Ukraina stvaraje tannuju alternatyvu rakietam Patriot. Ale vypusk mahčymy, tolki kali padklučacca Francyja, Italija i Narviehija

Pastajannyja rasijskija rakietnyja i dronavyja ataki vymusili Ukrainu šukać radykalnyja rašeńni dla abarony svajho nieba. Pakolki zachodnija zapasy sistem Patriot i SAMP-T abmiežavanyja, a amierykanskaja vytvorčaść ciapier u značnaj stupieni pieranakiravana na patreby Blizkaha Uschodu, Kijeŭ zrabiŭ staŭku na ŭłasnuju raspracoŭku.

Jak paviedamlaje Financial Times, ukrainski vytvorca zbroi Fire Point zajaviŭ, što na minułym tydni pravioŭ pieršaje lotnaje vyprabavańnie novaj zienitnaj rakiety FP-7.x. Suzasnavalnik kampanii Dzianis Šcilerman u intervju vydańniu nazvaŭ hetyja vyprabavańni «davoli paśpiachovymi».

Vytvorca śćviardžaje, što košt adnoj rakiety FP-7.x składzie kala 700 tysiač dołaraŭ. Dla paraŭnańnia, pavodle biudžetnych acenak armii ZŠA na 2026 hod, adna rakieta Patriot PAC-3 kaštuje kala 3,8 miljona dołaraŭ. Takim čynam, ukrainskaja raspracoŭka moža być bolš čym u piać razoŭ tańniejšaj.

Pavodle Šcilermana, užo ŭ žniŭni pradpryjemstva zmoža vypuskać pa try rakiety ŭ dzień, jakija buduć zachoŭvacca da momantu ŭstanoŭki infračyrvonaj hałoŭki samanaviadzieńnia, jakuju Fire Point spadziajecca atrymać ad niamieckaj kampanii Diehl Defence. Poŭnaściu hatovyja rakiety źjaviacca da 2027 hoda.

Jak adznačaje FT, rakieta FP-7.x źjaŭlajecca klučavym elemientam novaj jeŭrapiejska-ukrainskaj sistemy supraćpavietranaj abarony pad nazvaj «Freja» (Freyja). Kampanija nie raskryvaje svaich kantrahientaŭ, adnak ukrainskija i jeŭrapiejskija čynoŭniki paviedamlajuć, što Fire Point viała pieramovy ź niamieckaj Hensoldt i francuzskaj Thales adnosna radaraŭ, ź italjanskaj Leonardo — nakont sistem supravadžeńnia celaŭ, a taksama z narviežskaj Kongsberg adnosna technałohij kiravańnia i kantrolu.

Pavialičyć

Pavodle raspracoŭščykaŭ, realizacyja prajekta ciapier u značnaj stupieni zaležyć ad taho, nakolki chutka buduć dziejničać zachodnija partniory.

Technična FP-7.x pavinna nablizicca da mahčymaściaŭ Patriot. Pavodle Fire Point, rakieta zdolnaja dziejničać na vyšyniach da 25 kiłamietraŭ — prykładna na ŭzroŭni amierykanskaj sistemy. Jana taksama pavinna mieć dastatkovuju chutkaść dla pierachopu balistyčnych rakiet.

Adnak pamiž dźviuma sistemami jość važnyja adroźnieńni. Patriot vykarystoŭvaje vysokadakładnaje naviadzieńnie praz mahutnyja naziemnyja radyjołakatary. Ukrainskaja rakieta taksama vykarystoŭvaje radyjołakacyjnaje naviadzieńnie, ale na finalnym etapie palotu pierachodzić na infračyrvonaje samanaviadzieńnie pa ciepłavym śledzie celi. Ciepłavoje naviadzieńnie zvyčajna ličycca mienš efiektyŭnym, čym radarnaje, z-za mahčymaści vykarystańnia ciepłavych pastak i srodkaŭ radyjoelektronnaha supraćdziejańnia.

U intervju FT ekśpiert pa supraćrakietnaj abaronie Centra stratehičnych i mižnarodnych daśledavańniaŭ u Vašynhtonie Tom Karaka (Tom Karako) adznačyŭ, što FP-7.x moža papoŭnić arsienał SPA Ukrainy, jaki ŭklučaje staryja savieckija sistemy, amierykanskija rakiety Hawk i sučasnyja niamieckija pierachopniki IRIS-T. Adnak sistema «Freja» naŭrad ci stanie paŭnavartasnaj zamienaj bolš prasunutym sistemam, takim jak Patriot.

Na jaho dumku, pry abaronie ad poŭnaha śpiektru pahroz nieabchodna vykarystoŭvać roznyja vidy ŭzbrajeńnia. Tamu pravilniej razhladać novuju ŭkrainskuju raspracoŭku jak dadatak da Patriot, a nie jak jaje pramoha pierajemnika.

Niahledziačy na skieptycyzm, Fire Point užo nie raz ździŭlała naziralnikaŭ. Jašče letaś mnohija sumniavalisia ŭ płanach kampanii pa stvareńni tannych kryłatych rakiet. Adnak paśla hetaha jana prademanstravała pośpiechi z dalnabojnym bieśpiłotnikam FP-1, jaki vykarystoŭvaŭsia dla ŭdaraŭ pa rasijskich naftapierapracoŭčych zavodach i navat pa vajennym karabli kala Sankt-Pieciarburha. Aktyŭna vykarystoŭvajecca i siaredniedaloki kompleks FP-2, jaki nanosić udary pa rasijskaj łahistycy na akupavanych terytoryjach Ukrainy.

Ekśpierty adznačajuć, što hetyja ŭzory zbroi nie adroźnivajucca asablivaj małazaŭvažnaściu, ale efiektyŭna vykarystoŭvajuć niedachopy rasijskaj radyjołakacyjnaj sietki. Mienavita tamu mnohija ciapier bolš uvažliva staviacca i da novaha prajekta supraćrakietnaj abarony.

Pavodle acenki kansultanta ŭ śfiery abarony Marka Łanže (Marc Lange), hałoŭnaja ciažkaść pry stvareńni supraćbalistyčnych rakiet zaklučajecca ŭ tym, što ich vielmi składana vypraboŭvać. Dla daviadzieńnia takich sistem da patrebnaha ŭzroŭniu patrabujucca hady inžyniernaj pracy i vialikaja kolkaść realnych pierachopaŭ.

Adnak Ukraina apynułasia ŭ asablivaj situacyi: pastajannyja rasijskija balistyčnyja ataki adnačasova stvarajuć pahrozu i dajuć mahčymaść chutčej nazapašvać praktyčny vopyt, jaki ŭ inšych krain zvyčajna źjaŭlajecca tolki praź dziesiacihodździ ekspłuatacyi padobnych sistem.

• 6
• 0
• 0
• 0
• 0
• 0
• 0
• 0