Pradajecca «hatel u biełaruskaj Šviejcaryi». Dla inviestara-amatara
U Łahojskim rajonie pradajecca turystyčny prajekt kala Siličaŭ z hatovym biznes-płanam i raźlikovaj akupnaściu za 8—10 hadoŭ.
Łahojski rajon nazyvajuć biełaruskaj Šviejcaryjaj. Uzhorki, lasy i blizkaść da Minska zrabili jaho adnym z hałoŭnych centraŭ zaharadnaha adpačynku ŭ krainie. Mienavita tut raźmieščany harnałyžny centr «Siličy», a da niadaŭniaha času pracavaŭ i kompleks «Łahojsk».
Ciapier u hetym rehijonie na prodaž vystavili niezvyčajny abjekt — nie dom i nie bazu adpačynku, a prajekt budučaha hatelna-restarannaha kompleksu na vysokaj stadyi hatoŭnaści.
Kompleks raźmieščany pobač z trasaj M3 Minsk — Viciebsk pry pavarocie na viosku Vierahi. Praz darohu — zapraŭka «Biełarusnafta». Da respublikanskaha harnałyžnaha centra «Siličy» kala 1,5 kiłamietra. Na mašynie ad MKAD daroha zojmie kala 25 chvilin.
Pavodle infarmacyi Realt.by, hatelna-restaranny kompleks raźmiaściŭsia na ŭčastku płoščaj 1,98 hiektara, jaki znachodzicca ŭ doŭhaterminovaj arendzie da 2112 hoda. Razam ź nieruchomaściu pradajecca i kampanija, na jakuju aformleny prajekt.
Asnoŭny budynak maje try pavierchi i ahulnuju płošču 1933 kvadratnyja mietry. U abviestcy hodam pabudovy paznačany 2021-šy. Unutranaj azdoby pakul niama, ale asnoŭnyja budaŭničyja raboty ŭžo vykananyja.
Pavodle pradaŭcoŭ, zavieršanaje ŭźviadzieńnie karobki budynka, mantaž dachu, pastaŭlenyja vokny na ŭsich pavierchach i zakryty ciepłavy kontur. Da kompleksu padviedzieny haz, a vodazabieśpiačeńnie płanujecca ažyćciaŭlać ź dźviuch ułasnych artezijanskich śvidravin — asnoŭnaj i reziervovaj.
Taksama ŭžo ŭstalavanyja čatyry reziervuary dla čystaj vady abjomam pa 50 kubamietraŭ, sistema ačyščeńnia haspadarča-bytavych ściokaŭ i hazavaja kacielnia. Na momant publikacyi abviestki praciahvalisia raboty pa azdableńni fasadaŭ, zakuplenyja mietałakanstrukcyi dla mantažu letniaj vierandy restarana.
Zhodna z prajektam, kompleks pavinien uklučać hatel na 30 numaroŭ i restaran na 75 miescaŭ. Adnak hetym mahčymaści nie abmiažoŭvajucca. Pradaŭcy adznačajuć, što terytoryja dazvalaje pašyryć kompleks za košt budaŭnictva katedžaŭ, SPA-zony, dadatkovych placovak dla adpačynku i inšych turystyčnych abjektaŭ.
Asobna padkreślivajecca, što prajekt užo prajšoŭ dziaržaŭnuju ekśpiertyzu, a dla jaho raspracavany biznes-płan ź finansavaj madellu, acenkaj ryzyk i prahnozam akupnaści. Pradaŭcoŭ zavablivajuć abiacańniem, što inviestycyi mohuć akupicca za 8—10 hadoŭ.
Jašče adzin arhumient dla patencyjnaha kupca — prajekt uklučany ŭ prahramu lhotnaha kredytavańnia inviestycyjnych prajektaŭ ŭ śfiery turyzmu. Staŭka pa kredycie ŭ ramkach praduktaŭ Banka raźvićcia («Turystyčny patencyjał») składaje 6% hadavych na termin da 15 hadoŭ. Adznačajecca, što prajekt realizujecca pry padtrymcy miascovych uładaŭ.
Praŭda, budučamu kupcu daviadziecca aceńvać prajekt užo ŭ novych umovach. Kali jaho raspracoŭvali, adnym z arhumientaŭ była blizkaść adrazu da dvuch harnałyžnych centraŭ — «Siličaŭ» i «Łahojska». Ciapier apošni spyniŭ pracu, tamu pośpiech budučaha kompleksu ŭ bolšaj miery budzie zaležać nie tolki ad łyžnikaŭ, ale i ad zdolnaści pryciahvać haściej ciaham usiaho hoda — praz zaharadny adpačynak, karparatyŭnyja mierapryjemstvy, SPA-pasłuhi i inšyja farmaty turyzmu.
Na žal, u Biełarusi pakul prykłady paśpiachovych prajektaŭ turystyčnych kompleksaŭ pobač z aŭtamahistralami tolki adzinkavyja. Najbolš viadomy — Westa na trasie M1 kala Dziaržynska. Za niekalki dziesiacihodździaŭ z hatela kompleks pieratvaryŭsia ŭ vialiki šmatfunkcyjanalny centr adpačynku i azdaraŭleńnia.
Za kompleks kala pavarotu na Vierahi razam z kampanijaj prosiać 8,1 miljona rubloŭ, abo kala 2,9 miljona dalaraŭ. Za takuju sumu ŭ pryharadzie Minska možna kupić paŭtara dziasiatka damoŭ ci niekalki raskošnych katedžaŭ. Ale ŭ hetym vypadku havorka idzie nie pra zaharadnuju nieruchomaść, a pra vialiki turystyčny prajekt, jaki pry razumnym haspadarańni moža prynosić dobry prybytak.
Kamientary
Such a lonely place, such a lonely place