Tramp pra Rasiju i Ukrainu: Niavažna, što jany havorać. Usie zajmajucca paziorstvam

Pa słovach Donalda Trampa, finansavyja abaviazki pa padtrymcy Ukrainy ciapier całkam pierajšli da NATA.

«Jak vy viedajecie, my pradajem NATA vielizarnuju kolkaść abstalavańnia. My nie tracim hrošy, my zarablajem, ale ja nie chaču kazać pra zarablańnie. Ja chaču kazać pra toje, što my bolš nie ŭdzielničajem u finansavańni Ukrainy, my ŭdzielničajem u sprobach spynić [bajavyja dziejańni]», — zajaviŭ jon.

Razam z tym Tramp paviedamiŭ pra namier Vašynhtona pavialičyć abjomy pastavak uzbrajeńniaŭ krainam — udzielnicam NATA, jakija ciapier dajuć Ukrainie padtrymku.

«My pradajem rakiety i vajskovuju techniku na miljony, navat na miljardy dalaraŭ pradstaŭnikam NATA. […] Takim čynam, jany finansujuć. My ničoha nie finansujem. Dumaju, važna padkreślić hety momant, bo mnohija hetaha nie razumiejuć», — patłumačyŭ Tramp.

Taksama jon pryhraziŭ, kali kanflikt nie ŭdasca ŭrehulavać, uvieści handlovyja myty nie tolki ŭ dačynieńni da Rasii, ale i da Ukrainy.

«Ja mahu dasiahnuć hetaha, uvioŭšy sankcyi, abo vykarystaŭšy vielmi žorstkuju taryfnuju sistemu, jakaja stanie vielmi darahoj dla Rasii, Ukrainy ci luboha inšaha, z kim my majem spravu», — zajaviŭ Tramp.

Jon padkreśliŭ, što hatovy da ekanamičnaj vajny z Rasijaj, ale nie śpiašajecca ŭvodzić sankcyi, bo jany buduć mieć dla jaje kiepskija nastupstvy, čaho Tramp nie choča.

«Treba hladzieć na situacyju šyrej, bo, viedajecie, Zialenski taksama nie zusim biaźvinny, praŭda? Dla tanha patrebnyja dvoje — ja kažu pra heta ŭvieś čas. Ich treba źvieści za stoł pieramoŭ. Ciapier u mianie narmalnyja stasunki ź Zialenskim, ale jany ŭžo zusim inšyja, čym raniej, bo my bolš nie płacim hrošy Ukrainie. My spynili heta», — adznačyŭ jon.

Taksama Tramp zajaviŭ:

«Nichto nie pačynaje vajnu, ličačy, što prajhraje. Tamu jany i iduć. Ja ŭpeŭnieny, što Ukraina taksama vieryła, što atrymaje pieramohu: maŭlaŭ, my vyjhrajem, my zmožam. Ale jak vy atrymajecie pieramohu nad kimści, chto ŭ 15 razoŭ bolšy za vas? Bajden nie pavinien byŭ dapuścić, kab usio heta adbyłosia».

Pry hetym, na jaho dumku, usie ŭdzielniki pracesu zajmajucca «paziorstvam». Na pytańnie adnoj z prysutnych žurnalistak, što ministr zamiežnych spraŭ Rasii Siarhiej Łaŭroŭ na minułym tydni skazaŭ, što Pucin nie padpiša mirnaje pahadnieńnie ź Zialenskim, tamu što Rasija ličyć jaho nielehitymnym, i ci danosili rasijanie hetu pazicyju da amierykanskaha boku, Tramp razdražniona adkazaŭ:

«Niavažna, što jany havorać. Styŭ [Uitkaf] adkaža, ale ja mahu adkazać taksama: niavažna, što jany havorać. Usie zajmajucca paziorstvam. Heta ŭsio łuchta (bullshit). Usie zajmajucca paziorstvam».

Prysutny tut ža jahony śpiecpradstaŭnik Styŭ Uitkaf paśpiašaŭsia paćvierdzić, što tak jano i jość. 

«Ja chaču, kab hetaja ździełka była zavieršanaja. U mianie jość vielmi surjozny płan, kali pryjdziecca jaho vykarystać, ale majo hałoŭnaje žadańnie — pakłaści hetamu kaniec. Dumaju, u mnohich aśpiektach Pucin hatovy, ale byvaje tak, što jon hatovy, a Zialenski — nie. Heta vyhladaje prykładna tak: «A chto siońnia hatovy sieści za stoł?»

Mnie treba źvieści abodvuch razam, i ja chaču, kab usio heta skončyłasia. My majem ekanamičnyja sankcyi — i ja padkreślivaju, što havorka idzie mienavita pra ekanamičny cisk, tamu što ja nie chaču davieści da Treciaj suśvietnaj vajny… Dumaju, u mianie ŭsio atrymajecca», — vykazaŭ upeŭnienaść prezident ZŠA.

Śpiecpradstaŭnik Biełaha doma Styŭ Uitkaf na hetym pasiadžeńni zajaviŭ, što ZŠA spadziajucca ŭrehulavać vajnu va Ukrainie da 31 śniežnia 2025 hoda.

«Ukraina, Rasija, Iran, Izrail, CHAMAS — na hetym tydni my pravodzim sustrečy pa ŭsich troch hetych kanfliktach», — paviedamiŭ jon.

Taksama Uitkaf nazvaŭ Trampa «najlepšym kandydatam na Nobieleŭskuju premiju miru za ŭsiu historyju».

• 6
• 0
• 6
• 15
• 1
• 1
• 7
• 0