakapać hniłuju śmiardziučuju kuču kampostu», — skazała jana sa śmiecham u kamientary CTV.
Ciapier čytajuć
«Usio tak ci inakš budzie vyrašacca na poli boju». Čym budzie zajmacca novaja kiraŭnica Misii demakratyčnaj Biełarusi va Ukrainie?9
Kamientary