Tramp tak i nie ŭvioŭ sankcyi suprać Rasii i Pucina. Ci varta vieryć jaho novym pahrozam?

Tramp na dniach čarhovy raz daŭ Pucinu «jašče paru tydniaŭ» i pryhraziŭ, što kali prahresu na šlachu da miru nie budzie, jon «prymie vielmi važnaje rašeńnie».

«Ja vyrašu, što my budziem rabić, — skazaŭ Tramp. — Heta budzie vielmi važnaje rašeńnie pra toje, uvodzić ci nie maštabnyja sankcyi abo taryfy — a moža i toje, i druhoje. Ci my ničoha nie budziem rabić i skažam: raźbirajciesia sami».

Pakul što druhi varyjant vyhladaje vierahodniejšym za pieršy, kažuć ekśpierty. Tramp usio miakčej stavicca da Rasii: jon ciopła pryniaŭ Pucina na amierykanskaj ziamli, paśla čaho pierastaŭ patrabavać spynieńnia ahniu, a Bieły dom pačaŭ tłumačyć, što sankcyi kontrpraduktyŭnyja i pieraškadžajuć, a nie spryjajuć, mirnamu pracesu.

Adzinaja sankcyja za vajnu va Ukrainie, jakuju Tramp uvioŭ paśla ŭsich svaich pahroz, była nakiravanaja suprać Indyi — za kuplu rasijskaj nafty. Ale i ŭ hetym ekśpierty ŭbačyli sprobu vybić sastupki ŭ handlovych pieramovach ź Indyjaj, chutčej čym instrumient cisku na Pucina.

Dadatkovyja pošliny Trampa suprać Indyi ŭstupajuć u siłu na hetym tydni, 27 žniŭnia, i tearetyčna zdolnyja adbić u jaje žadańnie kuplać u Rasii naftu — jaje hałoŭny ekspartny pradukt.

Adnak na praktycy małavierahodna, što Rasija stracić Indyju jak pakupnika, kažuć ekśpierty. Jany ŭpeŭnienyja, što Tramp chutka skasuje i hetyja pošliny, a razam ź imi — adzinaje surjoznaje ŭskosnaje abo pramoje sankcyjnaje rašeńnie suprać Kramla, zaćvierdžanaje ŭ jahony druhi termin pry ŭładzie.

«Tramp pieryjadyčna vykazvaje niezadavolenaść Rasijaj, ale dahetul nie pryniaŭ nijakich mier, kab prymusić Rasiju spynić vajnu. Uvieś cisk byŭ skiravany na Ukrainu. Pahrozy ŭvieści sankcyi suprać Rasii tak i nie byli realizavanyja», — adznačaje Rut Dejermand, ekśpiert pa Rasii z Karaleŭskaha kaledža Łondana.

Čamu ZŠA nie ŭvodziać novyja sankcyi

Kanhres navat padrychtavaŭ zakonaprajekt, jaki dazvalaje Trampu ŭvieści «źniščalnyja sankcyi», nahadvaje Rut Dejermand, ale ŭ vyniku jaho adkłali z padstavy taho, što Bieły dom i biez novaha zakona abrynie na Rasiju ŭsiu sankcyjnuju moc najbujniejšaj u śviecie amierykanskaj ekanomiki.

«Adnak nijakich mier pryniata nie było. A kali Trampa narešcie ŭhavaryli nazvać datu ŭviadzieńnia novych sankcyj, jon u hety dzień zamiest sankcyj abviaściŭ, što zaprasiŭ Pucina na Alasku».

Paśla pamiatnaha samitu Bieły dom patłumačyŭ, što pytańnie pra sankcyi źniataje z paradku dnia.

«Kali mir budzie niemahčymy, a vajna praciahniecca i ludzi buduć hinuć tysiačami, to ŭ prezidenta budzie mahčymaść uvieści novyja sankcyi», — skazaŭ dziaržsakratar ZŠA Marka Rubia ŭ intervju CBS.

«Ale kali sankcyi ŭvieści ciapier, na hetym pieramovy i skončacca. Faktyčna my atrymajem jašče jak minimum hod-paŭtara vajny, śmierciaŭ i razbureńniaŭ. Na žal, hetym usio moža skončycca, ale my hetaha nie chočam».

A čaho tady choča Bieły dom?

«Tramp i jahonaje atačeńnie, padobna, nie ličać Rasiju pieraškodaj na šlachu da miru va Ukrainie. Jany ličać jaje vajnu z Ukrainaj pieraškodaj na šlachu da miru z Rasijaj, — piša Rut Dejermand. — Dla Trampa hałoŭnaja meta — nie spynieńnie vajny, a adnaŭleńnie adnosin z Rasijaj».

Što moža zrabić Tramp?

Ale kali Tramp raptam pieradumaje, razzłujecca i vyrašyć pakarać Pucina za niaŭstupčyvaść — jakija sankcyi ŭ jaho ŭ zapasie?

Hałoŭny niavykarystany kozyr — kanfiskacyja prykładna 300 młrd dołaraŭ zamarožanych valutnych reziervaŭ Rasii. Ale jon u rukach jeŭrapiejcaŭ, bo Pucin jašče da vajny vyvieŭ usie hrošy z varožaj na toj momant Amieryki ŭ Jeŭropu.

Tamu ŭ Trampa zastajecca tolki adna mocnaja miera — druhasnyja sankcyi suprać pakupnikoŭ rasijskich enierharesursaŭ.

Ekspart nafty i hazu dazvalaje Kramlu finansavać vajnu. ZŠA daŭno ŭviali poŭnaje embarha, a Jeŭropa — častkovaje, adnak Rasija pieranakiravała pastaŭki ŭ Kitaj i Indyju i praciahvaje pradavać adnosna nievialikija abjomy na jeŭrapiejskim rynku, pieradusim u Vienhryi i Słavakii, dzie ŭłady łajalnyja Pucinu.

Tramp zrabiŭ pieršy krok na šlachu da druhasnych sankcyj i abviaściŭ, što ŭviadzie z 27 žniŭnia dadatkovuju 25% pošlinu na impart indyjskich tavaraŭ u ZŠA, kali Indyja nie spynić kuplać naftu ŭ Rasii.

«Adrazu paśla hetaj zajavy Pucin zaprasiŭ sustreču sa śpiecyjalnym pasłańnikam Trampa. Supadzieńnie? Ja amal upeŭniena, što nie», — skazała Taćciana Mitrava, ekśpiert pa rasijskaj enierhietycy z Centra suśvietnaj enierhietyčnaj palityki Kałumbijskaha ŭniviersiteta.

«Heta pavarotny momant i sapraŭdy balučaja pahroza. Ja ŭpeŭniena, što indyjskaja naftavaja karta adyhrała svaju rolu», — kaža Mitrava. Dachody Rasii i biez taho skaračajucca ŭśled za cenami na naftu, i strata druhoha paśla Kitaja najbujniejšaha pakupnika ŭ vyhladzie Indyi była b balučaj dla Kramla.

Ci spracuje indyjskaja karta znoŭ?

Adnak adna sprava — vyklikać Pucina na razmovu, zusim inšaja — pierakanać jaho spynić vajnu.

Sumnievy jość navat u tym, što pahroza Trampa budzie realizavanaja i Indyi daviadziecca vybirać — amierykanski rynak abo rasijskaja nafta sa źnižkaj, kaža śpiecyjalist pa amierykanskich sankcyjach i kaleha Mitravaj z Kałumbijskaha ŭniviersiteta Ryčard Niefju.

«Chutčej za ŭsio, taryfy tak i nie ŭstupiać u siłu, a kali ŭstupiać, to nienadoŭha, a potym Tramp ich prypynić praz tydzień-druhi», — skazaŭ Niefju, jaki raniej adkazvaŭ za iranskija sankcyi ŭ Dziarždepie ZŠA.

Rasija, nafta i vajna byli tolki padstavaj dla ŭviadzieńnia hetych pošlin, zhadžajecca były čynoŭnik Minhandlu ZŠA, a ciapier ekśpiert daśledčaha centra CSIS Bił Rajniš. Sapraŭdnaja pryčyna — niaŭstupčyvaść Indyi ŭ handlovych pieramovach z Trampam, upeŭnieny jon.

U ZŠA da Indyi try pretenzii, nahadvaje jahony kaleha z CSIS Filip Łak, były ekanamist Dziarždepa ZŠA ŭ administracyi Džo Bajdena. Pa-pieršaje, vysokija pošliny na impart amierykanskich tavaraŭ. Pa-druhoje, niehatoŭnaść adkryvać svoj rynak dla amierykanskaj sielskahaspadarčaj pradukcyi. I tolki pa-treciaje — kupla nafty ŭ Rasii.

Tamu pošliny suprać Indyi jak srodak prymusić Pucina spynić vajnu vyklikajuć pytańni.

«Kali inšyja prablemy ŭ handlovych pieramovach buduć źniatyja, to pytańnie pra rasijskuju naftu, mahčyma, stracić aktualnaść, — skazaŭ jon. — I ŭvohule, kali b hałoŭnaj i adzinaj metaj było nanieści škodu Rasii i prybrać jaje naftu z rynku, to tut jość praściejšyja sposaby i inšyja instrumienty».

Da taho ž, kali Indyja raptam u adzin momant spynić kuplać rasijskuju naftu, suśvietnyja ceny na jaje vyrastuć prykładna ŭ paŭtara raza, abo na 30 dołaraŭ za barel, miarkuje Mitrava. Kitaj nie kupić hetyja abjomy z-za palityki dyviersifikacyi pastavak, a inšyja pakupniki spałochajucca hnievu Trampa.

Taki skačok cen na naftu supiarečyć abvieščanaj mecie Trampa źnizić košt bienzinu dla amierykancaŭ.

Bolš za toje, Indyja — važny, ale daloka nie hałoŭny pakupnik rasijskaj nafty. Klučavy partnior Kramla — Kitaj. A adnosiny ź Si Czińpinam Tramp psuje jašče bolš nieachvotna, čym z Pucinym. U handlovaj vajnie ZŠA i Kitaja ciapier pieramirje — až da mahčymaj sustrečy Trampa ź Si ŭ kancy kastryčnika na samicie ASIEAN u Małajzii.

Cisnuć asabliva niama čym

A kali nie druhasnyja sankcyi suprać pakupnikoŭ rasijskich enierharesursaŭ, to nabor instrumientaŭ dla cisku na Pucina ŭ Trampa abmiežavany, kaža ekśpiert pa amierykanskich sankcyjach Ryčard Niefju.

«U vyniku ŭsio zvodzicca da pytańnia: ci zastajucca sankcyi efiektyŭnym srodkam cisku na Rasiju z metaj spynieńnia vajny? Kali nie nafta i nie ekspart enierharesursaŭ, ci jość u nas inšyja instrumienty, zdolnyja prymusić Rasiju źmianić stratehičny kurs?»

Tramp dumaŭ, što ŭsio budzie praściej, kaža Niefju.

Jon asabista sustreniecca z Pucinym — i vajna skončycca. Ale vyjšła zusim nie tak, i što ciapier rabić — niezrazumieła. Pucin praciahvaje vajavać u raźliku na pieramohu i kapitulacyju Ukrainy, što było vidavočna z samaha pačatku, ździŭlajecca Bił Rajniš z CSIS.

«Va ŭsioj hetaj historyi z Rasijaj mianie biantežyć adno. Čamu ŭ Trampa syšło tak šmat času, kab zrazumieć, što Pucin choča nie pieramirja — jon choča pieramohi? Dumaju, heta było vidavočna amal usim užo daŭno, i, zdajecca, narešcie i jon heta zrazumieŭ».

A čas upuščany. Bo sankcyi — heta hulnia ŭ kotku i myšku, dzielicca Rajniš ułasnym dośviedam pracy ŭ sistemie ekspartnaha kantrolu. Pakul Amieryka ŭziała paŭhoda paŭzy, Rasija praciahvała abžyvać šlachi abychodu abmiežavańniaŭ. Biez adkaznych mier z boku ZŠA z kožnym dniom efiektyŭnaść dziejučych sankcyj źnižajecca.

«Na kožny vaš chod zaŭsiody jość adkaz. Jany znojduć sposab pradavać naftu ŭ abychod sankcyj. Tamu heta pastajannaja hulnia ŭ kotku i myšku, i nam zaŭsiody treba być napahatovie».

• 2
• 0
• 0
• 0
• 0
• 0
• 2
• 0